بلوچ راھشونانی ٹپ ما ٹپ جتگ چُپتگ ءُ دیم شریتگیں میتانی دزکپگ ءِ بدیں ھالانی تہ ءَ بلوچاں دو وشیں ھال ھم رَستگ بلوچ راج ءِ بسات ھما نادراہ ءَ جوڑ بوتگ کہ پہ وتی دردانی ساڑینگ ءَ وتی بالاد ءِ بند ءُ بوگ اںداگ دنت ۔ چَہ بلوچ ءِ چماں اَرسانی ھار ءِ اُوست بندوکیں پاکستانی ھالرسانک ءُ اھوالکار الم اجکہ بنت وھدے کہ ماماقدیر بے گریوگ ءُ پٹورہ ءَ وتی نماسگ ءِ دست ءَ گیپت ءُ شھید جلیل ریکی ءِ پاکیں میت ءِ سر ءَ بار ت ءُ واجہ ءِ دیدار ئِے کنائین اِیت ۔ بیمار جانیں نماسگ وتی پت ءِ بالاد ءِ سستگیں گوشت ءُ کُپتگیں چماں گند اِیت اَجکہ بیت ءُ جست کنت اے کے بوتگ کہ منی پت ءَ گوں چوش ئِے کرتگ آ ئی ءَ ناں چد ءُ پیش اے اِش کرتگ اَت کہ آئی ءِ پت پاکستانی اسلام دوستیں فوج ءِ مجاھدیں سپاھیگاں آوار جتگ ناں کہ آٴٴئی ءَ بِھ انسان ءِ سستگیں گوشت دیستگ اَت ۔ اے ندارگ پہ پاکستانیاں اجکھیں ھبرے بلے پہ بلوچاں ناں اے رنگیں وھیل ءُ سکی نوں بلوچ ءِ زندمان ءِ بَھر جوڑ بوتگ اَنت بلوچ ءِ اے پدریچ ءِ دل سائیجی شاشان ، بولان ءُ تراتانی ءِ تلارانی پیم ءَ ترند ءُ کلنڈ بوتگ اَنت۔
ما پیسر ءَ ھم دیستگ کہ شھید دلجان ءِ کسان سالیں بچ ءَ وتی گریوگ ءُ درد دل ءَ گُگ کرت اَنت ۔ ما وَ چد ءُ گیشتر اے ھم دیستگ کہ کسان سالیں شھید صدام ءَ ھم ھمینکس درد ءُ دور سگ اِتگ کہ شھید سنگت ثناء ءُ دگہ شھیداں ۔ ما زرگل مری ( زرینہ مری )ءُ آئی ءِ شیر مچیں بچ ءِ گوں ڈکوئیگ ءَ کَپ کَپ کنگ ءِ ھال ھم اِش کرتگ ۔ ما دیستگ کہ مئے مات ءُ گھارانی گُور اِش براِتگ ءُ آ بے پردگ اِش کرتگ اَنت ۔ مادیستگ کہ مارا یک رِد ءَ اُوشتارینگ ءُ تیر ءَ گوں سمبگ بوتگ ۔ ما دیستگ کہ مئے کماشانی اِسپیتیں رِیش گوں رنگ ءَ سیاہ کنگ ءُ آھانی دست ءُ پاد بندگ ءُ کشگ بوتگ اَنت ،ما دیستگ کہ مئے چَہ ساہ ءَ دوستریں راھشون گوں وتی گنگلاں مرگاپ ءَ کُشگ ءُ چگل دیگ بوت ءُ آئی ءِ پاکیں بالاد رستراں چُونڈ اِت ، ما ھمروچ گندگ ءَ اِیں کہ مئے سالونکیں ھم گنگل یک پہ یک برگ ءُ گار کنگ بوگ ءَ اَ نت ۔ مئے چمانی اَرس وَ ھما روچی کٹ اِت ءُ ھلاس بوتین اَنت کہ مئے مات دروریں ازگل ءُ دُتکیں یاسمین پاکستانی مزواریں سپاھیگاں پہ ترمپ ءِ آپ ءِ لوٹ ءَ ھون ءَ گوں میچلینت اَنت بلے زاناں مئے چم ھم انچوش سک سراَنت انچوش کہ مئے جند ما انگت گریوگ یلہ نہ دات بلے نوں ما اینکس گریوگ چَہ کجا بیار اِیں کہ مئے بالاد ھمروچ سندگ ءُ ورگ بوگ ءَ اِنت؟ ۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔اے ھم نیکیں مستاگے کہ بلوچ ءَ گریوگ یلہ داتگ ۔
مستاگے اِش اَت کہ بلوچانی توار امریکہ ءَ جوانیں وڑے ءَ جکس اِتگ ۔ اے ھال ءَ دروگ گواچن کرت کہ پہ بلوچاں ھچ راہ درے نیست کہ وتی جھد ءَ آپسرے ءَ سر کرت بہ کنت۔ پیش ءَ نوشتگ کہ اے دیوان ءَ پدر کرت کہ بلوچاں انچیں راھشون ھم ھست کہ آ میان اُستمانی تَک ءَ گوشدارگ بنت ءُ آ میان اُستمانی تک ءَ گپ ءُ دیوان کنگ ءِ توان ءُ بود دار اَنت ۔ آ بلوچستان ءِ جاور ءَ گوں بندوک اَنت ءُ شر زان اَنت وھدے کہ زورآور چیردستیں مردماں سیاسی رنگ ءَ گپ ءُ تران ءِ اجازت مہ دنت گڑا پہ زرمبش ءِ دیم ءَ برگ کجام راہ جوانتر اِنت ۔ چَہ ایشی ءَ وشتریں ھال ءُ پہ دژمن ءَ گرند اِیش اَت کہ بلوچ راھشون ھیر بیار مری گوں براھندگ بگٹی ءَ دوچار کپتگ ۔اے نیاد ءَ ھیر بیار ءَ بلوچ لبریشن چارٹر پہ چار ءُ ٹپاس براھندگ ءَ دات کہ بلوچ زانتکار ءُ سیاستداناں جوڑ کرتگ داں جھان بلوچ زرمبش ءِ نیمگ ءَ دلگوش بہ دنت ءُ پلہ مرزی بہ کنت۔
اے دوچار کپگ ءُ وت ما وتی دیوان ءِ مستریں اَرزش اِیش اِنت کہ چد ءُ پیش بلوچ راھشون ھیر بیار کہ ھما درسیں سیاسی گل ءُ مردمانی جھگیری کنت کہ ماں بلوچستان ءِ تہ ءَ بابامری ءِ سیاسی راھبند ءُ لیکوانی منوگر اَنت ءُ براھندگ بلوچ ری پبلکن پارٹی ءِ کماش اِنت ۔ بی آر پی ءِ چَہ بی این ایف ءَ گستا بوگ ءُ ھمے میان ءَ براھندگ ءِ بلوچ راجدوستیں ھمبلانی سوجانی پد ءَ بلوچستان ءَ درکپگ ءُ سوئزر لینڈ ءَ سربوگ ءُ اے دراجیں مدت ءَ پہ لھتیں سیاسی لوٹانی سبب ءَ بے ترک ءُ تواری ءُ ھمے پژدر ءَ دژمن ءِ ڈھنڈور ءَ اے شک کچ راستی گمان کنگ بوتگ کہ براھندگ گوں زرمبش ءِ دگہ گلاں ناتپاک ءُ گستا اِنت ۔ ھردو راھشونانی دروت ءُ درھبات ءَ پدر کرت کہ بلوچ چاکری کینگ ءِ ول ءَ تیجارے ءَ نہ ھل اِیت بلکیں اے زرمبش گوں بالاچی جوزگاں دیم ءَ روت ھما سیادیانی بن ھشت کہ شھید اکبر ، شھید واجہ ءُ شھید بالاچ ءَ ایر کرتگ آ ھانی دیم ءَ برگ ءُ دارگ ءِ ذمہ وار براھندگ ، ھیربیار ءُ اللہ نذر اَنت اگاں اے ھر سئے اے کار ءَ مہ کن اَنت ءُ ایوک وتی نیمگ ءَ زور بہ جن اَنت گڑا زرمبش ءَ تاوان ءَ ابید دگہ ھچ نہ رَس اِیت ۔نام گیپتگیں ھر سئیں شھید بے ھچی نہ شتگ اَنت ھریکے ءَ پہ وتا سیاسی اوبادگ ءُ سیاسی مَڈی پشت داتگ کہ نام گیپتگیں راھشون آھانی پھازگ ءُ گیشترکنگ ءِ مانزمان اَنت ۔
بلوچ سیاسی مردماں اے زانگ ءُ مارگ لوٹ اِیت کہ انچوش سیاسی چاگرد ءَ نام کشگ ءُ کار کنگ گران اِنت ھمے پیم یک ترند گریں قبائلی چاگرد ءِ گرءُ داراں درکپگ ءُ سیاسی راھبنداں آیگ چَہ اولی کار ءَ دوسری گرانتریں کار اِنت ۔ ھما کس کہ پیش ءَ لنگڑ ءُ لوچ اِنت آئی ءِ گور ءَ ابید چَہ وتی سر ءُ ساہ ءَ دگہ چی ھست کہ ببا بہ دنت بلے براھندگ ءُ بالاچ ءَ بہ زان اِت کہ پہ بلوچ راج ءَ وتی شھزادگی زندمان ببا داتگ اَنت یکے چد ءُ دیمتر یں جاھے ءَ سر اِنت۔ آ یک انچائیں سپاھیگے ءِ پیم ءَ جنگ ءِ پڑ ءَ شھید بوتگ۔ باید وَ ھمیش اَت کہ بالاچ گونگیں راھشون ماں جنگجاہ مہ بنت پرچا کہ اے گونگیں کارستانی ایوک نام پہ دژمن ءَ یک بیم ءُ ترسے بلے بالاچ ءَ اے کار پہ ھما ناباورانی پیش دارگ ءَ کرت کہ مدام ھمے گوشتگ اِش کہ سردار وت سارتیں ساھگاں وپتگ اَنت ، آھاں پہ دگرانی چکانی کشارینگ ءَ درد نہ بیت ۔ بلے نوں نوبت پدی اَنت بلوچ ءِ پدریچ زانگ ءَ اِنت کہ بالاچ گونگیں راھشونانی سارتیں ساھگ ءَ بوگ پہ جھد ءَ یک سارتیں ساھگے پمیشکا براھندگ ءِ پہ سلامتی درانڈیھ بوگ ءَ بلوچ آئی ءِ ماں جنگجاھاں بوگ ءَ گیشتر وش ءُ ساکم اَنت ۔
دگہ زانگی ھبرے ھما روچ ءَ بلوچ سیاسی جھدکاراں زانگی اَت کہ براھندگ ءَ وتی پیرک ء جوڑ کرتگیں پارٹی جمہوری وطن پارٹی ءِ نام ءُ بیرک بدل کرت اَنت ءُ دیناداسی آجوئی ءِ جھد ءِ جار جت بلے گیشتر مُردگ دوستاں آئی ءِ سیاسی سِتکی ءِ سر ءَ بھیسہ نہ کرت ۔ شھید واجہ چَہ منی دیستگیں راھشوناں یکے مردم اَت کہ گوں ما ھمے گوشتگ اِت ئِے کہ براھندگ یک دلپاک ءُ دلستکیں سنگتے ءَ ابید سیاسی پگرداروکیں ورنایے ھم شھید ءَ باز زور جت کہ بی آرپی ءُ بی این ایم یکجا بہ بنت بلے آئی ءِ شھادت ءَ پد جاہ ء اے کہ اے واب پیلو بہ بیت آئی ءِ سیاسی اوبادگاں موہ دات کہ بی آر پی چَہ بی این ایف ءَ گستا بہ بیت ۔ ھمے پیم دگہ مزنیں راھشوناں ھم ھمے گوشتگ کہ دلستکی ءُ دلپاکی ءِ پجیگ ءَ راھشون ءِ دورگند بوگ ھم المی اِنت ۔ براھندگ ءِ تہ ءَ دور گندی ءُ سیاسی سنچ ءَ ھمد ءَ بہ گند اِت کہ آئی ءَ وتی گھار ءُ گھارزتک ءِ شھادت ءِ سر ءَ ھم باھند نہ کرت بلکیں آئی ءَ ھمے گوشت کہ اے اولی رند نہ اِنت کہ بلوچ جنین آدم شھید کنگ بوتگ اَنت اے بلوچانی سر ءَ ظلم ءُ جبر ءِ درچ اِنت کہ برجاہ اِنت ءُ ایشی ءِ بیر بلوچستان ءِ آجوئی اِنت کہ پہ آئی ءَ براھندگ ءَ وتی وشی ءُ وژوابی ببا داتگ اَنت ۔ مارا ستک ءُ باور کنگ لوٹ اِیت کہ اے راھشون اگاں پہ ما ناں بلے پہ وتی وشیں روچاں پدترینگ ءَ اے زرمبش ءَ منزل ءَ سرکنگ ءَ شپ روچ کار کن اَنت ۔
ھر دو راھشوناں یک دومی ءَ گوں نند ءُ نیاد ءِ پجیگ ءَ بلوچستان ءِ دگہ سیاسی راھشون ءَ گوں ھم گند ءُ گدار کنگ لوٹ اِیت داں اے ھبر رَد بہ بیت کہ بلوچ راھشو ن پہ وتی پاگ ءِ چوڑ ءِ برز کنگ ءَ اے کار کنگ ءَ اَنت۔ اے کار پہ آجوئی ءِ جھد ءَ مامانگو ءُ سیاسی پِڑ ءَ مانگیش اِتگیں لیکوانی ھدابندیں گَل بلوچستان نیشنل پارٹی ءِ راھشون ءِ گندگ ءَ گوں بنا بیت وشتر اِنت ۔ المی نہ اِنت اے گندگ ءِ بنگپ آھاں گوں بلوچ راجدوستاں ھم پت کنگ بہ بیت ۔ انچوش کہ مینگل مری پہ سیال گندی گندگ کن اَنت برے برے سیاسی چاھواری ءَ ھم یک دومی ءَ دپ بہ کپ اَنت داں گورے دنیا ءَ اے باور بہ بیت کہ بلوچ یک دومی ءِ ھون ءِ تنیگ نئے اَنت ءُ بلوچ ھم بہ زان اَنت کہ اے جھد ءَ کے دلپاک ءُ دلستکی گون اِنت ءُ کئے پہ وتی پاگ ءِ چوڑ ءِ برز ءَ دارگ ءَ مامانگو ءُ توکو جوڑ بوتگ ۔
.jpg)
Post a Comment