وشی ءُ سکیانی ھما روچ کہ سرجمیں راج ءَ اسرمندکن اَنت، راج اِش یک رنگ ءَ مار اِیت ءُ یات کنت ’راج روچ‘ ( قومی دن ) گْوشگ بنت ۔ راج روچانی یک پژدرے بیت ۔ چیردستی ءَ بلوچ راج ءِ سما ءُ سنچ انچوش کنٹ کرتگ کہ نوں زانگ نہ بیت کہ بلوچانی گور ءَ راج روچ دارگ ءِ چونیں رسم ءُ بیدگ بوتگ اَنت ۔ دری مردمانی آورتگیں نیکراھی مذھب ءِ سبب ءَ ھم بلوچانی راج روچ ءُ بازیں ربیدگ بدل بوتگ ءُ آھانی جاہ تازیانی (عرب) رسم ءُ زماں گیپتگ ۔زورگریں تازیاں بلوچ راج ریپینتگ ءُ کم کم ءَ چَہ وتی ربیدگاں دوربرتگ، اے کار دنیگت پہ اسلام ءِ نامءَ برجاہ اِنت ۔ تاز۱یانی مول ءُ مراد ھم انوگیں زورگرانی رنگ ءَ وتی زور یں ھاکمی ءِ برجاہ دارگ اَت ۔ ’ اسلامی نام ، اسلامی پوشاک ءُ اسلامی ربیدگ ‘ رنگیں وتگڑ ءُ وتجوڑیں ھیالاں بلوچ ربیدگ انچوش لگت داتگ ءُ شرچینتگ اَنت کہ نوں آھانی شوھاز ءُ پول تھارماھیں شپ ءَ لکڑ کساسیں ڈنے ءَ کپتگیں سوچنے ءِ شوھازگ ءِ وڑ ءَ اِنت ۔ نوں کہ بلوچ ءَ ھم وانگ ءُ زانگ ءِ آسراتی رستگءُ اسلام چَہ تازیانی دست ءَ درکپتگءُ انچیں جاھے سر بوتگ کہ اسلام گونگیں مزنشانیں مذھبانی جاہ اِنت ۔ نوں بلوچ عالم ھم چَہ دنیاءِ دگہ راجانی عالمءُ زانتکار اں گیشتر سرپد اَنت کہ اسلام ھما براھدار ءُ شاھگان ھیالے مذھب اِنت کہ آئی ءِ تہ ءَ ھرچ راج وتی دود ءُ ربیدگ ءَ گوں ھوار بوت کنت ۔ اے ھبر ءَ جھان گند یں عالم جوانے ءَ زان اَنت کہ بلوچانی پوشاک ءُ سِتراسلامی جھان ءَ چَہ درساں گیش اسلامی تراَنت پمیشکا اسلام ءِ نام ءِ سر ءَ ملک گیری ءُ کشت ءُ کشار کنوکیں تازیاں ھم اے پچ ءُ پوشاک ءِ براھداری پُل اِت نہ کرت پدا ھم چوش نہ اِنت کہ چرآھانی جھان سر چیر کنوکیں دُلاب ءَ بلوچ ربیدگانی کلات پھک ءَ پھریز اِت ۔
بلوچ چَہ وتی بن ءُ بیھی جاہ ءُ ھنداں سر سند بیان چندے وتی راج ءِ سریں مردمانی نا دلگوش ءُ نسیلی ، چندے وتی سرمتابی ءُ چندے دری لشکرانی دزمانجنی ءَ بلوچ چَہ روکپت ءِ وشیں زید ءُ بھشت گونگیں زمین ءَ درکپتگ ءُ تپتگیں ڈاک ءُ ڈن ، بے راھیں گَر ءُ آزمان ءَ سرکشتگیں چُدگاں نندگ ءُ لڈ بوجار کنان ھمے زمین ءَ کہ مروچی ھماھانی نام ءِ سر ءَ بلوچستان اِنت اَتکگ جاہ منند اِنت ۔ ھما زمانگ ءَ کہ بلوچ اے زمین ءَ اَتکگ ءُ جاھمنند بوتگ ،تازیانی زور پرشتگ اَت پمیشکا آھاں وتی دود ءُ ربیدگانی بن ھشت ایر کنگ ءَ موہ رست ۔ ھمے دور ءَ بلوچ ءِ میار جلی ، مِھمان جلی ، مڑاھداری ، راجدوستی ، نام ءُ ننگ ءِ زانگ ، لج ءُ بِھداری ، میاریگ ءُ ملام بندی ، پوڑی ءُ بجار ، زبان ءُ سوگندءِ اَرزش ، کسان مزنی ءِ کچ ءُ کیل ءُ دگہ چاگردی چیدگ گیش اِت اَنت ۔ ھمے دور بلوچ ربیدگ ساچی دور اِنت چَہ ایشی ءَ پد داں مروچی ھرچے کہ بلوچ چاگرد ءَ بوتگ آھانی بنزہ ھمے دور اِنت ۔ بلوچی بتل کہ بلوچ راھبندانی نوشتانکی وڑ اَنت گیشتر چَہ ھمے دور ءَیکجا کنگ بوتگ اَنت۔جھان ستر دیمروی بہ کنت بلوچ چَہ اے راھبنداں سر گوست نہ کنت ءُ اے بلوچ ءِ وش بھتی اِنت کہ بلوچ راھبند اں چوشیں ھچ راہ نیست کہ بلوچاں کلاگی ءُ سبک بہ کنت یابلوچ گوں ایشاں نوکیں دور ءَ گام جت مہ کنت ۔
شمبے ءُ شانزدہ مئے راج پتینکاں پشت کپتگیں ’’ راج روچ ‘‘ دارگ ءِکوھنیں دروراَنت ۔بژن کہ مروچی ما ایشاں شموشتگ اِیں ءُ بے ترانگ کرتگ اَنت پرچا کہ ما ھمے ردمنیءِ تہ ءَ اِنت کہ ایشانی دارگ یک مذھبی شرک ءُ پالے۔سبب اِیش اِنت کہ کم کم ءَ ھما پژدری کسہ کہ گوں اے ’’ راج روچ ‘‘ ءَ بندوک ءُ اے ربیدگ ءِ بن اَت کس ءَ گیر نئے آورت بس یک ھیل گیپتگیں کارے ءِ پیم ءَ وتی پیرینانی گیگان کنان کرت ۔ ایشی ءِ شموشگ ءِدگہ سببے بلوچ آبادیانی مستر ءُ تالان بوگ اَت ۔ شھید ھمل جیھندءِ شھادت ءُ بیگواھی ءِ روچ ءِ دارگ مئے چَہ درساں مستر ءُ داں دیر منتگیں راجی روچاں یکے ءُ مئے ربیدگ ءِ چَہ ھما بَھر ان اِنت کہ نوکیں پدریچ ءَ یلہ داتگ اَنت۔
بلوچ راج بامرد مزن شانیں ھمل جیھند ءِ شھادت ھما زمانگ ءَ کہ بلوچ پہ وتی گلزمین ءِ پھریزگ ءَ گوں پرتگیزیاں جنگ دیگ ءَ اَت یک سرین پروشیں ڈکّے اَت ۔ ھمل، بلوچ لشکر ءِ چَہ درساں نامدار، زورمند ءُ نترسیں سپاھیگ ءُ کماندار اَت ۔ بلوچ زِر وان ( زر ءِ نوان کنوک بزاں شھید ھمل ) ءَ گام گام ءَ داں بند رعباس ءَ بہ گر کیا ءِ ماڑی (کیماڑی ۔ کلاچی ) ءَ پرتگیزانی راہ گٹ کرتگ ءُ آ بلوچ گلزمین ءِ تہ ءَ پترگ نہ اِشتگ اَنت ۔ آئی ءِ دزگیری ءُ کوش چوشیں کارے نئے اَت کہ راج ءَ بے ترانگ بے کرت اِنت ۔ شھید ھمل جیھند ءِ شھادت ءِ ترانگ ءَ داں چَہ مایک پدریچے پیش اے ربیدگ بلوچانی گور ءَ زندگ بوتگ کہ بلوچ جنین آدماں شمبے ءِ روچ ءُ ماہ ءِ شانزدھمی رمس ءَ سر نہ ششتگ ۔ اے ربیدگ ایوک پہ جنیاں نہ بوتگ بلکیں اے یک راجی ربیدگے اَت ءُ چَہ ایشی ءَ درسیں رُستگیں بلوچ آژناک اِت اَنت ۔ چاگردی سنچ بوگ ءِ سبب ءَ بلوچانی ربیدگانی پھریزگ ءِ ذمہ وار جنین اِت اَنت پرچا کہ آزمانگ ءَ مردین پہ وتی لاپ ءِ شوھا زءَ شپ جاہ ءُ روچ جاہ ءُ جنگانی دیمپان اِت اَنت ۔ آ زمانگ ءَ ھم انسان ءِ وشی ءِ مستریں وسیلہ جنسی ھم بستگی بوتگ پمیشکا اے گْوشگ ھچ رَد نہ اِنت کہ ھمل ءِ شھادت بلوچ دپتر ءِ چَہ درساں مستریں ناوشی اِنت کہ بلوچاں مار اِتگپہ اے مارشت ءِ درانگازگ ءَ وتی چَہ درساں مستری وشی نْدرکرتگ داں اے ٹپ مدام تاجگ بہ بیت ۔ جنینانی سر نہ شودگ ءَ مراد اے روچ ءَ چَہ جنسی ھم بستگیاں دور بوگ ءُ ھما ’ راجی سکی ‘ ءِ مارگ اَت کہ راج ءِ سر ءَ گْوستگ ۔ ھما زمانگ ءِ گمنامیں لچہ کارےءَ اے ربیدگ یک جوانیں رنگے ءَ دپتر ءِ تاکاں زندگ کرتگ ۔
شمبے ءِ روچ ءُ برج ھما شومیں اَگرب اَت
شمبے ءِ روچ ءُ شانزدہ اَت ماہ ءَ برکرار
گْوشتگ اَت مات ءَ گوں ماھیں چم کمار
شمبے ءُ شانزدہ سر مہ شود براتانی گھار
شمبے پہ براتاں شوم اِنت شانزدہ پہ پت ءَ
شوم ھما روچ اَت کہ ھمل ءَ شاگے نول کتہ
شمبے ءِ روچ ءُ شانزدہ اَت ماہ ءَ برکرار
گْوشتگ اَت مات ءَ گوں ماھیں چم کمار
شمبے ءُ شانزدہ سر مہ شود براتانی گھار
شمبے پہ براتاں شوم اِنت شانزدہ پہ پت ءَ
شوم ھما روچ اَت کہ ھمل ءَ شاگے نول کتہ
ھمے پیم الم ءَ بلوچ ءِ وشیانی ھم راج روچ بوتگ اَنت بلے آ دپتر ی دنز ءُ
مجاں بیگواہ اَنت یا کہ ما چَہ وتی ترس ءِ سبب ءَ آھاں پد جنگ ءَ نہ اِیں ۔
انسان ءِ گیشتر زور ھمیش اِنت کہ آجھان ءَ گوں وشی ءُ آسیدگی بے گوازین
اِیت ھمے آسیدگیانی پشت ءَ راج جنگانی پڑ ءَ مان دئے اَنت ۔ ’ھرکس زانت کہ’
جنگ ھما کوھنیں گد اِنت کہ چانک ءِے دیر روت ‘‘ بلے جنگ پہ وشتریں نوبتانی
لالچ ءَ مڑگ بیت ۔ جنگ ءِ تہ ءَ سکی ءُ سوری گْوز اَنت ءُ آ یات گیجگ ھم
بنت بلے کس دائمی گوں ملوریاں زندگی نہ کنت بلکیں گیشتر گوں وشیاں گوازین
اِیت ءُ کمتر گوں گم گڑتیاں ۔اسلام ءَ ھم انسان ءِ اے تب مار اِتگ پمیشکا
سالے دو عید ءُ رمضان ءِ پریں ماہ مسلمانانی پدر ءُ تھی بالادءِ وشنود کنگ
ءَ مچی ءَ گوں دارگ بنت ۔ جھا ن ءِ گیشتر راج بھار ءِ موسم ءَ کہ آئی ءِ یک
ابرمی بستارے ھست گوں گل ءُ شادا ن وش اَتک کنت ۔ اے موسم ءَ انسان ءِ
زندمان ءَ گوں سکیں نزیکی ءَ سیادی داروکیں درچک ءُ کشار سبز اَنت، بھار ءِ
موسم ءَ نوروزءِ جشن ءُ شاتکامی بلوچانی یک دست لگشتگیں ربیدگے ۔
.jpg)
Post a Comment