گْوستگیں روچاں ما ھمے نسیلیانی ندارگ دیستگ کہ رسانکدر ءِ تہ ءَ جتائیں سیاسی گلانی باسک جاہ ء ایش کہ زورگریں پاکستان ءَ بہ ڈوبار اَنت یک دومی ءِ پُچکاں بیتگ اَنت ءُ چہ ایشی ءَ بازکس دلپروش بیتگ ءُ بلوچءِ راہ ءُ منزل مجاں اندیم کرتگ ، نی کہ اے یکجائی ءِ گپ بیگ ءَ اِنت اے ھمے تھاریں راہ ءَ رژنائی ءِ ڈیوایے بوت کنت ۔
البت اے چارگ لوٹ اِیت کہ ھم سنتّی ءِ بن ھشت چوں ایرکنگ بیت ، گْوستگیں ردیانی سر ءَ کئےءَ اُگدہ گون بیت کہ چمشانک بہ دنت ءُ کئے اَنیگیں نزوریاں پیش دار اِیت ؟؟ باید وَ ھمیش اِنت کہ ھریکے وت وتی پولنگاں بہ شود اِیتءُ اے چار ءُ گزار گوں سیاسی نگاھاں بہ بیت ۔
آیوکیں روچ نا ایوک پہ بلوچاں ترند اَنت بلکیں مئے دمگ ءِ جاور گوں تیزی ءَ جنگ ءُ بے تاھیریانی نیمگ ءَ جنزگ ءَ اَنت ، اے جاوراں بلوچ ھما وھد ءَ بئے کنگ بیت کہ بلوچ وتی توان ءُ بودشت ءَ بہ منارین اِیت ءُ جھان ءُ دمگی ڈیھ اے بہ گند اَنت کہ بلوچ ’راجی بستار‘ءَ یک راہ ءُ یک گپ اِنت ۔
بلے پہ سیاسی گلاں اے آسانیں کارے نہ اِنت کہ آگوں وتی جتائیں لیکہ ءُ گوں جتائیں راھشوناں یکیں پتر ءِ سر ءَ یک راہ ءُ یک گپ بہ بَہ اَنت۔ گْوستگیں روچاں ’بلوچ راجی سنگر‘(بلوچ نیشنل پرنٹ)ھم پمیشکا پْرشتگ کہ ’سیاسی سنّت ‘سیاسی پارٹی یے ءِ رنگ ءَ کارگرگ بیتگ ،ھمک روچ پہ سیاسی دْرشانانی شنگ کنگ ءَ برے یکے ءِ ایرجنگ ءُ دگرے ءِ ستا دیگ ءَ ۔ پرنٹ پہ اے کار ءَ جوڑ نہ بیتگ اَت بلے پرنٹ ءِ تہ ءَ ھواریں یک مردمی پارٹیانی سروکاں پرنٹ ءِ واگ وتی دست ءَ آؤرتگ ءُ وتی ھُل ءُ واھگانی پد ءَ آ دگہ گلانی باسک کار بستگ اَنت ۔
بلوچ سیاسی گل کہ وت نوک بیتگ اَنت ، آیانی سیاسی کارکن پھتو ءُ زانتکار نہ بیتگ اَنت ۔المی اَت کہ پارٹی ءِ تہ ءَ اَنچیں نیاد ءُ مراگش بہ بوتیں داں سیاسی کارکناں سیاسی رپک ءُ راہ ھیل بہ گیپتین اَنت ۔ پارٹی ءِ تھی گچینکاریانی بیگ ءَ لھتے گچینی راھشون دیم ءَ اَتکگ اَت بلے چہ پرنٹ ءِ نام ءَ ھمروچ بیتگیں بے سیتیں مراگش ءُ مُچیاں پہ پارٹی ءِ تھی کاراں سیاسی کارکناں وھد نہ رس اِتگ پد ءَ لھتے راھشون ءُ مردماں کہ آ ’پرنٹ‘ءِ تہ ءَ ھوار نہ بیتگ اَنت ھم ’پرنٹ‘ءِ تہ ءَ مردم داشتگ ءُ گلانی باسک چہ وتی بُنجل ءَ سستگ اَنت ۔ آیانی سنچ ءَ اے گپ نندارینتگ کہ ’پرنٹ‘چہ درساں دیم ءَ اِنت چہ ایشی ءَ پارٹی نزور تر اِتگ اَنت ءُ چہ آیانی نزوری ءَ پرنٹ ءَ سان زرتگ ، اگاں پارٹی مُھر بوتین اَنت ، مُھریں پارٹیانی’سنّت‘ھم مُھر بیتگ اَت ۔اگاں پارٹیانی باسک سیاسی سنچ داروک ءُ دیرچار بوتین اَنت آیاں پرنٹ پْرشگ ءَ نہ اِشتگ اَت ۔
نی کہ ھژدہ نومبر ءَ یک رندے پد ءَ بلوچ راھشون نندگ ءَ اَنت آ اے درسیں چیزاں وتی دیم ءَ ایر بہ کن اَنت ۔ آ یاں سما بہ بیت ءُ بہ من اَنت کہ آ جتائیں لیکو ءُ ٹکانی مردم اَنت ۔آیاں منگی اِنت کہ آیانی لھتے سیت گوں یک دومی ءِ سیتاں یک نہ اَنت ءُ ھرکس ءَ اے اُگبال دیگ بہ بیت کہ آراجی سیتانی تہ ءَ وتی سیتاں ھم بہ پھریز اِیت۔ ما وتی راجی سیتانی ساڑا ءَ چوش مہ کن اِیں کہ آئی ءِ تہ ءَ گل یا ٹکے ءِ چاگردی سیت گون مہ بہ اَنت ۔ مئے درسانی سیتانی ھواری راجی سیت بہ بیت ھمے سیاست ’راجدوستیں سیاست ‘گْوشگ بیت ۔
اگاں گْوستگیں رنگ ءَ اے نوکیں سنّت ءِ واگ ھم لھتے مردمانی دست ءَ دیگ بیت ءُ آیاں اے پہ وتی سیتاں کارمرد کرت گڑا بزاں پد ءَ پْرش اِیت ۔ مردم چہ وتی کتہ کاریاں در بارت یک کارے کہ ماکرتگ مئے بے سوبی ءَ ھم مارا شون داتگ کہ ما چوں بے سوب بیتگ اِیں ءُ پد ءَ ھما کار ءَ ھما رنگ ءَ بہ کن اِیں گڑا بزاں کہ مارا ھوش ءَ دیم داتگ ، بے سوبیں کاراں ھزار رند ءَ بہ کن اِیں آیانی آسر بے سوبی اِنت ۔ باید اے نوکیں ’راجی سنّت‘ءِ واکداری یک ھواریں ’پتّرے‘ ءَ دیگ بہ بیت کہ آئی ءِ تہ ءَ چہ درسیں گلاں جھگیر گون بہ بیت ۔ اے واکداریانی تہ ءَ آمید ھما وھد ءَ آرگ بیت کہ ھمک گل ءَ ’ویٹوپاؤر ‘ گون بیت ۔اے المی بہ بیت کہ ’راجی سنّت‘ ءِ شور انی سر ءَ ھمک پارٹی ءِ بنجل ھم تپاک ءُ پت بہ بہ اَنت ، ھمے کار اشتاپی ءَ بوت نہ کنت ۔ اے کار مئے راھشونانی بودشت ءُ اُوپار ءَ چکاس اِیت آیاں سوج دنت کہ چوں وتی واھگ گستا کنگ ءُ راجی سیتانی ھمراھداری کنگ بیت ۔
چوش کہ انیگیں راجدوستیں پارٹی ءُ راھشون اَنت ، جتائیں کچ ءُ کساس ءِ تہ ءَ اَنت ۔ ایشانی میان ءَ برابری نیست ۔ دوبرابریں گلانی میان ءَ تپاکی برابری ءِ بنیاد ءَ آسان تر اِنت بلے گوں جتائیں زور ءُ کساس ءِ گلانی میان ءَ یکجائی گْران اِنت ۔ ما گندگ ءَ اِیں کہ اد ءَ دہ ءُ بیست مردم ھم یک گلے ءِ دْروشمءَ اَنت ءُ چوشیں پارٹی ھم ھست کہ آیاں جھان ءِ کنڈ کنڈ ءَ باسک ءُ پلہ مرز ھست ۔ آیانی وتی ’تْرامدگ‘(ادارہ)سیاسی بنیادءَ شرتر اَنت آیانی سیاسی کیڈرانی سیاسی سنچ چہ کھولی ءُ ٹکی سروکاں گیشتر اِنت اگاں آیانی سر ءَ ’سنّت‘ءِ ھمک شَور مُشگ بہ بیت اے پہ بلوچ راج ءَ تاوان بوت کنت ۔ اگاں ھمے گل مروچی راجی سیتاں سرگْوز بہ کن اَنتءُ نابرابریں سیاسی سنّت ءِ بھر مہ بہ اَنت ، اے ھم ٹوھیں تاوانے ۔ اے جاوراں میانی راہ ھمیش اِنت کہ ’سنّت‘ءِ تہ ءِ کسان ءُ مزن درسیں پارٹیاں برابری ءِ بنیاد ءَ جاہ دیگ بہ بیت بلے ’سنّت‘ءِ شورانی سر ءَ پارٹیانی تپاکی ھم المی بہ بیت ۔
اے سنّت پہ ھمر وچی ئیں دْرشان دیگ ءُ زھرشانی ءَ مہ بیت بلکیں بانداتءِ بلوچستان ءُ مروچیگیں بلوچ سیاست ءِ لوٹاں بہ چار اِیت ۔ مارا یک انچیں وشیں سیاسی چاگردے پکار اِنت کہ ھمے سیاسی چاگردءِ تہ ءَ ما وت ماں وت گپ ھم بہ جن اِیں ، شرگداری کنوک گوں آجوئی ءَ شرگداری ھم کرت بہ کن اَنت ءُ مئے نزیکی گوں مئے جتائیں دیدانکانی پجیگ ءَ بہ بیت ۔ انچیں چاگردے پہ آجوئیں بلوچستان ءَ پیم کنگ المی اِنت کہ آزاتیں بلوچستان ءِ زمہ واریاں وتی کوپگاں زرت بہ کنت ، آ بلوچستان کہ چہ ٹکی ءُ گلی کینگ ءُ کستاں ھم آجوبہ بیت ءُ پُر ایمن ءُ مھرچکاریں بلوچستانے بہ بیت ۔ آ چاگرد ءِ تہ ءَ سیاسی کارکن سیاست کنگ ھم بہ زان اَنت ءُ وتی راجی سیتاں ھم بہ ماراَنت ۔
اے ’سنّت ‘ پہ یک لیکوءُ دیدانکے ءِ بالادستی ءَ مہ بیت ۔ ھما گپانی سر ءَ کہ ما تپاک نہ اِیں زور دیگ ءِ جاہ ءَ ھما گپانی سر ءَ گیشتر دلگوش گْور بہ کن اِیں کہ ما تپاکی دار اِیں ۔ جتائیں دیدانکانی سر ءَ لس مردماں موہ دیگ بہ بیت کہ آ چہ ھمیشاں گچین بہ کن اَنت ءُ اے سکیں وشیں گپے کہ بلوچ راجی سیاست ءِ گردءَ گرد جتائیں دیدانک ، لیکو ءُ راھبند ھست ، راہ جتا اَنت بلے منزل یک اِنت ءُ پہ ما ھمیشی ءِ اَرزش ، بلوچ آجوئی ءِ ارزش ءُ آجوئیں بلوچ ڈیھ ءُ راج ءِ سیتانی زانگ المی اِنت ۔
اگاں کسے ھمے واھگ ءِ پد ءَ یکجائی لوٹ اِیت کہ آئی ءِ جوڑ کرتگیں دیدانکءُ آئی ءِ ایرکرتگیں ڈک ءُ بند منگ بہ اَنت ءُ کسے کہ آیاں نہ من اِیت آ تپاکی ءِ نمنوگر لیکگ بہ بیت، گند ءُ نند باید گوں بے ڈک ءُ بنداں بہ بیت ءُ ڈک ءُ بندانی جاہ ءَ لھتے راہ ءُ راھبند یکجائی ءَ جوڑ کنگ بہ بیت ءُ اگاں یکجائیں مسام بندی یے بوت کنت آ گوں وت ماں وتی سوڑگ ءَ بہ بیت ۔ اگاں ڈک ءُ بند پیش ءَ ایر کنگ بوت اَنت گڑا تپاکی ءِ راہ ءِ مستریں ڈنگر ھمیش بیت ۔
پہ یکجائیءَ ’نیک نیتی ‘ءِ لوٹ کنگ ءِ جاہ ءَ بلوچ راھشون باید وتی سیاسی سیتانی سر ءَ ، چاگردی ءُ زمینی لوٹانی سر ءَ سیاسی بنیاد ءَ تْران بہ کن اَنت ءُ چہ ھمے تْران ءَ رس اِتگیں تھماری (ادراک) ءِ راھشونی ءَ گامگیج بہ زیر اَنت ءُ اگاں چوش بہ بیت بلوچ یک شول زندیں سیاسی ءُ راجی سنّتے ءِ جوڑ کنگ ءَ الم سوبین بہ اَنت ءُ چہ آئی ءَ بلوچ ءِ منزل نزیک تر ءُ راہ آسان تر بیت ۔
___ ا♪ اگاں شما اے نبشتانک ءَ منی توار ءَ گوش دارگ لوٹ اِت ، گڑا جھل ءِ بٹن ءَ دزمرز اِت۔
شما ایشی ءَ چہ جھل ءِ لنک ءَ ایرگیپت ھم کن اِت 👇
.jpg)
Post a Comment