امریکی جھگیر دیوان ءِ باسک لووس گھمرٹ ءَ گوں امریکن سرکارکماش اوباما ءَ اُوگانستان جنگ ءِ درگت ءَ جستءِ میان ءَ بلوچستان ءِ آجوئی ءِ پلہ مرزی کرتگءُ تچک ءَ اے ھبر گوشتگ کہ’’ اوگانستان ءِ جیڑہ ءِ آسر کنگ ءُ پہ امریکن واھگانی سوبمندی ءَ المی اِنت کہ آزاد بلوچستان جوڑ بہ بیت۔ ‘‘چَہ لووس گھمڑٹ ءِ اے بیان ءَ اولی رند ءَ بلوچاں اے گمان بوتگ کہ نوں امریکہ ءِ تہ ءَ ھم آھاں پلہ مرز ھست۔لووس گھمرٹ ءِ بیان ءَ پد گوں سنگتے ءَ من ھمے گوشت کہ نوں بارمئے راھشونانی کوپگ ءَ اِنت آ باید اِے پلہ مرزی ءَ گیشتر ءُ پہ
بلوچاں سوتمند بہ کن اَنت۔
آئی ءِ ھیال ھمیش اَت کہ بلوچاں چوشیں راھشونے نیست کہ اے کار ءَ کرت بہ کنت بلے من گوں آئی ءَ تپاک نہ کرت ءُ گوشت :’’ راست اِنت کہ بلوچ راھشون کتابی ساڑا ءَ پیلو نہ کن اَنت بلے چَہ آھانی کردگار ءَ پدر اِنت کہ بلوچ بے راھشوننہ اَنت۔‘‘ من آئی ءَ نام گران کرت ءُ گوشت :’’ اے بلوچ ءِ راھشون اَنت ، اے سردار ءُ نواب ھم نہ اَنت بلکیں گوں ھما ٹک ءَ سیادی دار اَنت کہ نیزگار ءُ بزگانی ٹک گوشگ بیت ۔ اے ھما رَم ءُ رمب ءِ مردم اَنت کہ ھرچ زمانگ ءَ بلوچ جھد ءِ ھمراہ بوتگ اَنت اِیشاں زمانگے گوںھما کتابی ساڑا ءَ پیلو کنوکیں راھشوناں ھم گام جتگ کہ مروچی ایشاں سیاستدان ءُ راھشون منگ ءَ ساڑی نہ اَنت ۔ بلے زانت ھمے گوش اِیت کہ بلوچ جھد تاں اد ءَ بے راھشون ءُ راھدربر نئے اَتکگ ۔ھست انچیں مردم کہ آھاں اے گرانیں بار وتی کوپگ ءَ زرتگ ءُ دیم ءَ روان اَنت من ءَ باور اِنت کہ آ چَہ مئے رنگیں نابوداں گیشتر واتی راجی ذمہ واریاں سرپد اَنت ءُ شر زان اَنت کہ آئی ءَ پہ سوبمندی ءَ چی کنگ لوٹ اِیت ۔‘‘

دیر نہ گوست کہ ھال اَتک ’’ امریکہ ءَ دری کارانی کارگس ءِ نیمگ ءَ بلوچستان ءَ بیوکیں انسانی حقانی لگتمالی ءِ سر ءَ یک دیوانے لوٹائنگ بوتگ آ دیوان ءِ تہ ءَ چَہ پاکستان ءِ نیمگ ءَ بلوچانی سر ءَ بیوکیں ظلم ءُ زوراکی ءِ درگت ءَ مردم وتی گواھی ءَ دئے اَنت ۔‘‘گوں اے ھال ءِ آیگ ءَ دراجیں مدتے ءَ پد بلوچستان ءِ جیڑہ ءِ سر ءَ ھالرسناکاں دلگوش دات ۔

پہ اے کار ءَ ھما چندیں نوشتہ کارانی ھم کرد گون اِنت کہ بلوچستان ءِ جاورانی سر ءَ یکشل ءَ نویسگ ءَ اَنت ءُ نوک دیم ءَ اَتکیں رسانکدر بزاں بلاگ ءُ سوشل نیٹورکانی کمک ءَ دنیا ءَ وتی جاوراں سرپد کنگ ءَ شپ روچ دزگٹ اَنت بلے شھکرد ھما جھدکارانیگ اِنت کہ آھاں بلوچستان چَہ رُنگراھاں درکرتگ ءُ آزادی ءِ کشک ءِ سر ءَ آورتگ ، ھما ھانی کہ نوشتہ کارانی دلانی تہ ءَ اے ھبر تیجار اِش کرتگ کہ آ ظلم ءُ جبر ءَ بے مار اَنت ۔ اے ھما دیم شریتگیں بلوچ پسگانی دگانی سر ءَ کپتگیں میتانی کرد گار اِنت کہ پاکستانی واکدارانی گمان ءَ اے پہ بلوچانی دارگ ءُ نگٹ کنگ ءَ یک ڈکیں کارے ۔انچوش کہ چَہ اِے جنگ ءِ آس ءِ بالینگ ءَ پیش آھاں ھمک دیوان ءَ ھمے گپ جتگ کہ’’ آرت ءِ تہ ءَ واد ءِ کساسءَ بلوچ بِھ آکار ءَ کرت نہ کن اَنت کہ بنگالیاں کرتگ ۔اے کمیں بلوچاں اگاں پنجاپی سنگے سنگے ھم بہ جن اَنت ھما سنگانی چیر ءَ گار ءُ گمسار بنت ۔‘‘

بلے بلوچاں اے ڈاہ من اِت ءُ پنجاپی وتی کینگ ءُ کست ءِ آس ءَ انچوش ستکگکہ آنوں وتی نیک ءُ بد ءَ ھم پجاآرگ ءَ نہ اِنت ۔ پاکستانی واکداریں پنجاپیاں دنیا ءِ دیم ءَ پہ وتی سلگتانی شود ءَ اے ھبر ءِ دمب داشتگ کہ’’ بلوچ ھم پنجاپیاں کشگ ءَ اَنت پمیشکا آھانی کشگ جائز اِ نت ۔‘‘گوستگیں سال ءَ آھاں وتی باڑو ءُ بتُھانی سر ءَ لھتیں اھوالکار بلوچستان ءَ آورتگ ءُ آھاں ھمے منارینگ ءِ جھد کرتگ کہ’’ ما بلوچانی جھد ءِ ایرموشی ءَ سوبین بوتگ اِیں ءُ ھما کشت ءُ کشار ءِ کار کہ ما دست ءَ زرتگ آ انسانی حقانی لگتمالی نہ اِنتبلکیں آ کشندھانی کشگ ءِ جائز ءُ انسانی ءُ اسلامی راھبنداں ھمدپیں کارے ۔‘‘ اھوالکاراں ھم پہ وتی نگن ءِ ھلار کنگ ءَ ھمے یک نیمگ ءُ یک چمی دیستگیں ھال وتی رپورٹانی تہءَ شنگ کرت اَنت ۔اے اھولکارانی تہ ءَ یکے بی بی سی اُردو ءِ اھوالکار ھارون رشید اَت کہ رند تر ءَ آئی ءِ جانبداریں رپورٹانی سر ءَ شرگداری ھم کنگ بوتءُ بی بی سی ءَ اے درگت ءَ گیشینگ کپت کہ بلوچستان ءِ راستیں ھال آھاں سر نہ بوگ ءَ اَنت ۔پاکستانی واکداراں دنیا ءِ دیم ءَ بلوچانی کشت ءُ کشار پمیشکا گوں بے شرمی من اِت کہ دنیا ءِ پادشاہ ’’ امریکہ‘پہ اے کار ءَ آئی ءَ ھمدست اَت ۔ امریکہ ءَ بوتگیں دیوان ءِ تہ ءَ ھم ھمے نیمگ ءَ دلگوش گور کنگ بوتگ کہ ’’بلوچستان ءَ کارمردبیوکیں سِلاہ امریکہ ءَ جوڑ بنت ۔‘‘ اے ھبر چَہ امریکہ ءِ انسان دوستیں مردمانی نیمگ ءَ دیریں کنگ بوگ ءَ اِنت بلے پاکستانءَ گوں امریکہ ءَ ھمے سودا جتگ کہ اگاں امریکہ پاکستان ءَ ماں بلوچستان ءِ تہ ءَ بلوچانی چک چین کنگ ءَ ھچ مہ گوش اِیت گڑا پاکستان ھم خیبر پختونخواہ ءَ امریکہ ءِ نیمگ ءَ بوتگیں ڈرون اُرشاں اُوپار کنت ۔بلکیں پہ بلوچانی کُشگ ءِ اجازت گرگ ءَ ’ شِمشی ائربیس ‘‘ھم ھما ھاں دات داں چَہ آاُود ءَ آھاں پہ وتی ڈرون نامیں بے سُکانی ( پائلٹ ) بالیگانی بال دیگ ءَ آسانی بہ بیت ۔

بلوچاں اے شر ماراِتگ کہ امریکہ ھما واک اِنت کہ پاکستان پہ بلوچانی کُشگ ءَ بے مھار ءِے کرتگ بلے بلوچ نوں چَہ وتی گوستگیں تجربگاں اے شر زانت کہ دنیا بے سوت ءُ نپ ءَ گوں کس ءَ سنگت نہ بیت ھمے پیم امریکہ ءِ رنگیں ملک ءَ گوں اُوست بندگ کہ آ بلوچ ءَ پہ آئی ءِ آزادی ءَ بے مول ءُ لب ءَ کمک کنت ، ھوڈیں تماھے ۔ اے درگت ءَ واجہ ملک طوقی ءَ چَہ مروچیگ ءَ ھشت سال پیش امریکہ ءِ سینٹ ءَ تچک ءَ تچک یک انچیں ھبرے کرتگ کہ دنیا ءِ ھچ چیردستیں راجے ءَ چد ءُ پیش اے ھیال نہ رُودینتگ کہ آچَہ دنیا ءِ کمک ءُ ھمدستی ءَ ابید ھم ’’ آزات ‘‘ بوت کنت بلے اے ھبر چَہ دنیا ءَ سدگ ءُ گستا بوگ ءِ بزانت ءَ نئے اَت بلکیں اے پہ اے باور کنائینگ ءَ گوشگ بوتگ کہ بلوچانی اُوپار ءُ ھاٹیگ چَہ پنجاپیاں گیشتر اِنت کہ آپہ وتی دارگ ءَ دنیا ءِ محتاج اِنت بلے بلوچ ( ملک طوقی ) ءَ امریکن سینٹ ءِ تہ ءَ گوشتگ :’’ماپہ وتی آجوئی ءِ پچگرگ ءَ روگ ءَ اِیں ۔ اگاں شما مارا کمک کن اِت، تھینک یو ویری مچ ۔ اگاں ناں گڑاھم ماں وتی آجوئی ءَ الم گِر اِیں ۔‘‘ اے چَہ روس ءَ چمدار بیوکیں کوھن ءُ جَبنڈیں ’’ راجدوستانی ‘‘ ھیال ءَ جتا ءُ نوکتریں ھیالے اَت ھمے ھیال ءِ بنچک ءَ انوگیں زرمبش ءَ دو بر تِج کرتگ ’’ ما وتی جنگ ءَ، گوں وتی زور ءَ مڑان کن اِیں کسے کمک کنت وش اَتک اگاں کس کمار نہ کنت ھم ما مِڑاں بئے اِیں پرچا کہ اے جنگ جھانی واکانی لوٹانی پد ءَ نہ بوگ ءَ اِنت بلکیں بلوچ ءَ پہ وتی راجی لوٹاں بنا کرتگ ءُ ایشی ءِ مول بلوچ راجی بستار ءِ پھازگ اِنت ناں کہ جھان ءِ نوکیں سوت ءُ گزرانی۔ ‘‘

امریکہ ءَ بوتگیں دیوان بلوچ راھشونانی یکشلیں جھدانی برورد اَت ۔اے دیوان ءَ بلوچستان ءِ جیڑہ نہ ایوک ءَ میان اُستمانی تک ءَ رسُتگیں انسانی جیڑھانی رِد ءَ ھوار بوتگ بلکیں پہ بلوچ ءَ راھشون ءُ سکین اِنت کہ اگاں آ چد ءُ گیشتریں زور ءُ واک ءُ یکمشتی ءَ اے کار ءَ دیم ءَ بہ بار ت جوانتریں آسرے ءَ رَست کنت ۔ پہ اے کار ءَ بلوچاں امریکن سیاستدانانی تب زانگی اِنت ، امریکن ھما کن اَنت کہ گوں آھانی سوتاں ھمدپ بہ بنت۔بلوچ چَہ بن ءَ ھمے گوشان ءُ پیداک اِنت کہ پاکستان پہ جھان ءِ ناشرکاراں یک کلاتے ءُ اگاں جھان چَہ ناشرکاری ءُ دھشت گردی ءَ رکگ لوٹ اِیت گڑا بلوچستان ءَ چَہ پاکستان ءِ پنجگ ءَ درکپگ ءَ کمک بہ کنت بلے تاں مروچی امریکن واکداراں گوں پاکستان ءَ ھمے اُوست بستگ کہ ابید چَہ پاکستان ءِ کمک ءَ آدھشت گردی ءَ داشت نہ کن اَنت ءُ آھانی دل ءَ جاھے اے ترس ھم بہ گندئے بہ بیت کہ چَہ پاکستان ءِ نزور بوگ ءَ دھشت گردگیشتر توانمند بنت ءُ پہ جھان ءَ جنجال جوڑ بنت ۔ ‘‘ پدر اِنت کہ امریکنانی اے ھیال ناپھتواِنت ، آپاکستان ءِ دپترءُ مھلوک ءِ سیاسی تب ءُ میلاں سرپد نئے اَنت ۔ایشی ءِ بازیں سبابانی تہ ءَ یکے امریکنانی چَہ’’ پروپیگنڈہ ‘‘ءَ اسرمند بوگ اِنت ۔ اے دراجیں مدت ءَ کہ امریکناں گوں پاکستان ءَ کار کرتگ آھانی نزیکی چَہ بلوچاں گیش گوں پنجاپیاں مھکم بوتگ اَنت ءُ الم ھما زمانگ ھم کہ بلوچ ’’ رشین بلاک ‘‘ ءُ پنجاپی ’’ امریکن بلاک ‘‘ ءَ ھوار بوتگ اَنت امریکہ ءَ شر یات اِنت۔ نوکیں دور ءِ لوٹ ھمیش اَنت کہ امریکہ وتی رھبنداں بدل بہ کنت ءُ پہ وتا نوکیں دوست بہ چار اِیت بلوچ آئی ءِ دوستانی رُمب ءَ ھما وھد ءَ گون کپ اِیت کہ آ ماں امریکہ ءِ تہ ءَ پہ وتا گیشتر پلہ مرز شوھاز بہ کنتءُ امریکن سیاستدان ءَ گوں نند ءُ نیاد ءُ سنگتے ءِ نیمگ ءَ دلگوش دیگ ءِ پجیگ ءَ امریکن میڈیا ءَ ھم وتی توار ءِ سر کنگ ءَ راہ ءُ راھبند شوھاز بہ کنتءُ انچوش کہ بلوچ راھشونانی جھد بوتگ امریکہ یا دَری دنیا ءَ بلوچ ءِ توار ءَ ھچ ریس ءُ پریس مان مہ بیت داں دنیا ءِ مردم گوں آسانی ءَ سرپد بہ بنت کہ بلوچ چی لوٹگ ءَ اِنت ،اے درگت ءَ ھما بلوچ دانشور کہ بلوچ جھدکار ءَ گوں باز جاہ ءَ تپاک نہ کن اَنت باید پہ راجی لوٹاں وتی گلہ ءُ ماسیتاں میان اُستمانی تک ءَ درشانگ ءِ بدل ءَ وت ماں وتی دیواناں گپ بہ جن اَنت ءُ وتی دوست ءُ سنگتانی ردیاں وتی جند ءِ دیواناں نشان بہ دئے اَنت ناں کہ پہ ایشی ءَ سوشل نیٹورکءُ انگریزی زبان ءَ نوشتانک چاپ بہ کن اَنت ۔
امریکہ ءَ بوتگیں دیوان ءِ تہ ءَ لھتیں دلگوشگور کنگی ءُ پہ بلوچ جھد ءَ ناوشیں ھبر ھم دیم ءَ اَتکگ ۔ دیوان ءِ باز مردماں اے گوشتگ کہ’’ انچوش پاکستانی فوج انسانی حقاں لگتمال کنگ ءَ اِنت ھمے پیم بلوچ ھم پنجاپی آبادکاراں کشگ ءَ اَنت ءُ اے ھم کہ بلوچ پہ وتی حق ءِ گرگ ءَ تپنگ ءَ چگل بہ دئے اَنت ۔‘‘

اے تَک ءَ الم چَہ بلوچانی نیمگ ءَ نزوری بوتگ کہ امریکن دیوان ءِ تہ ءَ ھیومین رائٹس کمیشن پاکستان ءِ باسک علی داعیان ءِ دروگانی ٹنگ کنگ ءَ کس موجود نہ بوتگ ۔ بلوچاں نوں گیشتر اِنان ءَ بوگ لوٹ اِیت پرچاکہ پاکستان میان اُستمانی تک ءَ پہ وتا پلہ مرز درگیجگ ءِ بازیں راہ ءُ راھبنداں بلد اِنت ءُ اے ھبر ءَ ھرکس زانت کہ امریکہ ءِ تہ ءَ پہ وتا پلہ مرز ءِ شوھاز ءَ’’ پاکستان ‘‘ گونگیں ملک سک باز سرمایہ کاری کن اَنت پمیشکا امریکہ ءُ یورپ ءِ تہ ءَ پہ پاکستان ءِ گرءُ دارءَ پیش بیوکیں بازیں بل رَد کنگ بوتگ اَنت ایشانی مستریں سبب پاکستان ءِ لابنگ بوتگ ۔ بلوچ ءَ پاکستان انچوش کہ بلوچ گلزمین ءَ بے وار ءُ تکانسر کرتگ ھمے پیم میان اُستمانی تک ءَ سفارتکاری ءِ پڑ ءَ ھم پاکستان ءَ جنجالاں دوچار بہ کنت ۔ نوں اے چکاس اِنت پہ ڈن ءَ نشتگیں بلوچاں ءُ اے کار ءَ ھما کس جوانی ءَ کرت کن اَنت کہ کمتر وپس اَنت ءُ گیشتر آگاہ اَنت۔