سھب ءَ وھدے کہ ما وتی چکانی دست ءَ گر ءُ آھاں اسکول ءَ سر کنگ ءَ پد وتی
ھمروچیگیں کارا ں رو اِیں گڑا مارا ھچ اَدار اے گمان گور نہ جنت کہ مئے
چکانی باندات چون بیت ؟ اسکول ءِ نام ءِ سر ءَ مکیں ھما ماڑی ءَ کہ ما وتی
چکاں پہ چار کلاک انچیں مردمانی دست ءَ دئے اِیں کہ چَہ آھاں گیشتر ءِ ما
نام ءَ ھم نہ زان اِیں،آیا مئے چکانی سوجکاری ءَ کرت کن اَنت ؟ آیا باند ءَ
آوتی چاگرد ءَ یک شرپداریں جاھے ءَ سر بنت ؟بلے پد ا ھم ما گِھتر اِیں چر آ
ھزار ھاں مات ءُ پتاں کہ دنیگت اے زانت اِش ھم نیست کہ آھانی چکانی وانگ ،
سوج ءُ ھیلکاری ءِ ذمہ واری آھانی کوپگ ءَ اِنت ۔دانشورانی مزنیں کچے ھم انچائیں انسانانی پیم ءَ چَہ زانشت ءِ سبب ءَ بودناک بوگءَ پد ھم زانشت ءَ چَہ دگہ آسراتیاں کمتر زانت ۔ شد لاپی ءُ درتہ پچی ءِ سر ءَ نامداریں لچہ ءُ کسہ ساچگ بوتگ پمیشکا اے ھیال ھرگور ءَ تالان اِنت کہ پہ انسان ءَ چَہ درساں گیشتر اَرزش آئی ءِ لاپیگ اِنت ۔دنیا ءِ گیشتر سیاسی زْرمبش شد ءِ ھلاسی ءِ ڈاھجار( دعوی) ءِ پد ءَ چست بوتگ ءُ ناکامی ءِ گرداباں کپتگ اَنت چَہ ایشاں برعکس زانشتی زرمبشاں زبردست سوبمندی رستگ ۔ھما زْرمبشاں زانشت ءِ ارزش چَہ شد ءُ زندءِ دگہ آسراتیاں گیشتر زانتگ، انسان دودمانی جوڑ کرتگ ءُ آئی ءِ بود باش ءِ وڑ ءُ پیم بالادی(عروج ) ءَ برتگ اَنت ۔دنیا ءَ آشوب آروکیں کلیں نیکراھی زْرمبشاں ھم زانشتی لیکوانی سبب ءَ چاگرد ءَ روتگ جتگ ۔ سدھانت (مِھتر مہا آتما گوتم بدھ) ءِ بن واس ءُ مِھتر محمد اءِ ’’ حرا ھونڈ ‘‘ ( گار حرا ) ءَ دارگ ءُ جیڑگ ءِ برورد ’’ زانشت ‘‘ اِنت ۔ھمے پیم پیگمبری بستار ءَ سر بوتگیں کلیں انسان ءُ زانتکاراں شد یک انچیں لوٹے ڈس اِتگ کہ پہ انسان ءُ آدگہ جناوراں یک پیم اِنت ۔ نام گیپتگیں زانتکاراں پہ اِے ساھداری لوٹانی (بدنی لوٹ ) پوسادی ( قابو کنگ ) ءَ سر ءُ ڈِلی ( ذہنی ءُ جسمی ) ورزش ءُ ھیلکاری سوج کرتگ ۔
اگاں ڈلگچار بہ کن ئے گڑا اے ھبر راست اِنت کہ یک شدیگیں انسانے ءِ ھیال ءُ گمان ھم ناتوان بنت ءُ شد یک انچیں لوٹے کہ ایشی ءِ درکساس آ دگہ لوٹ ھچ ھساب ءَ نہ بنت پمیشکا گْوشگ بوتگ کہ ’’ شد دودمان ءِ سیمسر اں کروج اِیت ۔‘‘ من ھم اے راستی ءِ نہ منوگر نئے آں بلے شدکسے ءِ دیم ءَ چنڈے نگن ءِ چگل دیگ ءَ ھلاس نہ بیت ۔منی ناتپاکی اِیش اِنت کہ شدیگ ءَ دلوتانی پیم ءَ چارینگ ءُ وارینگ ءِ بدل ءَ انسانانی پیم ءَ انچیں سوج ءُ ھیل دیگ بہ بیت کہ وتی وراک ءُ وردن ءِ بندبست ءَ وت کرت بہ کنت ۔انچوش کہ دپتر ءَ مردم کُشیں ڈکالانی سال ءَ ایوک ھما کس زندگ منتگ اَنت کہ وراکانی جوا ن کارمرد اِش دربرتگ ۔ لس ھیالے کہ گْوستگیں باریگ ءَ پہ انساناں شد ھچ جنجالے نہ بوتگ بلے پولکاراں اے گْواچن کرتگ کہ تھاریں دور ءَ بازیں انسانی پدریچ شدءِ سبب ءَ بے رندی مرتگ ۔انسانی ردوم ءِ میانی ھما دور ءَ کہ انسان ءَ گیشتر وراک چَہ شکار ءَ رستگ اَت ’’ وردن ءُ آپ ءِ رسگ انچوش بے گمانی اَت پمیشکا زانگ بیت کہ اے دور ءَ مردم وری ( آدم خوری )رواج کپتگ ۔( فریڈرک اینگلز ) ‘‘ ھمینچک کہ انسان ءِ زانت گیشتر بیان بوتگ ھمینکس آئی ءِ شد کمتر ءُ وردن ءِ پیداوار گیشتر بوتگ ۔
مروچیگیں سرمایہ داری بندبست ءِ لھتیں روِش لددور ( عہد وحشت ) ءِ چھرگ جنت ۔انچوش کہ لد دور ءَ انسان ایوک وروکیں دزگاھے ( مشین ) بوتگ مروچیں ھم مردم ءِ جند ءِ آسراتی ءُ ور چری ارزش دیگ بنت ۔ ھیلکاری ءُ دربری ( تعلیم وتربیت ) ءِ ھستیں وڑ ءُ پیمانی یک مولے ’’ وانگی کارجاہ ‘‘ ءَ ھم بستگیں مردماں روزگار دیگءُ دومی پہ سرمایہ داری بندبست ءَ چَہ زانت ءَ زِبھرازمی بودشت ءَ گوں کار کنوکیں مردم جاڑی کنگ اِنت ۔چَہ ھمے لیکوءِ چیردستی ءَ گوں کسان سالیں نودربراں اے جست کنگ ءَ کہ ’’ مزن بئے چی یے جوڑ بئے ؟‘‘ راستی ءَ سکین دیگ بیت کہ وانگ ءِ بندری مراد آرامدھیں روزگار اِنت ۔نوکیں ٹکبندی دور ( طبقانی دور ) ءَ ’’ پٹی بورژوا ‘‘ ءِ تہ ءَ ھم مردمانی بستار ھمے رنگ ءَ گیشینگ بوتگ اَنت کہ ھرچے وتی ڈگری دیوکیں وانگ ءِ برورد ءَ ھمینکس مستریں پوسٹے گیپتگ آ چاگرد ءِ تہ ءَ ھمینکریں مزنیں مردمیکہمئے ھند ءَ مھلو ک اِش بیوروکریٹ یا افسرشاھیگْوش اَنت اے ھمااَنت کہ چَہ وتی ھوش ءِ بد ل ءَ دگرانی جوڑ کرتگیں رُنگ ءُ راستیں کارراھبندانیپد ءَ کار کن اَنت۔اے شاھی نوکر مدام چَہ لگتمالیں ٹک ءَ گچین کنگ ءُ چر آھانی کمک ءَ لگتمالیں ٹک ایر دست کنگبنت ۔
پمیشکا لگتمال کنوکیں ٹک ءِ دیم ءَ میلانک بیوکیں راھشوناں ’’ ایردست کار ءِ وانگی بندبست ‘‘( استحصالی نظام تعلیم ) نادوستیں رنگے ءَ چار اِتگ ۔فرائرے ھما اولی دانشور اِنت کہ ’ ’ ایردستیں راجانی وانگ ‘‘ نامیں کتاب ءِے نوشتگ ءُ چَہ گُٹ ءَ ھستیں وانگی بندبست ءِ لوپ ءِ کشگ ءِ شون داتگ ۔ آئی ءَ سوج داتگ کہ ’’ نودربرانی ذھن ءَ ھالیکیں رزان سر پد مہ بئے اِت کہ اُستاد آھانی تہ ءَ پہ وتی دلکش ھرچے مان بہ کنت ۔‘‘ آئی ءَ جیڑہ ءُ ترانکاری ( مکالماتی ) وانگ ءِ لیکو پیش کرتگ بزاں ’’ اُستاد بنگپ ءَ یک جیڑھے ءِ پیم ءَ پیش بہ کنت ءُ پہ آئی ءِ گیشینگ ءَ گوں نودربراں جیڑہ ءُ ترانکاری بہ کنت ۔‘ ‘اے راھبند ءَ ’’ وانگ ‘‘ اے رنگ ءَ پیش کنگ بیت کہ ’’ محمد علی جناح یک مردمے اَت ۔ ھندوستان ءَ مسلم لیگ ءِ راھشون ءِ بستار ءَ دیم ءَ اَتک ءُ پاکستان ءِ جوڑ کنگ ءِ پلہ مرزی ءِے کرت ۔نوں شما چے گْوش اِت کہ آ چونیں مردمے بوتگ ؟‘‘ایشی ءِ برعکس ’’ لیکوی وانگ ‘‘ ( نظریاتی تعلیم )ءِ تہ ءَ اے گنجائش پشت کاپینگ نہ بیت ۔ محمد علی جناح ءَ بے رحمت اللہ ، حضرت ءُ قائد اعظم رنگیں پناماں نویسگ میارے زانگ بیت ۔اے درور ءَ جوانیں رنگے ءَ سرپد بوگ ءَ پد اے ھبر اجکھی نہ مان اِیت کہ مدرسہ پرچا ھزارھانی کچ ءَ وتکش اُرشکار جوڑ کنگ ءَ سوبین اَنت ، اے ’’وانگی بندبست ‘‘ذھن ءَ تریاک ءِ پیم ءَ واب ( مفلوج ۔سُن ) کنت ھمے پیم ھندوچاگرد ءَ چَہ برھمن ءَ گیش ’’ شودر ‘‘ ءِ ذھن ءَ اے ھبر تیجار کنگ بوتگ کہ آ چَہ ’’ بھگوان ‘‘ ءِ پادءَ ودی بوتگ اَنت انچوش ایردستکار ءِ وانگی بند بست نودربراں پہ وتی جندءَ در آمد ءُزوراک ءِ بندبست ءِ کارمند جوڑ کنگ ءَ داں وسے جھد کنت ۔
ھماچاگرد ءَ کہ پہ زوراکءَ زھرءُ کنت گیش بیان بیت آاُود ءَ وانگی بندبست ھم اسر مند بیت ۔ آئیڈل ءُ کتابی چاگرد ءِ برعکس چاگرد گندوکیں بے تاھیریں ورناھانی ھمدردی گوں زوراک ءِ دیم ءَ چست بوتگیں زْرمش ءَ بنت پہ آھانی دارگ ءَ زوراک ھم نودربراں وتی زد ءَ کنت ۔ آھاں بدنیءُ ذھنی تک ءَ ژند کنگ ءِ وڑوڑیں ھنر سازگ بیت آ پہ انچیں کاراں پابند کنگ بنت کہ ذھن اِش مانگیش اَنت ۔زْرمبش ءِ باریگ ءَ زوراک ءِ کلیں چیءُ کارانی سر ءَ کُنت ءُ زھر پیدا ک کنگءُ مردمانی چَہ آھاں دور دارگ یا چَہ آھانی اسرمندی ءَ در کنگ ءِ جھد کنگ بیت ۔ریاستی لیکو رَد کنگ ءُ ’’ زْرمبشی لیکو ‘‘ رُودینگ ءُ شنک کنگ بنت۔نودربر ءِ ذھن ءِ سر ءَ چَہ دونیمگ ءَ جنگ بیوکیں چککش ( ہتھوڑی ) آئی ءِ زانشتی بود ءَ کنٹ یا کم کن اَنت چَہ ایشی ءَ نودربرانی دو ٹک پیداک بیت یکے ھما کہ زور سرکار ءِ بندبست ءِ کارمند جوڑ بیت ءُ یکے چَہ آئی ءَ سک کُنت دار ۔سرکاری بندبست ءِ کارمند جوڑ بیوکیں نودربرانی بودشت گوں پرمانبرداری ءَ زوال بنت ۔
زانشت ءُ ازم ءِ ھمسنگے ءَ پہ انسان ءِ آسراتی ءَ چی جوڑ کنگ بیت ۔ زانشت ءِ بندری مول انسان ءِ بودباش ءَ بالاد ءَ برگ ءُ چَہ شر ترین ءَ شرتر کنگ اِنت کہ سائنسی زبان ءَ ایجاد گْوشگ بنت ،بے شک شھپگری برورد اَنت بزاں آھانی بن زانشت اِنت بلے آھا ں پلگارگ ءُ گھترکنگ ءَ ھنرمندی ھژدری اِنت ۔پہ اے ھبر ءِ پوہ بوگ ءَ اے درور ءَ بہ جیڑ اِت کہ ’’اگاں یکے بہ زانت بالیگ چے پیم بال کنت بلے آسن ءَ وتی ذھن ءَ ھستیں لیکو ءِ ھساب ءَ اڈ کنگ مہ زانت گڑا بالیگ جوڑ کرت کنت ؟‘‘الم آئی ءَ وتی لیکو ءِ راستیں دروشم دیگ ءَ مشکل بیت ۔ زانتکاراں اگاں ازم ءِ کمک مہ زرت اِنت گڑا مروچی مئے کش گْور ءَ ایریں چی بے ڈول ، بدرنگ ءُ آسانی ءَ کارمردبیوک نہ بوتگ اِت اَنت ۔کاریگر ( ازمکار ) گاڑی جوڑ کنگ ءِ یکیں فارمولا ءَ لکھاں دروشم دیگ ءُ شر ترین ءَ شر تر ءِ شوھاز ءَ زانتکارانی کمک اَنت ۔زانشت کسی پتمال نئے اِنت یک کْوچگی شوانگے ھم زند ءِ راز ءُ روِش ءَ زانت کنت ءُ المی نہ اِنت کہ واشنگٹن ءَ ودی بیوکیں ھمک چک زانتکار بہ بیت ۔بلے ازم یک انچیں چی یے کہ ھیل گرگ لوڑٹ اِیت ، ھیل گرگ ءِ سیادی گوں گندگ ءَ اِنت ۔’’ زانشت ‘‘ ءِ تجربہ گاہ انسان ءِ کوپگاں ایریں کانپول اِنت بلے پہ ازمکاری ءَ ازباب پکار بیت ۔اگاں اے درسیں ھبرگیچ ءُ نچین بہ بنت آسر ھمیش اِنت کہ ’’ ازم ھرچ دروشم ءَ زانشت ءِ پدر کنگ ءِ سبب اِنت۔‘‘لیکواں گال ءُ گامگیجی جامگ ( عملی جامہ ) گْور ءَ دیگ ءِ ازم ءَ نا آژناگیں مردم ءَ زانتکار گْوشگ مشکل اِنت ۔
زانشت بہ گند ئے بندیگ کنگ مہ بیت بلے ھنرمندی ءِ راہ ءُ در بند کنگ ءُ پہ آئی ءَ درکاریں ازباباں دگرانی دزرس گَٹ ءُ مشکل کنگ بیت ۔زوراک ءِ ازمی ادارہ یکے وھد ءَ دوکار کن اَنت ۔ چَہ چیردستیں راج ءَ پچ گیپتگیں مڈیاں زوراک ٹک ءِ دیمروی ءُ آسیدگی ءَ کارمرد کن اَنت ءُ دومی انچیں مرد م چَہ نوکیں ازم ءَ دور دارگ بنت کہ آھانی زورگریں شَورانی نہ منوک اَنت ۔پمیشکا ایردستیں نودربر زانشت ءِ بالاد( عروج ) یا راستی ءَ رسگ ءَ ابید ھم ھنر مند جوڑ نہ بنت ۔ زوراک ءِ بندبست ءِ تہ ءَ چوشیں زانتکار ماں آرت ءِ تہ ءَ واد ءِ کچ ءَ بنت کہ زانشتی ھساب ءَ سرگْرستگ ءُ ھنرمندی ءَ اُستاد بنت ءُ اے کسانیں ٹکءِ گیشتر مردم ھم زورا ک ءِ بستگیں جولاں گْرینگ ءَ لاچار بنت۔
اے جاور ءِ تہ ءَ چَہ ایردستاں ھما ٹک کہ اے جاور ءَ جوانیں بن کارست ( بامرد ۔ ھیرو) ءِ بستار دار اِیت ءُ دومی بدیں بن کارست ( ولن ) ءِ پروش دیگ ءَ آئی ءِ جوڑ کرتگیں بندبست ءَ کمے گستا اُوشت اِیت ءُ آئی ءِ بدل یاھلاس کنگ ءِ جھد کنت ۔آسرتاسر ولگْوج کنوکیں واکے ءِ پیم ءَ اُرش نہ کنت بلکیں کم کم ءَ زوراک ءِ جوڑ کرتگیں بندبست ءِ تہ ءَ ایر دنت ۔آ پہ بندبست ءَ نپت ءِ بستار داروکیں ’’ روبٹک انسانانی ‘‘ کہ آھانی سیادی ھم گوں ایردستاں بیت ، بدل کنگ ءَ زوراک ءِ ھمبندے ءَ ھیلکاری ادارہ ( اسکول ) جوڑ کنت ۔ایردستیں جھدکار چَہ زوراک ءِ تکنیکی ادا رھاں سوت مند بیان وتی زانشت ءَ کارمر د کنت ۔اے کار چاگرد ءِ تہ ءَ چَہ گْوستگیں دھکانی اے تجربھاں پد بنا بوگ لوٹ اِیت کہ چے پیم ایردستیں جھدکاراں پہ نازانتکاری تکنیکی ( ازمی ) ھیلکاری ادارہ ایر جتگ ءُ چر آھاں وتی نودر بردلچل کرتگ اَنت پمیشکا نوں آ چَہ ھنرمندی ءَ زِبھر ءُ پہ چاگردی گھبودءَ جوانکاریگ نہ اَنت ۔کتہ کارءُ ھیل گیپتگیں جنگولانی دیم ءَ ھیل نہ زرتگیں چَہ جنگی ازم ءَ نابلدیں مردم اگاں ھساب ءَ گیشتر ھم بہ بنت جنگ دات نہ کن اَنت، اے دپتر ی درونت ( سبق )اِنت ، نہ پہجنگانی کٹگ ءَ ایوک ءَ سرمچاری درد وار ت۔
ایردستانی اسکول زانشتی بنیاد ءَ جوڑ کنگ بنت آھاں انچیں پیراسائٹ سرپد بہ بئے اِت کہ زوراک ءِ ازمی اسکولانی زنڈیں بنڈ ءِ سر ءَ روتگ جن اَنت ۔ایر دستانی جھدکاریں ٹک ( آشوبی گل ۔ ٹک ءَ اگاں زانشتی ءُ ازمی بودشت بہ بیت ’’ گل ‘‘ جوڑ کنت)اے رنگیں اسکول مزنشانیں ماڑیانی تہ ءَ جوڑ نہ کنت ، منی ھیال ءَ اے ھبر پہ البر ٹ آئن اسٹائن ءَ گْوشگ بوتگ کہ ’’ آئی ءِ تجربگاہ کوپگانی سر ءَ لڈ اِتگ کہ آئی ءَ بڈءَ اِنت تر اِیت ۔‘‘ھمے پیم ایردستیں جھدکارانی اسکول ھریک جھدکارے ءِ کوپگانی میار اِنت ۔جھدکار وتی زانتکاری ءِ سبب ءَ زوراک ءِ پندلاں سرپد بیت آئی ءِ آشوبی گل آئی ءَ تکنیکی ھیلکاری دنت کہ چر آئی ءَ آوتی زانشت ءَ دومی ءَ سر کنگ دربارت ۔جھدکار ھما وھد ءَ جھدکار گْوشگ کرز اِیت کہ وتی ھیالاں زانشتی ءُ سائنسی رنگ ءَ دومیءَ سرکنگ ءُ آھاں زوراک ءِ پروش دیگ ءِ جنگ ءَ ھمراھداری ءَ ساڑی کنت ۔جھدکار وتی بازپھناتیں جنگ ءَ ھرجاہ دژمن ( زوراک ) ءِ سوتاں تاوان کنگ ءُ آئی ءِ انگیر کنگ ءِ راہ ءُ در شوھاز کنگ ءَ پد آھاں سائنسی رنگ ءَ کاربند اِیت ، آ ایوک وتی آشوبی ھیالاں رومست نہ کنت ءُ نہ کہ بے چارءُ بچار گامگیج زوراِیتپرچا کہ آ ھمروچ گوں نوکیں تجربگاں دوچار بیت ءُ نوک نوکیں چی دربارت ءُ آئی ءَ اے ھنر ءِ دربرگ ءَ کمک کن اَنت ایردستانی ھما اسکول کہ ھریک انقلابی ءِ کوپگانی سر ءَ لڈ اِتگ ۔
برز ءَ داتگیں سوج دلگوش کرز اَنت پمیشکا جھدکار گل (وتی جوڑ کرتگیں راھبندانی پد ءَ جھدکارانی ٹک ءُ وتی سر ءَ زرتگیں کارانی ھساب ءَ ھمک جھدکار ) وتی کارکرد ءَ بے ٹپاس اِیت اگاں اے اسکول ( اسٹیڈی سرکل ۔ کہ جاروانی ھساب ءَ جوڑ کنگ بنت ، کیموفلاج کنگ ءُ پہ ھرکس ءَ پچ کنگ ھم بنت ءُ جھدکاریں زانتکارانی مجلس ( کمیٹی ) ءِ جوڑ کرتگیں راھبندانی پد ءَ چیراندرھم کنگ بنت ) شر کار کنگ ءَ اَنت گڑا جْوان اگاں نا ں سجھیں زور جنگ ءِ سر ءَ ءُ چَہ اسکول ءَ بیزاری ءِ روِش ردوم زورگ ءَ اِنت گڑا باندءَ ’’ زانتکاریں جھدکار ‘‘ پیدا بوگ مشکل بیت ۔
***
ٌparasite *.jpg)
Post a Comment