" درسیں دلوت برابر اَنت بلے لھتے دلوت چَہ آ دگراں گیشتر برابر اِنت. "
آشوب ءَ پد پاکیں دیوال ءَ نبشتگیں آشوب ءِ پاکیں راھبند گوں اَنچیں رِپکے  ءَ  مَٹ کنگ بوت اَنت کہ پَشت کپتگیں پیر ءُ نزوریں آشوبکار ھم دو دلگ بوت اَنت کہ باریں راھبند مَٹ بیتگ اَنت یا آیانی یاداشت کُنٹ بیتگ.

پشت پتگیں پیریں مادیانیں اَپس کلور ءُ شادی بنجامین،  ھمے پاکیں دیوال ءِ دیم ءَ  اوشتاتگ ءُ مونجان اَت اَنت. آ  پہ وتی کامریڈ باکسر ءَ  ھم پُرسیگ اَت اَنت کہ آ ھم وتی زمانگ ءِ زورمندیں اپسے اَت،  پھکدل ءُ ستکیں آشوبکار کہ پہ دلوتکدگ ءِ گھبود ءُ آئی ءِ سیت ءَ دائم کار ئِے کرتگ اَت
ـ
چَہ درساں گیشتر کار،  آئی ءِ اوگام اَت " من سَک کار کن آں " ءُ " نپولین راست گْوش اِیت. " نپولین دلوتکدگ ءِ مھتر ءُ آشوب ءِ سروگان اَت،  ھما آشوب کہ آئی ءِ واب میجر نامیں ھیکے (لدیگ) ءَ دیست ءُ یک وھیلے ءِ انگیز ءَ اسنوبال ءُ نپولین ءِ سروگانی ءَ پیلو بوت بلے آشوبی راھشوناں آشوبی راھبند لگتمال کرت اَنت.

. داستان ءِ گڈسر ءَ دلوتکدگ پہ دلوتاں آسیدگ ءُ پُرتاھیریں جاھے نہ منت بلکیں پہ زور مُزدوری گرگ ءِ زندانے جوڑ بوت، ھما رَلی ءُ ھما  کتو. مٹ بیتگیں چیز تیوک ءَ اِیش اَت کہ پیش ءَ جونز آیانی واجہ اَت ءُ نی نپولین.

اے  جارج آرویل ءِ گدار ءِ داستان اِنت کہ آئی ءَ ماں انگریزی زبان ءَ " اینمل فارم " ءِ نام ءَ نبشتگ.  اے گدار کمیونسٹ آشوب ءِ سر ءَ تژنے. جارج ءِ گدار نبیسی ءِ رِپک نوک نہ اَت بلے آئی ءَ وتی کارستانی چھربندگ ءَ شیواری پیش داشتگ،  آئی ءِ وانگ ءَ زیک بہ گند ئے یک " کمیونسٹے " ءِ مورک کرچک بیتگ،  جارج آرویل ءِ گپ زَردارانی پروپیگنڈہ من اِتگ ءُ بد ئِے بُرتگ بلے مروچی آئی ءِ شرگداری ءَ آشوبی راھشونانی بازیں نزوری پدر کرتگ .گدار ءِ بنگپ " بائیوارینک " ( کمیونزم) اِنت بلے ما ایشی ءَ ھمک آشوبی لیکوانی پُژدر ءَ چار اِت کن اِیں یا وانگ وانگ ءَ سما بیت کہ ما اے کارست چَہ " دلوَتکدگ " ءَ ڈن ھم دیستگ اَنت.

اے گدار، سویت سنّت (1922) ءِ جوڑ ءِ بیگ ءَ پد 17 اگست 1945 ءَ نبیسگ بیتگ،   اے سویت یونین ءِ میانجین ءِ زمانگ اَت. آرویل ءِ اے گدار آ زمانگ ءَ پہ زردارینکی (سرمایہ داریت) ءِ منوکاں شریں اَبزارے اَت. آیاں پہ ایشی ءِ شنگ ءُ تالانی ءَ ھدوناکی پیش کرت بلے چوش ھم نہ اَت کہ آیاں آرویل ءِ سرجمیں نبشت دوست بیتگ اَت.یکے وَ اِیشی ءِ نام اِنت کہ آرویل ءَ  "
Animal Farm A Fairy Story
( دلوتکدگ،  پرستانی داستانے )  ایر کرتگ اَت ، چَہ ایشی ءِ نام ءِ دیم ءَ " پرستانی داستانے " دیر کنگ بوت آیاں گْوشت؛ گوں اے نام ءَ گُمان بیت کہ اے پہ زھگاں نبیسگ بیتگ.

  1945 ءِ چاپ ءَ اے گپ دُور کنگ بوت کہ کپوت جونز ءُ آئی ءِ مردمانی سر ءَ گیت دَور دئے اَنت.

آرویل ءِ اے گدار چَہ پُربھائیں نسکاں یکے اَت، 1945 ءَ ایشی ءَ W.H Smith ءُ Penguin Books ءِ Century Award رس اِت.ایشی ءِ تہ ءَ چیزی مَٹی شونکار ءُ شنگکاراں کرت ءُ چیزے آرویل ءِ جند ءَ.

1945 ءَ آرویل آبزرور ءُ مانچسٹرایوننگ نیوز ءِ جھگیر ءِ بستار ءَ پیرس ءَ اَت. آ اُود ءَ گوں Joseph Czapski ءَ دوچار کپت کہ چَہ روسی کیمپ ءَ تتکگ ءُ اَتکگ اَت.آ کہ چَہ روسی راھشوناں شیزار اَت ھم  آئی ءَ آرویل ءِ دیم ءَ اسٹالن ءِ اے درگت ءَ ستا کرت کہ آئی ءَ گوں مزن جگری ءَ روس چَہ جرمنی ءِ گیشواھی ءَ پھز اِت. آ وھد ءَ اسٹالن ماسکو ءَ اَت کہ جرمنی ءَ تو بہ گْوش روس گیپتگ اَت بلے اسٹالن ءِ کرد ءُ توانمندی اَت کہ آئی ءَ روس چَہ اے جاور ءَ پھز اِت.گوں جوسِیپ ءَ گند ءُ گدار ءَ پد آرویل ءَ وتی چاپکار ءَ نبشت کہ آ گدار ءِ نکان ءَ واتر بہ کنت داں آ ھشتمی در ءِ تہ ءَ مٹی آرت بہ کنت " درسیں دلوت زمین ءَ کپت اَنت اَبید چَہ نپولین ءَ "،  اے مَٹی ءِ درگت ءَ آئی ءَ نبشتگ: " اسٹالن ءَ اے کرز اِتگ پرچا کہ جرمنی ءِ پیشگامی ءِ پاساں آئی ءَ ماسکو یلو نہ دات. "

ھشتمی در ءِ ندارگ ءَ " نپولین " آشوب ءِ تھی جیڑگانی بُنگوج کنگ ءَ پد دلوتکدگ ءِ دری کارانی نیمگ ءَ دلگوش ءَ گْور کنت. چَہ ایشی ءَ پیش نپولین ءَ وتی پنھان ءُ سھرائیں بگیردار مَرگ ءِ ڈند داتگ اَت اَنت.

نی آئی ءَ پہ دلوتکدگ ءَ " گواتوئیں مِل " ءِ نیم بُندگیں کار ءَ مَڈی پکار اَت،  پہ ایشی ءَ  آئی ءَ وتی آشوبی راھبند ھَنٹ کرت اَنت ءُ سرگْوز بوت،  گوں وتی ھمساھگیں کدَگاں باپاری سیادی ٹاھینگ ءَ وائمپر نامی مردمے داشت. دلوتکدگ ءِ باپاری سیتاں نپ زیرگ ءَ دگہ ھمساھگ ھم ھدوناک اَت اَنت بلے گُڈی ءَ نپولین ءَ گوں پریڈرِک نامیں مردمے ءَ دلوتکدگ ءِ دارانی سودا جَت،  آئی ءَ دار بُرت اَنت ءُ آئی ءِ مَٹ ءَ زر دات بلےرند ءَ زانگ بوت کہ آ زر کُٹیں زر اَت اَنت ءُ ھمے گپ ءَ دوئیں کدگ وت ماں وت نسیلی ءَ شُت اَنت ءُ پریڈرِک ءَ دلوتکدگ ءِ سر ءَ اُرش کرت .

ھما گواتوئیں مِل کہ گوں مزنی‍ں  دلسیاھی یے ءَ دلوت ءَ جوڑ کرتگ اَت گوں تراکناکاں ڈرینت،  ھمد ءَ ندارگے ھست " گوشانی پردگاں سندوکیں تْراکے بوت.کپوتاں ماں آزمان ءَ بال کرت  آ دگہ درسیں دلوت گوں نپولین ءِ پجیگ ءَ دیم پہ چیر وپت اَنت ءُ وتی دیم اِش چیر دات. "

سید علاؤالدین ءِ اُردو رَجانک اَنچوش اِنت کہ  سٹی بُک پوائنٹ، اُردو بازار کراچی ءَ شنگ کرتگ.

بلے آرویل ءَ لوٹ اِتگ کہ اَبید چَہ نپولین ءَ آ دگہ درسیں دلوت شکین دیم پیش کنگ بہ بَہ اَنت،آئی ءِ مٹ کرتگیں گالرد اَت :  " درس ڈگار ءَ کپتگ اَت اَنت اَبید چَہ نپولین ءَ ."

دلوتکدگ ءِ کارل مارکس ءِ نام ولنگڈن بیوٹی اَت بلے آ میجر ءِ نام ءَ نامدار اَت،  میجر سگاریں ھیکے اَت، آئی ءَ دلوتانی آشوب ءِ بُنکی لیکو پیش کرت ءُ پہ آیاں آشوبی ترَانَگے گْوشت.بلے میجر ءَ ھمے ٹاہ دات کہ اے باھندکاریں لَچہ آئی ءِ پربند نہ اِنت بلکیں چَہ بیھ ءُ بُندر ءَ دلوتانی لچہ اِنت کہ آئی ءَ چَہ وتی پیریناں اِش کرتگ،  آ اِیشی ءِ گال ءُ آھنگ ءَ شموشتگ اَت بلے ماں واب ءَ آئی ءَ ھمے لچہ ءُ آھنگ اِش کنگ ءَ پد یاداشت کرت. وتی زند ءِ گُڈی تران ءِ تہ ءَ آئی ءَ ھمے تَرَانَگ دلوتاں سوج دات،  ھمے دلوتکدگ ءِ آشوبی تَرَانگ جوڑ بوت.

انگلستان ءِ زورواھیں رستراں
درسیں ھَلکانی رستراں
منی پُر شاتیں مُژدَگ ءَ گوش دار اِت
شریں روچانی مُژدگ

زیت یا دیر آ زمانگ آیگی اِنت
مردم آزار چَپی کنگ بَہ اَنت
ءُ انگلستان ءِ پُلاں سرباریں سرڈگار
گوں لدیگاں ھوار لپاشگ بیت

مئے پوزاں مانیں پوساد در کپ اِیت
مئے بَڈاں لڈ اِتگیں بار اِیر کپ اِیت
لگام ءُ کوتل پہ مدامی بے پَد بَہ اَنت
چابک جنوکیں زوراک، جَت نہ کن اَنت
ھزگاریں زرداراں جیڑگ لوٹ اِیت کہ
گندیم، جو،  اسپوست ءُ کڑب
کاہ،  لوبیا ءُ دگہ دَھل
آ روچی درس مئے بَہ اَنت

انگلستان ءِ سرڈگار  دْرپش اِیت
ایشی ءِ آپ پلگار ءُ شیشار بیت
گوات  وشیں کْوش بَہ اَنت ءُ کش اَنت
آ روچی ما درس آجو بَہ اِیں

پہ ھما روچ ءَ ما درس کوشست کن اِیں
توری داں آ روچ ءِ آیگ ءَ ما درس مرتگ بہ بَہ اِیں
گوک،  اَپس، بَٹ ءُ ککڑ
پہ آجوئی ءَ درس  باز دلسیاھی کش اَنت ءُ کار کن اَنت

انگلستان ءِ اھریمناں (شیتان)،  آئرلینڈ ءِ لدیگاں
درسیں ھلکانی رستراں
منی گپاں دلگوش کن اِت،  اے مُژدگ ءَ تالان کن اِت
آیوکیں روچانی براھداریں مُژدگ

اے آشوبی لچہ ءِ سوج دیگ ءِ چارمی روچ ءَ میجر بیران بوت. بلے آئی ءِ لیکو ءُ باھندکاریں لچہ ءَ دلوتانی تہ ءَ جوش ودی کرت آیاں چَہ میجر ءَ پد ھم چَہ آشوب آرگ ءِ کوشست ءَ دست نہ کش اِت. دو جنگلی ھیک اسنوبال ءُ نپولین ءَ آشوب ءِ زمہ واری وتی کوپگاں زرت  آیانی پنھانیں دیوان ءُ سوڑگ برجاہ بوت اَنت چَہ دوئیناں اَبید میجر ءِ لیکواں  تْرامیں کیامے ءَ رَجینگ ءَ اسکیولر نامیں ھیکے ءِ ھم سَھرائیں کردے اَت.

آ چَہ سما ءُ سِنچ ءَ پہ آشوب ءَ ساڑی اَت اَنت بلے آیاں پہ جنگ ءُ زور آشوب آرگ ءَ ھچ سوج ءُ شَور نہ کرتگ اَت،  بلے دلوتکدگ ءِ واھند " جونز " کہ یک نشھی، ٹپُّر ءُ بے پروائیں مردے اَت آ چَہ دلوتانی ورگ دیگ ءَ شموشت شدیگیں دلوتاں وتی واڑ ءُ پل پْروشت اَنت ءُ سِر ءُ کپ اِش بنا کرت پہ راستی اے پہ آشوب ءَ باھندے نہ اَت بلے وھدے کہ جونز ءُ آئی ءِ کارمند آیاں گوں لٹاں چیر کپت اَنت،  اے رندی آیاں اُوپار نہ کرت ءُ دیم پہ دیم بوت اَنت پہ جونز ءَ اَبید چَہ دلوتکدگ ءَ تچگ ءَ دگہ راہ نہ منت.

اے پیم دلوتکدگ آشوب بوت،  میجر ءِ لیکوانی پد ءَ آشوبی راھبند پرینگ بوت اَنت.

چَہ آشوب ءَ پد اسکیولر ءَ آ دگہ راھشونانی شور ءُ سوج ءَ دلوتانک (اینملزم) ءِ بُنکی ھپت راھبند،  مزنیں دیوالے ءِ سر ءَ نبیس اَت اَنت،  کوھنیں نام " جاگیرکدگ " کور کرت ءُ نوکیں نام نبشت.

دلوتکدگ

1:  جاور ھرچی بِہ بَہ اَنت دو پادانی سر ءَرووک دژمن اِنت.

2:جاور ھرچی بِہ بَہ اَنت، چارپاد یا بانزُل دار دوست اَنت.

3: ھچ دلوت گُد گْور ءَ نہ کنت.

4: ھچ دلوت نپادانی سر ءَ نہ وپس اِیت.

5: ھچ دلوت شراب نہ وارت.

6: ھچ دلوت دومی ءَ نہ کُش اِیت.

7: درسیں دلوت برابر اَنت.

بلے پہ دلوتکدگ ءِ جاھمننداں آشوب ءِ وشیں روچ پہ اَدارُکی چَھم اِت ءُ پد ءَ ھما تھاریں ءُ گر ءُ چیلیں زندمانی بنا بوت.

بنجامین، کلور، ھمے دیوال نبشتاں گوں ملوریں دلے چارگ ءَ اَت اَنت کہ مَٹ بیتگ اَت اَنت،  نپولین ءُ جونز ءِ میان ءَ ھمے دگری منتگ اَت کہ نپولین دلوت ءُ ھیکے اَت ءُ جونز مردمے. نپولین ریپینگ ءَ بلد اَت،آ وتی کدگ ءِ ھمک ھیرت ءُ کسانیں چیز ءَ دلگوش اَت.آ میارانی پَھِل کنوکے نہ اَت. مولی نامیں اسپیتیں مادیانیں اَپس ءِ میار اِش اَت کہ آئی ءَ گُٹ بند دوست بیتگ اَت،  آئی ءَ آشوب ءِ ھمراھداری کرت بلے چَہ گُٹبند ءِ دوستی ءَ دل ئِے شُشت نہ کرت،  اے آشوبی راھبندانی سَیمی بند ءِ پُروشگ اَت،  مولی زیت پدر  بوت ءُ چَہ پاشک بیگ ءَ پد بیگواہ بوت، کس نہ زانت کج ءَ شُت.

بنجامین ءَ سما اَت کہ راھبند پہ رِپک ءُ زوراکی مَٹ کنگ بیتگ اَنت. رِپک اِیش اَت کہ راھبند ءَ  نبشتگ اَت کہ" دلوت دومی دلوت ءَ نہ کُش اِیت " بلے اسنوبال ءِ پلہ مرزی ءِ بھتام ءَ بازیں دلوت کُشگ بوت.

دلوتکدگ ءَ سُک سُک بوت کہ راھبند پُروشگ بیتگ بلے اسکیولر ءَ کہ نپولین ءِ ھم پَت ءُ آئی ءِ پرمانانی راہ پرینوک جوڑ بیتگ اَت،  درس آشا کرت اَنت کہ چوشیں راھبند بِھ نہ بیتگ. آیاں لھتے راھبند چَہ بُن ءَ نہ من اِت ءُ لھتیانی تہ ءَ مَٹی آرت چوش کہ: " ھچ دلوت دومی ءَ ابید چَہ انگیزے ءَ نہ کُش اِیت. "،  ءُ لھتے دلوت نپولین کشتگ پمیشکا کہ آ رد آشوبی یے اَت اَنت ءُ اے پہ آیانی کشگ ءَ تَچکیں انگیزے اَت.

آرویل وتی گدار ءِ تہ ءَ چوش نہ گْوش اِیت کہ پرچا نپولین ءَ کامریڈ اسنوبال رد کرتگ ءُ آئی ءِ گواتوئیں مِل جوڑ کنگ ءِ شور ءِ سر ءَ آئی ءِ دژمن بیتگ ءُ ماں دیوان ءَ کُچک ھمائی ءِ گْوشگ ءَ اسنوبال ءَ پِر ریتک اَنت، اے ھما کچک اَت اَنت کہ درکسانی نپولین ءَ چَہ مات ءَ سست اَنت ءُ وتی وڑ ءَ رودینت ءُ ھیلکاری دات اَنت،اسنوبال پہ ھیلت ءُ واری وتی ساہ ءِ رکینگ ءَ سوبمند بوت ءُ چَہ دلوتکدگ ءَ تَتک،  چَہ ھمد ءَ آ دلوتکدگ ءِ ردآشوبیانی سروک لیکگ بوت، چَہ ایشی ءَ پد دلوتکدگ ءِ ھمک وھیل ءِ باپشت ءَ اسنوبال ءِ نام گرگ بوت .شرتگ ءَ نیم بُندگیں نزوریں گواتوئیں مِل کپت،  اِے اسنوبال ءِ ناشرکاری لیکگ بوت داں وراک ءُ وردن کوگ ءُ کرم بوت اَنت ھم میار اسنوبال ءِ سر ءَ لڈگ بوت.

گدار ءِ تہ ءَ آشوبیانی میان ءَ دگری ودی بوت،  جھل بُرزی ءُ ٹکبندی .ھیک چَہ دگہ دلوتاں گھتریں آسراتی دیگ بوت اَنت. سورپ، شیر ءُ وانگ ءِ اُگبال پہ ھمایاں گچین کنگ بوت اَنت،  بگیردار چَہ کچکانی ترس ءَ نِگُٹ بوت اَنت ءُ ھچ گْوشت اِش  نہ کرت.

دلوتکدگ کم کم ءَ ھما جاورانی نیمگ ءَ پدکنز اِت کہ پیش ءَ بیتگ. دلوتکدگ ءِ واکداریں ھیکاں ھمک راھبند لپاشت اَنت.نپاداں وپت اَنت،  پُچ ءُ پوشاک گْور ءَ اِش کرت،  گوں مردماں سنگت بوت اَنت،  شراب اِش وارت ءُ داں اینکس کہ مردمانی پیم ءَ دو پادانی سر ءَ روگ ھم ھیل گیپت.

گڈی ندارگ، پہ آشوبکاراں ترسناک اَت،  گچین پہ بنجامین ءُ کلور. بلے اے گُڈی ندارگ ءِ نبیسگ ءَ جارج ءَ کسی پت ءَ نہ داشت.  نپولین وتی کدگ ءَ وتی ھمساھگیں کدگانی واھند لوٹائینت اَنت، مزنیں مراگشے بوت آئی ءِ ھمساھگ ءُ نامی ئیں کدگکار چَہ آیانی کدگ ءِ کار ءُ کرد ءَ وش ءُ شات بوت اَنت. آ یاں گوں مڑاہ ءُ  منگہ کدگ  دلوتکدگ ءِ نام ءَ توار کرت بلے نپولین ءَ ایراد گیپت ءُ گْوشت کہ
کدگ ءِ نام " جاگیر کدگ " توار کنگ بہ بیت کہ پیش ءَ جونز ءِ واھندی ءَ  کدگ ءِ نام اَت.

نپولین گوں وتی ھمساھگیں کدگاں سنگتی ءِ جار ءَ جنت پہ بلے ھر دو نیمگ ءَ ستک نگواہ اِیت: " دوازدہ توار چَہ زھر ءَ ککار ءَ اَت ءُ درسانی گالوار یکسان اَت. اے جست ءَ بُنے نیست کہ ھیکانی دیم ءَ چی بیتگ. ڈن ءَ اُوشتاتگیں ساھداراں مردم دیست ءُ پد ءَ ھیک، پد ءَ مردم، بلے اے گْوشگ گْران اَت کہ چَہ ایشاں ھیک کجام اِنت ءُ مردم کجام. "

داستان آسر بوت، بنجامین ءِ بے گویاکیں زانتکاری ءُ ناوانندگیں کلور ءِ پھکدلی ءُ ستک ءَ، چَہ داستان ءِ آسری در ءَ پیش آشوب ءِ پُرس داشتگ اَت.

بُنشون:اینمل فارم، جارج آرویل / رجانک: سیدعلاؤالدین