رسانکدر دوبھر ءِ تہ ءَ اِنت ، چاپی ءُ الیکٹرونک ۔ چاپی رسانک ءِ تہ ءَ نسک ،روتاک ءُ تاکبند ھوار اَنت ۔ الیکٹرونک رسانک ءِ تہ ءَ ریڈیو ، ٹی وی ءُ انٹرنیٹ ھوار اَنت ۔

بندات ءَ رسانک پہ چاگردی سرپدی ءُ دیمتر ءَ پہ سیاسی سیتاں کارمرد بیتگ ۔ دنیگت چہ رسانک ءَ ھمے کار گرگ بیگ ءَ اَنت ۔ زمانگ ءِ دیمروی ءَ رسانک ءَ ھم دیمروی کرتگ ءُ دیم ءَ شتگیں رسانک اے وھدی الیکڑونک میڈیا ءِ تہ ءَ انٹرنیٹ اِنت کہ انٹرنیٹ ءَ پہ ھما مردمانی رسانک ءَ ھم آسانی ودی کرتگ کہ آیانی گْور ءَ چاپکاری آسراتی نیست ، گسرگْوش ءُ گسرگند ءِ آسراتی نہ بیوکیں گل ءُ ٹک ھم چہ انٹرنیت ءِ کمک ءَ وتی گپاں تامر یا توارءِ دْروشم ءَ ماں جھان ءَ شکسات کن اَنت ۔

رسانکی تک ءَ آشوب چہ سوشل میڈیا بزاں چاگردی رسانکدر ءَ اَتکگ نی رسانکدر تیوک ءَ مزنیں اھوالکاری تْرامدگانی دست ءَ نہ اِنت بلکیں ھرچ مردمے کہ آانٹرنیٹ ءِ کاربندگ زانت آ چہ ایشی ءِ کمک ءَ وتی توار ءَ پہ مردماں سر کرت کنت ۔ اے ھمینچو سانمند جوڑ بیتگ کہ ڈیھانی تہ ءَ سیاسی آشوب ھم چہ چاگردی رسانکدر ءِ کمک ءَ اَتکگ ۔ دوھزار دہ ءَ ارب اسپرنگ (تازی بھار) ءِ نام ءَ جھان ءَ نام پْرشتگیں سیاسی باوست ءِ چست کنگ ءَ ھم چاگردی رسانکدر ءِ مزنیں کردے ھست ۔ اے سیاسی باوست ءَ تازی ڈیھانی تہ ءَ مزنیں مٹی آرتگ کہ دنیگت اے باوست ءِ سان یک مزنیں دمگے ءِ سر ءَ ھست اَنت ۔ تیونس ءَ چست بیتگیں آشوب گوں تیزی ءَ دگہ پنچ ملکاں تالان بوت ، اے تیزی رسانکدر ءِ کمک اَت کہ لیبیا،مسر ، یمن ، سیریا ءُ بھرین ءَ ھم مردم دگانی سر ءَ مُچ بوت اَنت ءُ پہ وتی سیاسی لوٹاں زْرمبش اِش کرت ءُ اے نام گیپتگیں پنچیں ڈیھانی سیمسر ءَ ڈن ھم مردمانی بے تاھیری سھر ا بوت اَنت ءُ آیاں تازی بھار ءِ رندگیری ءَ مراکش ،الجزائر،ایرانی کوزستان ،لبنان ، اردن ، کویت ، اومان ،سوڈان ،کمو باز جبوتی ،موریتانیا، پلستین ، سھودستان ءُ زرباری ساھارا ءَ مردماں زھرشانی کرت ۔ ھما ڈیھاں کہ بادشاہ ءُ زوراکیں رژیم اَنت اُود ءَ مردماں گیشتر زھرشانی کرت ۔ رژیمانی زورگْوشی ، مردم کشی ءَ چک ءُ پد نہ بیگ ءُ توانمندیں ڈیھانی تہ ءَ دَور کنگ ءَ پد تازی بھار سوبین نہ بوت بلے دمگ ءِ تہ ءَ نا ایمنی دنیگت ھست بلکیں اے نا ایمنی دولت اسلامیہ یا داھش ءِ دْروشم ءَ پہ سرجمیں جھان ءَ یک مزنیں ترسے جوڑ بیتگ ۔ ھمے نام گیپتگیں ڈیھانی تہ ءَ لکانی مردم تاوانبار بیتگ ، سدانی شھرءُ میتگ وایرانگ ءُ لکاں مردم وانڈواِنت ۔

انی ایران ءَ چست بیتگیں باوست ءُ شور ءِ تہ ءَ ھم انٹرنیٹ ءُ چاگردی رسانکدر ءِ مزنیں کردے ھست ۔ انٹرنیٹ کہ پہ سرکار ءَ وتی سرکاری کارانی گھتر کنگ ءُ مردمانی سر ءَ بالادستی ءِ برجاہ دارگ ءَ ھم یک ھژدری ئیں چیزے جوڑ بیتگ ءُ مردماں ھم یک اَنچیں ابزارے دست کپتگ کہ آ وتی توار ءَ آ دگہ مردماں سر کرت کنگ ءَ اَنت ءُ آیاں پہ وتی ھواریں سیتاں زْرمبش آرگ ءِ سکین دیگ ءَ اَنت اے اَنچیں ھڈے جوڑ بیتگ کہ ناں گوں سرکاراں ایربرگ بیت ناں شانگ ۔ ھما مردمی اُگبال کہ پیش ءَ سرکاراں چیرجتگ اَنت ءُ مردماں نہ داتگ اَنت نی آیانی دیگ ءَ ساڑی اَنت دا ں مردم سرکار ءَ بن گْوج مہ کن اَنت ۔ ڈیھانی تہ ءَ گْرانی،پہ شھرمننداں بے تاھیری ودی کنوکیں سرکاری شوندات ءُ سوڑگانی سر ءَ چاگردی رسانکدرمردمامی سیتانی پھزکار جوڑ بیتگ ۔

بلوچ ھم اگاں بہ لوٹ اَنت اے ابزار ءَ پہ وتی راجی زْرمبش ءِ تالان کنگ ءَ جوانیں رنگے ءَ کارمرد کرت کن اَنت بئے ھمیش اِنت کہ آ رسانکدرءِ بُنکی زانشت ءَ پوہ بیگ ءِ کوشست بہ کن اَنت کہ اگاں رسانکدر بے مھاریں رنگے ءَ کارمرد کنگ بہ بیت ءُ راجدوستیں گلانی گْور ءَ پہ آئی ءِ کارمرد کنگ ءَ میڈیا گائڈلائن ( رسانکدری شون )مہ بیت آ چہ اے ابزار ءَ آ رنگ ءَ کار گیپت نہ کن اَنت کہ کارگرگ بیت ۔ انی ھم من ھمے گندگ ءَ آں کہ کارگرگ وتی جاہ ءَ بازیں تکاں ھورکیءُ نزوری ھست 

۔

چاگردی رسانکدرءِ دومستریں تندجاہ یا کڈک پیس بک ءُ ٹیوٹر اَنت ۔ ٹیوٹرواکداریں مردمانی گپ ءُ تْران ءُ رسانک ءِ جاہ جوڑ بیتگ ،جھان ءِ سانمندیں مردم ، ڈیھانی مھتر ءُ وزیر وتی گپانی سر کنگ ءَ ٹیوٹر ءَ کارمرد کنگ ءَ اَنت کہ رندتر ءَ ھمے گپ ماں ٹی وی ، ریڈیو ءُ روتاکاں شنگ بہ اَنت ءُ پیس بک جھان ءِ مستریں چاگردی رسانکدر اِنت ، مردمانی دلدوستیں رسانکدر اِنت بلے اُود ءَ بلوچ گلانی کرد اندیم اِنت ۔ پیس بک چوریگانی بازارجوڑ بیتگ ، اود ءَ سیاسی گلانی پشتپانی ءَ ناسیاسی ئیں روش ردوم دیگ بیتگ اَنت ۔ بلوچ راجدوست پنجاپیانی زبان ءَ گپ جنگ ءَ اَنت ، منانک ءِ جاہ ءَ پت نداریں مردمانی درگت ءَ زاہ ءُ بد کارمرد کنگ بیگ ءَ اِنت ۔ سیاسی گلانی راھشونءُ کارکن بلوچ زْرمبش ءِ پلہ مرزی کنوکیں سوشل میڈیا ایکٹیوسٹ بزاں چاگردی رسانکدر ءَ پرکاریں مردمانی سکین ءُ دلبڈی ءَ گندگ نہ بیگ ءَ اَنت ۔

بژن ءُ کھتی گپ اِیش اِنت کہ اے لس مردمی رسانکدر بلوچ آجوئی دوستیں مردماں سیمتمندیں گپ ءُ وتی دیدانک ءِ شکسایگ ءِ جاہ ءَ یک دومی ءِ ایرجنگ ءُ ھما مردمانی کردار کشی ءَ کارمرد کرتگ ءُ کنگ ءَ اَنت کہ آ بلوچ زْرمبش ءِ پلہ مرز ءُ ھمراہ اَنت ۔

واجہ ھیربیار کہ بلوچ راھشونانی تہ ءَ چہ مستریں مردماں یکے آئی ءِ پلہ مرزاں بندات ءَ روتاک توار ءُ رند ءَ چاگردی رسانکدر ءُ درساں گیش پیس بک گوں وت پت نہ داروکیں مردمانی بگیری ءَ کارمرد کرت ۔ چوش کہ چاپی رسانک ، روتاک ھرکسی دزرس ءَ نہ اَنت اُود ءَ ندنام ءِ سر ءَ نبیسوکاں ھم ھما روتاک ءِ شونکار زان اَنت بلے پیس بک ءَ دروگیں نامانی سر ءَ پاکستانی انٹلی جنس ءِ سائبر کارمند بزاں ھما مردماں کہ آ پاکستان ءَ پہ ھمے کار ءَ داشتگ اَنت کہ آبلوچ ءِ رسانک ءِ دیم ءَ بہ گر اَنت ءُ پہ آئی ءَ اے چاگردی رسانکدر ءَ ھم ناکار جوڑ بہ کن اَنت ۔ سد بژن کہ آ اے کار ءَ سوبمند بیتگ ءُ ایشی ءِ راہ ءِ بوجگ ءَ واجہ ھیربیار پیش کپتگ ءُ رند ءَ آ دگہ گلاں ھم اے کار ءِ رندگیری کرتگ ءُ نی جاور اِیش اَنت کہ پہ ستکگیں لوگ ، برتگ ءُ کُشتگگیں مردماں گپ جنوک لنکوکانی سر ءَ شمار بہ اَنت بلے یک دومی ءِ ایرجنوک ھزارانی کساس ءَ اَنت ءُ ایشی ءِ تہ ءَ ھچ رنگیں شکے نیست کہ ایشانی پشتپانی کنوکانی تہ ءَ بلوچ آجوئی دوستیں سیاسی گل ھوار اَنت یا آیانی گچینی مردمانی پلہ مرزی ءَ اے کار بیگ ءَ اِنت ۔ چوشیں سوشل میڈیا ایکٹیوسٹے پشت نہ کپتگ کہ بلوچ راج آئی ءِ گپاں باور بہ کنت ۔ ھمے کارکن کہ دگرانی ایرجنگ ءَ دمانے ھم مھتل نہ بہ اَنت چہ وتی اکاؤنٹ ءَ وتی گل ءِ دْرشان ءَ ھم شنگ نہ کن اَنت کہ آیانی کارراھبندی زمہ واری اِنت ۔ پارٹی کارراھبند (آئین ) درسیں کارکناں پابند کنت کہ آوتی گل ءِ شونداتاں شکسا اِیت ءُ پہ مردماں سر کنت ،اد ءَ ماں سد ءَ سی مردم ھم گون نیست بلے پہ پلینڈی ءَ سد ءِ تہ ءَ سدیں مردم گون اَنت ۔

داں وھدے کہ بلوچ سیاسی گل اے درگت ءَ سنگینی ءَ نہ جیڑ اَنت ءُ وتی کارکناں چاگرد ی رسانکدر ءِ کارمرد کنگ ءِ سیتمندیں شونداتے نہ دئے اَنت بلوچ ءِ توار ھمے رنگ ءَ نگٹ مان اِیت ۔ اے سیاسی گلانی نزوری اِنت کہ تپاکیں راجانی سازمان ھمے گپءِ سر ءَ نننداِیت کہ مئے رودرتکی ھمساھگیں ڈیھے ءَ سرکار ءِ بگیری ءَ زھرشانی کنوکیں مردم لٹ شاپ ءُ زندانی کرتگ اَ نت ، بلے بلوچانی ھمروچ ژانگولیں جون کپگ ءَ اَنت ، جنین آدمانی آبروریزی کنگ بیگ ءَ اِنت ، بلوچ نودربرچہ دربرجاھاں آوار جنگ بیگ ءَ اَنت بلے جھان کر ، کور ءُ گنگ اِنت پرچا ؟ ___ اے جست ءَ بلوچ سیاسی کارکن چہ وت بہ کن اَنت ، چہ وتی راھشوناں بہ کن اَنت ۔

گالبلد :

ابزار: ٹول ، اوزار ، دزبوج کہ چہ آئی ءِ کمک ءَ کارے کنگ بیت۔

تْرامدگ : ادارہ 

تْرام : منظم 

 نسک: کتاب

گسرگند:ٹی وی 

گسرگْوش:ریڈیو

وانڈو: در پہ در ، درانڈیھ

اُگبال:کسے ءِ کارانی مزد ، ھما ونڈ کہ کسے ءَ چاگردی یا ڈیھی راھبندانی پد ءَ دیگی اِنت ،حق۔

شوندات : پالیسی

پت ندار:تپاک نہ کنوک

اے مراگش ءِ گوش دارگ ءُ ایرگیجگ ءَ جھل ءِ بکس ءَ کار بہ بند اِت ۔