اے نوشتانک چَہ شھید بالاچ ءِ شھادت ءَ نو روچ ءَ پد پہ روتاک توار ءَ نوشتہ کنگ بوتگ، پمیشکا روتاکی لوٹانی ھساب ءَ ایشی ءِ تہ ءَ شھید ءِ دیمونی ءُ کرد ءِ پژدر ءَ ھما وھد ءِ سیاسی جاورانی سر ءَ ھم چمشانک دیگ ءُ گپ جنگ بوتگ ۔

شھیدانی سکین :

بیست نومبردوھزار ھپت ( 20 نومبر 2007)ءِ جگر بریں روچ ھچبرما بلوچ راجدپتر ءَ بے ھیال کنگ نہ بیت ۔اے روچ ءَ ماتیں گلزمین ءِ یک تنگوئیں بچے ءَ وتی زند پہ وتی گلزمین ءِ پھریزگ ءَ ندر کرت ءُ راج آجوئی ءِ کشک ءِ راھشونی دیان وتا ھم تاں جمار آجوئی لوٹوکانی زرد ءَ نمیران کرت ۔ اے ورنائیں ملیں مترس ءِ نام بالاچ مری اَت ۔  شھید بالاچ آجوئی ءِ انچیں چراگے اَت کہ آئی ءِ رژن ءَ بولان ءَ  گر داں جمیڑی ءَ درسیں بلوچ کُل ءُ گدان آجوئی ءِ امیتوار کرتگ اِت اَنت ۔ بالاچ ءِ زند ءِ بازیں دْروشم دنیگت بلوچستان ءِ برزبالادیں کوھانی تہ ءَ چیریں گنجانی وڑءَ مئے چماں اندیم اِنت بلے اے ھبر چوروچ ءِ رژناھی ءَ پدّراِنت کہ بالاچ ءَ داں کسانی ءَ گرشھادت ءِ روچ ءَ پہ ماتیں بلوچستان ءِ وژھالی ءِ جھد ءَ وتی زند گوازینتگ۔ چوشیں مردمانی زند ءِ ھمک دْروشم گلزمین دوستی ءِ بے مٹیں دروربنت ۔ باند ءَ الم ءَ بالاچ ءِ ھمزان ءُ آئی ءِ مرواردیں گپتارانی گوشداروک ‘آئی ءِ جوڑ کرتگیں بلوچ آجوئی لشکر (بی ایل ے ) ءِ یلیں سرمچارانی یاتانی گنج ءِ تہ ءَ اے مروارد گوں وتی سر جمیں بزانت ءَ درجَنگ ءُ نزآرگ بنت ءُ شہید بالاچ آجوئی ءِ ھمک کسہ ءِ تہ ءَ بندری کرد بیت ۔ مروچی بہ گندئے کہ جبراک ءُ زوراکانی ھاوندی ءِ تہ ءَ چہ مرگ ءِ بیھار ءُ ترس ءَ بازیں مردمے ءَ وتی گوشاں کرپاس ما نچتگ‘ چماں لنکو ک داتگ ءُ ھوش کوڑھیں امروز ءِ باھوٹ کرتگ بلے باند ءَ وھدیکہ بالاچ ءِ روک کرتگیں چراگ آجوئی ءِ روچ بیت ءُ آزمان ءَ ٹک دنت گڑا راجدوستی ءِ نام ءَ لونڈوھانی درءَ چانیگ پنڈیں پارٹیانی کور ءُ کریں باسک ءُ سروک ھم وتا بالاچ ءِ درور لیک اَنت۔

بلے ایشانی مروچگیں کرد چہ ھمل ءِ لگور یں ھمراھانی کرد ءَ پہ بلوچ ءَ گیشتر تاوان دہ اِنت پرچا کہ اے باجو (راج ءَ رد دئیوک /غدار ) یک نیمگے پاکستان ءِ سلامتی ءِ نام ءَ گرگ ءَ اَنت ءُ دومی نیمگ ءَ بلوچ ءَ رد دیگ ءَ اَنت کہ اے گوں بلوچانی وت واجھی لوٹ ءَ تپاک اَنت ۔

ا نچیں مُجیں جاورانی تہ ءَ شھید مدام راجاں ٹوھین اَنت ۔ کرنانی کرن ءِ ھار ءُ ھیروپ بیا اَنت یا زمانگ چٹا وتی رنگ ءَ بے مٹائین اَنت  شھیدانی سسا ءُ پگر مان نہ تر اَنت ( نظر یات بدل نہ بنت )ھمل جیھند ءَ گر داں شھید بالاچ ءَ بلوچ ءِ ھمک شھید ءِ یکیں واھگ بوتگ ۔اے واھگ ءِ پیلو کنگ ءُ واب ءِ راست کنگ ءِ راہ ھم تچک کنگ بوتگ پمیشکا نوں بلوچ ءِ ھچ چنو اے راہ ءَ تاب دات نہ کنت چوشیں رِ پّکانی آسر تیوک ءَ اے بیت کہ  باجوانی جند ءِ راہ چہ بلوچ ءِ راہ ءَ گستا بیت ۔

بالاچ ءِ شھادت مارا سکین دنت کہ ما وتی شر ءُ ھراب ءَ پجا بیا ر اِیں ۔ مروچی مئے دیما دو راہ اَنت یک راھے ھمش اِ نت کہ شھید بالاچ ءُ دگہ شھیدانی بوتگ ءُ دومی راہ ھماپارٹیاں گون اِنت کہ وتا راجد وست گْوش اَنت بلے پاکستان ءِ چانیگ واری کنگ ءَ اَنت گْوستگیں شست سال ءِ تہ ءَ آیانی لنکوکے ھم پہ بلوچ راج ءَ نہ سستگ بلے وتا راج ءِ گموار گْوش اَنت ۔ روتاکانی تہ ءَ چہ آیانی چاپ ءُ شنگ بوتگیں ھبراں ھمے گمان بیت کہ چر آیاں شھید ءِ مستریں ھمراہ کس نہ بوتگ بلے راستی ھمش اِنت کہ مئے دیم ءَ اِنت ۔ 

گوادر ءِ پلاٹ بہ بنت یا کہ سرکاری ٹھیکہ ‘پارلیمنٹءَ گوں بندوکیں سوت بہ بنت یا وزارت ءِ کرسی ۔ نام ءِ راجدوستیں پارٹیانی سروک کس ءَ وار نہ دئے اَنت بلے وھدے کہ راج ءِ سر مچار بالاچ شھید کنگ بوت ما سڑکانی سر ءَ ایشانی تہ ءَ کس نہ دیست ۔ گْوش ئے زاناں زمین ترک اِتگ اَت ءُ وتا بلوچ ءِ سروک گْوشوکیں اے مردم زمین چیر ءَ شتگ اِت اَنت ۔ بلے بلوچ گلزمین چوش ھم سنٹ نہ بوتگ کہ تیوک ءَ پہ راج ءَ باجو ءُ لگوریں بچ بیاراِیت ۔ بالاچ ءِ شھادت ءِ جگربریں ھال وھدے کہ مھلوکاں سر بوت بلوچ چماں ارساں ھار بست ‘ گلزمین ءِ گمواریں زرد گْوش ئے  ترْکگی بوت اَنت ۔ ھما ورنایاں کہ تاھیر اِش نیست اَت چہ وتی لوگاں دراتک اَنت ۔

من دیست کہ ورنایانی زرد ءَ جوزگانی آس روک اَت ءُ آ پہ وتا سروکے ءِ شوھازیگ اِت اَنت کہ آیاں سوجے بہ دنت کہ اے نگیگیں جاوراں آ چی بہ کن اَنت ءُ وتی سرمچارانی مرگ ءِ بیر ءَ چِہ پیم چہ دژمن ءَ بہ گر اَنت۔ نزوریں کوپگانی سر ءَ اتگیں اے بار ورناھاں کوپگ داتگ اَت بلے دژمن ءِ زور ھم چہ وس ءَ گیش اَت ءُ نام ءِ راھشوناں مزاری یلہ داتگ ءُ تولگانی وڑءَ ھونڈے باھوٹ بوتگ اِت اَنت ۔ مئے شھر ءَ اے ورنایانی بے وسی من ءَ چو زیم دجگ ءَ اَت کہ پسنی ءُ تربت ءُ پدا چہ بلوچستان ءِ کنڈ کنڈ ءَ ھمے بے وسیءِ کسہ چہ سنگت ءُ دوزواھاں سر بوت بلے پدا من دیست کہ ورنایاں دست ما دست ءِ سر ءَ نہ کرت ءُ نہ نشت اَنت بلکیں وتی نزوریں کوپگ اِش چیر دات۔ بلوچ مھلوک ءَ ھم اے ورنائیں راجدوستانی ھمراھی کرت ءُ پیش داشت کہ شھید بالاچ ھمک بلوچ ءِ سر مچار اَت چوش کہ پاکستانی سرکار گْوش اِیت آدز ءُ ڈنگے نہ اَت بلکیں بلوچ آجوئی ءِ راھشو ن اَت۔ 

نام (نام نہاد) ءِ راجدوستیں پارٹیانی سروک ھم مدام ککّار ءُ سلوات کن اَنت ‘ووٹانی وھد بیت یاوار اِش چوٹ بیت ھڑتال ءُ پرشت ءُ پروش ءَ ھم چکپد نہ بنت ۔ مزنیں مراگش، جلسہ ءُ جلوس کن اَنت کوہ پروشیں ھبرءَ گوں تلاراں دِ رّ اَ نت بلے ایشانی ھبر ءُ مروچگیں بلوچ ورنایانی کرد ءِ تہ ءَ مزنیں تپاوتے (فرق ) ھست ۔ اے ھبر منگی اِنت کہ اے ورناہ شنگ (منتشر ) اَنت ‘بے سروک اَنت بلے ایشانی جوزگ نام ءِ راجدوستانی پوتاریانی پیم ءَ کُٹ ( کھوٹا ) نہ اَنت بلکیں ایشانی نگرھیں( کھوٹے کا متضاد کھرا) ھبر چہ دل ءَ درکاینت ءُ اشکنوکانی زرداں سُمب اَنت ۔ نہ چہ ما لبّ لوٹ اَنت ‘ نہ کہ پہ گوادرءِ پلاٹ ءَ بھا بوتگ اَنت‘نہ کہ چوش ملایاں  پہ حور ءُ جنت دلمانگ اَنت ءُ نہ کہ چو پارلیمانی پارٹیاں پہ ووٹ ءِ لوٹ ءَ مئے دروازگ اِش جتگ ۔اے ورناہ کہ شھیدانی جھگیری (نمائندگی ) کنگ ءَ اَنت یوک ماتیں بلوچستان ءِ آجوئی ءُ بلوچانی گھبود ءِ لوٹوک اَنت ۔

اے ھبر گوستگیں روچاں ھم بوتگ اَنت۔ اے جا ک چہ ایشاں پیسر مروچیگیں نیشنل پارٹی ءِ سروکاں ھم جتگ کہ ’’ما ووٹ نہ لوٹ اِیں ....ھون لوٹ اِیں ‘‘۔ بلے آیانی کرد چوش شھید بالاچ ءُ براھمدگ ءَ نہ بوتگ ۔ آیاں اے ھبر پہ وتی سیاسی بالاد ءِ برز کنگ ءَ کرتگ بلے مروچی بی ایل اے ءِ جوا نسالیں سروک بے جاک ءُ جار ءَ تیر ءُ ٹوپانی دیم ءَ اَنت ءُ راج اِش نوان کرتگ ۔ چہ ایشانی جھگیری کنوک ءُ شھیدانی پگر ءَ راھشون جوڑ کنوکیں ورنایانی اے نوکیں رم ءَ ھمے سما بوگ ءَ اِنت کہ بلوچستان ءَ راجدوستی ءِ یک نوکیں باریگے ودی بوتگ ءُ نام ءِ راجدوستیں پارٹیانی پارلیمانی ھیا ل ءُ پگر ھوٹگ ءِ اوشتاگیں آپ ءِ پیما لڑ(لرد) بوان اِنت۔ اے آشوب کہ پگرانی تہ ءَ اتکگ الم ءَ روچے ناں روچے نام ءِ راجدوستاں تچک کنتءُ بلوچ ھم دیمتر ءَ چوش کور نہ بنت کہ ووٹ ءِ سیاست ءَ بلوچ دوستی ءِ نام ءَ گروکیں اے مردمانی ھمراھدار ی بہ کن اَنت ۔

پہ نوک پراری جنگءُ راج ءِ تپاکی ءَ شھیدانی کرد :

پہ بلوچ آجوئی ءَ سراں سرگوزگ ءِ پگر بلوچ مھلوک ءِ تہ ءَ چہ آزمان ءَ نئے اتکگ پہ آجوئی ءِ اے پگرءَ چوش شھید بالاچ ءَ لکّھانی بلوچ ورنایاں وتی زند ندر کرتگ ۔ بلوچ آجوئی لشکر ءِ نام ءَ بلوچانی اے نوکیں لشکر کہ پہ بلوچ ءَ وتی سر اں ندر کنان ءُ گام گام بلوچ ءَ آجوئی ءِ منز ل ءَ سر کنگ ءَ اِنت شھید بالاچ ءَ جوڑ کرتگ ۔ شھید ءِ کماش واجہ خیر بخش مری ءِ ھم اے آجوئی ءِ ھیال ءِ پھتہ کنگ ءَ دست گون اِنت بلے اے شھید بالاچ اَت کہ وتی کماش ءِ دل ءِ واھگ ءَ بزانت دیگ ءُ راست کنگ ءَ چہ وتی زندءِ درسیں وشیا ں سرگوست ءُ بی ایل اے داں بلوچستان ءِ کنڈ کنڈ ءَ بُرت ءُ سر کرت ۔ 

شھیدءَ تیوک ءَ وتی مری ٹک یک مشت ءُ یکجاہ نہ کرت ءُ پہ وتی ٹک ءِ وژھالی ءَ جنگ نہ دات بلکیں مچیں بلوچانی وت واجھی ءُ یکجاھی ءَ وتی شپ ءُ روچ یک کرتگ اَنت ۔ داں چاکر ءُ گوھرام ءِ بے نپیں کست ءُ کینگاں گر داں مروچیگیں وتی ماوتی جنگ ءُ وش نیاتکیاں بلوچ مدام تاوان داتگ بلے جوانسالیں بالاچ ءَ مری ءُ بگٹیانی ٹکّی کینگ بلوچ گلزمین ءِ دوستی ءَ گوں مٹ کرت ۔ وھدے کہ دژمناں شھید اکبر ءِ کلات چپ چاگرد ءَ گیپت ءُ آئی ءِ سر ءَ گوں تیرءُ ٹوپاں اُرش کرت پہ شھیداکبر ءِ پھریزگ ءَ اگاں کسے دیم ءَ کنز اِت آ مر ی بلوچانی ھمے یلیں سر مچار شھید بالاچ اَت کہ شھید اکبرے گوں سلامتی چہ ڈیرہ بگٹی ءَ کشت ءُ مر یانی باھوٹ کرت ۔ دوستی ءِ اے نوکیں دروشم تیوک ءَ شھید بالاچ‘ شہید اکبر ءُ برا ھمدگ ءِ دوستی نہ اَت جوان پگریں شھیدبالاچ ءَ بگٹی ءُ مری ٹک ءِ دژمنیءِ ھلاس کنگ ءُ بگٹی ءُ مری بلوچانی وت ما وت شیر ءُ شکر کنگ ءَ ھم گامگیج زرت ءُ ھما مردمانی توپگ ءَ کہ مدام وتی براتانی سر ءَ آس برتگ اَت پہ گلزمین ءِ پھریزگ ءَ یکیں سرْپ ءَ یک دومی ءِ کوپگ بوت اَنت ۔ شھید بالاچ ءِ اے کرد بلوچ راجدپتر ءِ تہ ءَ یک نوکیں گامگیجےاَت پرچا کہ بلوچ ءِ تہ ءَ بیر ءِ یلہ دئیگ لگوری زانگ بیت بلے جوان شھید ءَ نوکیں پگرے دات کہ مریانی دژمن بگٹی ءُ بگٹیانی مری نہ اَنت بلکیں ہردوئیں بلوچ ٹکّانی دژمن ھما اِنت کہ بلوچ گلزمین ءَ چر آیان پچ گر گ لوٹ اِیت ۔ آجوئی ءِ جوان شھید ءَ ہردو بلوچ مزن نامیں ءُ مڑوکیں ٹکّانی نیام ءَ دژمنی ءِ ولور ولگوج کرت ءُ دوستی ءِ انچیں چینالے کشت کہ مروچی بلوچ راج ایشی ءِ سیاھگ ءِ چیر ءَ پہ وتا تاھیر ءُ ایمنی گندگ ءَ اِنت ۔ شھید ءِ سر مچاریں پگر یوک کاھان ءُ کوھلوءِ کوھاں سرْاپ نہ اَت بلکیں بلوچ گلزمین ءِ ھمک ماتکوہ آئی ءَ گوں وتی جھد ءَ کسانیں مدتی ءِ تہ ءَ بلوچ سر مچارانی سنگر جوڑ کرت اَنتءُ بلوچ مھلوک پہ سرمچارانی کمک ءَ یکیں لڑءَ گوْپان کرت۔ بلوچ ءِ ھمے تپاکی ءُ یکجاھی ءُ پہ ماتیں بلوچستان ءَ چہ سراں سر گوزگ ءِ جوزگ پہ دژمن ءَ مستریں بیھار اِنت پمیشکا بلوچ ءِ بدواھیں دژمن مدام پندل کنگ ءَ اِنت داں مارا پروش بہ دنت ءُ وت ماوت بے میڑین اِت ءُ چہ ما مئے زر ءُ زمین ءَ بہ پل اِیت ۔ شھید بالاچ ءِ شھادت ءَ پد ھم دژمن ءَ ماراوت ما وت میڑینگ ءِ یک انچیں پندلے جوڑکرت داں مری ءُ بگٹی یک رندے پدا یک دومی ءِ دژمن بہ بنت بلے اے ھم شھیدءِ جھدانی برورد ءُ بلوچ بابا { خیربخش } ءِ زانندگیں راھشونی اِنت کہ مری سرپد اَنت کہ براھمد گ وتی چماں وت کورنہ کنت ۔ھمے پیم ءَ دژمناں اے ھم گْوشتگ کہ مریاں شھید اکبر شہید کرتگ ءُ وتی کوھنیں بیر گیپتگ بلے دنیا ءَ دیست کہ شھید اکبر ءِ ھمراھانی تہ ءَ مری درساں دیم ءَ ات اَنت ءُ تْراتانی ءِ ھما بے راھیں گراں کہ شھیداکبر شھید کنگ بوتگ مری سردار ءِ جوانسالیں بچ ھم گون اَت کہ شھیداکبر ءَ پہ زورے چہ اُود ءَ کشارینت پرچا کہ آئی ءَ ھم زانتگ اَت کہ بالاچ ءِ زندگ بوگ پہ بلوچ جھد ءَ المی اِنت ۔ مروچی کہ پاکستانی کاسگ چٹ اے گْوش اَنت کہ شھید بالاچ ءَ انچیں جاور پیدا ک کرتگ کہ شھیداکبر جَنگ بہ بیت ۔ بلے آئی ءِ شھادت ءَ پد دژمن ءَ پہ پھرے آئی ءِ شھادت ءِ جار پر اِینت ءُ یک دومی ءَ مراد بات گْوشت ءُ بالاچ ‘براھمد گ ءُ میرھالی ءِ ھم اے ڈاہ ءِ تہ ءَ جنگ بوگ ءِ ھال شنگ کنائینت بزاں آ سرپد اِت اَنت کہ شھید اکبر ءِ ھمراہ کئے اَنت کہ گوں آئی ءَ جنگ (شھید ) بوت کن اَنت ۔ شھید ءِ شھادت ءِ ھا ل درساں پیسر پاکستانی سر کار ءَ داتگ کہ وت شھید اکبر ءِ شھید کنوک اِنت ۔ شھید بالاچ ءَ داں زندءِ گڈی روچ ءَ اے باور نہ کرت کہ نواب اکبر خان بگٹی تراتانی ءِ ڈاہ ءِ تہ ءَ شھید کنگ بوتگ بلکیں آئی ءَ مدام شھید کبرزندگ من اِتگ اَت ءُ گشتگ اَت کہ’’ نواب اکبر شھید نہ بوتگ بلکیں زی ھم مئے ھمراہ بوتگ ءُ مروچی ھم مئے ھمزان اِنت، ھمامردم کہ نواب ءَ مردگ گْوشگ ءَ اَنت آ چہ آئی ءَ آزاد بوگ لوٹ  اَنت داں اے کسہ ھلا س بہ بیت۔‘‘ ھمے پیم مروچی براھمد گ ءَ سر کار بھتام جَنگ ءَ اِنت کہ شھید بالاچ ئِے جتگ ۔ بلے چوشیں دروگ بندگ ءُ زبان ءَ تاب ءُ ریس دیگ ءَ پد ھم دژمن ءِ دپ کپک (کپّ پُک ۔ھیران ‘بے وار‘ہکا بکا) اِنت پرچا کہ شھید اکبر ءُ شھید بالاچ ءَ پہ بلوچ ءِ تپاک ءُ وژدلی ءَ وتی زند شنک کُرتگ پمیشکا ھچ بلوچ پہ اے ھبر ءِ منگ ءَ ساڑی نہ اِنت کہ براھمدگ وتی یلیں سرمچار‘مسترءُ راھشون‘پیر ک ءِ زندءِ گڈی روچانی ھمراہ بالاچ  ءَ جنت ءُ بلوچانی دژمناں گیش کنت ءُ آجوئی ءِ راہ ءَ ڈنگر دنت ۔ منءَ ستک اِنت کہ مری ءُ بگٹی ھم پاکستان ءِ کاسگ 

چٹّانی اے پندل ءَ سما کن اَنت ءُ شھید بالاچ ءِ دوستی ءَ مھکم تر کن اَنت ۔

شھید بالاچ یوک ءَ بلوچانی راجدپتر ءِ یک مرواردے نہ اِنت بلکیں پہ ھمک نزوریں راج ءَ راھشونی ءِ درور ءُ پہ زورا ک ءُ نوک پرھنگاں ( استعمار ) بیھا ر ءُ پاتراپ ( چیلنج‘ترس ) اِنت ۔ مروچگیں زَ ر دوست ءُ لُٹ ءُ پُل کنوکیں ھزگارانی دیم ءَ شھید بالاچ ءِ لیکہ (نظریات ) مستریں دیوال اِنت کہ آیانی نزءَ ملک ءُ گلزمین ءَ بستارنیست بلکیں وش وراکی ‘وش پوشاکی ءُ ھزگاری آیانی نزءَ راج ءُ کٹمبانی مستریں لوٹ اَنت ءُ انسانی آجوئی ءَ بُچے ھم ھساب نہ کن اَنت پر چا کہ اگاں مھلوک آجو بہ بیت وتی شر ءُ ھراب ءَ بہ زانت گڑا آیانی ھزگاری ءِ روچ داں دیر ٹک دات نہ کنت ۔اگاں ھزگارانی ھمے گپ راست بوتین اَنت گڑا بالاچ یک نوابی چکے اَت ۔ آئی ءَ زند ءِ ھچ وشیانی کمی نیست اَت کہ پہ وشیاں توپگ ءِ بڈ ءَ کنگ ءَ لاچار بہ بیت بلے آئی ءَ سما اَت ءَ کہ نوک پرھنگاں آئی ءِ گلزمین ءِ چرآئی ءَ پلگ ءُ آئی ءِ راج ءِ گار ءُ بیگواہ کنگ ءَ لانگ بستگ پمیشکا شھید ءَ وتی زند ءِ درسیں وشی ببادات اَنت ءُ پہ بلوچ ءِ وژدلیں باندات ءَ کوھاں شت ۔ آئی ءِ اے گامگیج پہ ھزگاراں کلہ اِنت کہ یوک ءَ یک مردم یا یک کٹمبے ءِ وش وراکی ءُ وش پوشاکی ءِ نا م وژھالی نہ اِنت بلکیں راجانی وژھالی وتواجھی اِنت ۔ شھید بالاچ ءَ پہ وتی پاگ ءِ چوٹ ءِ برزکنگ ءَ ھم توپگ چست نہ کرتگ بلکیں آئی ءِ لوٹ بلوچ گلزمین ءِ آجوئی بوتگ ۔

سر مچاریں شھید بالاچ :

مردم وتی چکاں مزنیں مردمانی نام ءَ ھمے ھاتر ءَ بند اَنت کہ آیانی کرد ھم ھمایانی بہ بیت بگند ئے واجہ خیر بخش ءَ بالاچ ءِ نام ھم پمیشکابالاچ کرتگ اَت کہ بالاچ گورگیج راجدپتر ءِ تہ ءَ یک انچیں کردے کہ آئی ءَ بلوچ چاگرد ءِ تہ ءَ پہ وتی برات ءَ ندر بوگ ءُ بیر گرگ ءِ  انچیں بن ھشتے ایرکرتگ کہ روچ مروچی بلوچ ءِ چہ مستریں راج پجاراں یکے۔ مردم مروچی بالاچ ءِ نام ءِ بزانت ءَ سر پد نہ  اَنت بلے بالاچ گورگیج ءَ شریءَ زان اَنت ۔ شھید بالاچ ءَ اے نام یک رندے پدا نوک کرت ۔ نوں بلوچ وتی چکانی نام ءَ ھمیشکا بالاچ ایر کن اَنت کہ شھید بالاچ مری پہ بلوچ گلزمین ءَ گوں بلوچ ءِ دژمناں جنگ دیان ندر بوتگ ۔

پہ منی وڑیں بلوچاں شھید بالاچ ءِ شہادت ءِ ھال اناگتیں ھالی اَت پرچا کہ ما دنگیت وپتگیں مرد ءِ میش ءِ نر آؤرگ ءِ کسہ ءَ کرنانی کرن ءِ پدّی بوگ ءَ پد ھم سر پد نہ بوتگ اِیں۔ بلکیں ما دژمن ءِ شنگ کرتگیں ھال ءَ راست سر پد ءُ ایمن اِت اِیں کہ بالاچ چہ بلوچستان ءَ ڈن شتگ ۔ من ھم بازیں دگہ نزانتکاریں بلوچانی پیم ءَ چہ دل ءَ ھمے لوٹگ ءَ اِت آں کہ مئے راج ءِ ھردوئیں ورنائیں سروک چہ دژمنانی تیر ءُ توپنگاں دیر بہ بنت بلے مروچی من ءَ سما اِنت کہ من رد بوتگ آں۔ جنگانی تہ ءَ چوش ھچبرنہ بیت بلکیں کْوھنیں بتلے ’’جنگاں سرانی تاوان ھساب نہ بنت ‘‘ما اے ھم لوٹ اِیں کہ بلوچستا ن آجو بہ بیت ءُ اے ھم گْوش اِیں کہ مئے لنکو کےٹپ مہ بیت پمیشکا مئے آجوئی ءِ منزل دیر تربوان اِنت بلے شھید اے ھبر ءَ سر پد اَت کہ اگاں آ سنگر ءَ یلہ بہ دنت ءُ وتی جھد ءَ گْرانوابی ءِ باھوٹ بہ کنت گڑا بلوچ راج کدی ھم وتی منزل ءَ سر نہ بیت ۔ شھید سیاسی سروکےنہ اَت کہ دْرانڈیھ بہ بوت اِنت ءُ اد ءَ آئی ءِ باسکاں پہ آئی ءِ زْرمبشءَ کار بہ کرت اِنت بلکیں آسر مچارانی سروک اَت کہ پہ آدگہ سر مچاراں مدام گیدر ءُ مزندلی ءِ درور بنت۔ پمیشکا پہ شھید بالاچ ءَ المی اَت کہ گوں سر  مچاراں ھمزان بہ بیت ۔

شہیدبالاچ ءُ آئی ءِ پگر ءِ بابت ءَ آیوکیں روچاں الم ءَ بلوچ راج گیشتر سر پد کنگ بیت پر چا کہ آواب کہ شھید ءَ دیستگ آئی ءَ بلوچ ورنایانی چماں جاگہ کرتگ ءُ وھد ے کہ اے واب پیلہ بیت آجوئی ءِ روچانی ھمک سھب ءِ سمین شھیدانی مسکیں ھونانی بو ءَ ماتیں گلزمین ءَ آتاراِیت ۔ آروچاں ھم گلزمین ءِ پھریز گ ءُ بلوچ ڈگار ءِ سبزینگ ءَ بلوچ ورنایاں ھمے ھونانی تْرمپ سکین ءُ سوج دہ اَنت ۔چوش کہ دژمن سرپد اِنت کہ آبلوچ راجی سراں جنت ءُ راج بیگواہ بیت من ءَ ستک اِنت کہ نہ بیت بلکیں ھمینچک کہ شھیدانی لڑ دراج تر بیت بلوچ ءِ آجوئی ءِ منزل نزیکتربوان بیت ءُ شھیدانی اے ھون باندات ءَ پہ بلوچ گلزمین ءَ کلات ءَ مک بنت ءُ داں جمار پھریز اَنت ئِے۔ 

ھشیم کوہلو ءِ سائیجی‘ تلا ر ءِ گٹّ ءُ دڑامب 

شھید بالاچ ءِ زند ءِ ھما دروشم ءُ چیدگ کہ مئے دیم ءَ اَنت آھم پہ مئے راجی پگر ءِ پھتے ءَ مزنیں گنج اَنت ۔ شھید ھپدہ جنوری نوزدہ سد ءُ شست ءُ شش (17جنوری 1965ء ) ءَ کوھلو ءَ ما بلوچانی کماشیں راجی سروک بلوچ بابا( واجہ خیر بخش ) ءِ لوگ ءَ ودی بوتگ ۔ بلوچ بابا کہ آئی ءِ باروءَ جھان سر پد اِنت کہ بلوچانی ھاموش تب ءُ دیرگند ءُ گموارتریں سروک اِنت ۔ آئی ءِ ھبر ءُ کرد ءِ تہ ءَ دوتل ءُ دوپوستی نیست ۔ آئی ءِ سر ءَ کمیونسٹ راجدوستانی مستریں ءُ تیوکیں ایراد اِش انت کہ پہ بھت آ سردارے ءِ لوگ ءَ پیداک بوتگ ءُ سردارے ۔ بلے اے ھبر ءَ ھرکس من ایت کہ آئی ءَِ ایمان اِنت کہ بلوچ وژھالی گوں سلاہ بندیں جھد ءَ آجوئی گرگ اِنت ۔ بابا پہ راج ءَ گوانک ءُ ککار ءَ گیش کنگ ءُ پیژدارگ ءِ سر ءَ بھیسہ کنت ۔آئی ءَ وتی زرمبش ءِ روتگ چہ درساں پیسر وتی زرد ءَ کل کرتگ اَنت ‘وتی بلوچ گمواری ءِ میراث وتی چکاں داتگ ءُ پیسر تر ءَ وٹی ٹک ’’مری بلوچ ‘‘ ءَ راجدوستی ءِ باروءَ سر پد کنائینت ءُ رند تر ءَ نوں پہ دگہ بلوچاں ھمے واھگ داشت کہ آھم اے را ہ ءَ ھمراھداری بہ کن اَنت ۔  بلوچ بابا ءِ پگر ءِ مستریں منوگر شھید بالاچ اَت ۔ گْوش اَنت کہ شھید بالاچ بلوچ بابا ءِ یوک ءَ چک نہ اَت بلکیں آئی ءِ دیستگیں واب ءِ پیلہ کنگ ءِ اُوست اَت ءُ آئی ءَ چہ درساں گیش شھید ءِ سر ءَ بھیسہ اَت۔ گیشتر مئے گور ءَ مردم ھمے سر پد بنت کہ بلوچ ءِ راجی جنگ ءِ تہ ءَ ناوانندہ ءُ پھوالیں مردم گون اَنت ۔ بلے راستی اش انت کہ بلوچ سر مچار چہ پارلیمانی سیاستداناں گیشتر وانندہ ءُ زانتکار اَنت ۔ ماتیں گلزمین ءِ ھمک ڈنگر ءُ دار ءِ بابت ءَ زان اَنت ءُ آیانی ارزش ءَ سر پد اَنت ۔ شھید بالاچ  کہ سر مچارانی سر وک اَت ھم یک وانندھیں مردمے اَت ۔ شھید ءَ بندری وانگ چہ شال ءِ کوئٹہ گرائمر اسکول ءَ دربرتگ ۔ شھید ءِ تہ ءَ سرمچاری ‘وتی پلیں گلزمین ءُ پہ لس ءِ گھبود ءَ نہ یوکا بلوچی میراث اَت بلکیں بلوچانی تہ ءَ مری ٹک ءَ پہ ملیں مترسی ءُ بلوچ جھد ءِ تہ ءَ چہ درساں گیشتر نام کٹ اِتگ ۔ بلوچانی مری ٹک نہ یوک ءَ مروچی چہ وتی تچکی ءُ یکیں ھبر ءِ سر ءَ اوشتگءَ زانگ بیت بلکیں مری ٹک ءِ نام ھم پمیشکا مری ایرکنگ بوتگ کہ بلوچانی اے ٹک دوتل ءُ دوپوستی نہ زانت ءُ ’’یکھبر‘‘ اِنت ۔ گْوش اَنت کہ بندر ءَ مری ٹک ءِ نام بجارانی بوتگ وھدے کہ میر چاکر ءَ ھندوستان ءِ سر ءَ ارش کنگی اَت آئی ءَ بجارانی ٹکءِ سردار بجار خان ءَ ھم گْوشت کہ آمیڑءِ تہ ءَ گون بہ بیت بلے میربجار ءَ چاکرءِ ھبر نہ من اِت ءُ آئی ءِ ھمراھی ءَ نہ شت پمیشکا چاکر ءَ بجارانی ٹک ءِ نام مری ایر کرت ۔ مری بلوچی ءِ تہ ءَ ’’جن ‘‘ ءَ گْوش اَنت بزاں انچیں مردم کہ چو جن ءِ وڑ ءَ وتی ھبر ءِ سر ءَ بہ اوشت اِیت ءُ دگرانی ھبر ءَ گوش مہ داراِیت۔ بلے مری بلوچا نی ھبرنمنّی مدام پہ راج ءِ گھبود ءَ بوتگ ۔ھما وھد ءَ کہ چاکر ہندوستان ءَ سر گیپت میر بجار خان ءَ کاھان ءُ کوھلو ءِ ماتکوھاں بنجل کرت کہ دنیگت بلوچ سرمچارانی نوان تریں سُنگر اَنت ۔ میربجار خان ءِ پشتپدانی تہ ءَ َ شھید بالاچ اوّلی سر مچار نہ اِنت کہ پہ راج گھبود ءَ توپگے چست کرتگ بلکیں چدءُ پیسر آئی ءِ کماش بلوچ بابا ءُ آئی ءِ کماش ءُ پیر ک ھم پہ وتی راج ءَ سر انی ندر کنگ ءَ چکپد نہ بوتگ اَنت ۔ بلوچستانءِ چہ پر ھنگانی دست ءَ پھریز گ ءِ جنگ بہ بیت یا کہ آئی  ءَ چہ مروچیگیں نوک پرھنگانی ( پاکستانی استعماریت ) دست ءَ رؤگ ءِ دارگ ءِ جھد مری بلوچ چہ ھر کس ءَ دیم ءَ اَنت ۔

بلوچ ڈاہ  کہ مروچی وتی گڈی سیمسران رَستگ دیریں بلوچ ءِ پروش ورگ ءَ گوں ھلا س بوتگ اَت بلے اے سک سریں راج ءِ گمواریں سر انی جھد اِنت کہ ماں وتی نزوری ‘نابودی ءُ کمُکی( کمّ مُکی۔کمتری/تعداد میں کمتر) ءَ ابید ھم دژمن ءِ چماں کُنٹگ اِنت ۔ شھید بالاچ ھمے راج ءِ گمواریں سر انی آپ داتگیں ول ءِ بر اَت ۔

بلوچستان ءِ سر ءَ پاکستان ءِ ارش ءُ ایردستی بلوچاں ھچبر نہ من اِتگ ءُ مدام اے سانکل ءِ سندگ ءِ جھدکرتگ ۔ نوزدہ سد ءُ شست[1960] ءَ بلوچاں اے ماراتگ کہ آاے جنگ ءَ ابید چہ در ملکی کمک ‘ سیاسی زانشت ءُ سائنسی وڑ ءُ پیم ءَ کٹ اِت نہ کن اَنت ھمیشکا آیاں وتی ھاٹیگ ءِ مُچ کنگ ءُ پہ بلوچانی تپاکی ءَ توجیل بندات کرت ۔ بلوچانی شنگ اِ تگیں تاگت ءِ یکجاہ کنگ ءِ اے بندری جھد ھم مری ٹک ءِ بلوچ زانتکار شیر محمدی مری ءَ کرت ۔ اے جھدءِ بن ھشت ایر کنوکیں شیرومری سر دار ءُ تمندارے نہ اَت بلکیں یک وانندہ ءُ تھماریں سر وکےاَت پمیشکا آئی ءَ زانتگ اَت بلوچانی جیڑہ یوک گوں تمن ءُ ٹکّانی دست ءَ گشینگ نہ بیت ۔ آئی ءَ سرداری ءِ سر ءَ سک ایراد گیپت ءُ گْوشت کہ ’’نومریانی تہ ءَ کس وتا سردار مہ گْوش اِیت ۔‘‘گُوش اَنت کہ شیر ومری ءَ چیر اندر ءَ بلوچ بابا ءِ کمک ھم گون بوتگ ۔ واجہ شیرو ءِ پگر ءِ ھمے پھتھے مروچگیں بلوچ راجی زرمبش ءِ تہ ءَ بلوچ سر مچارانی نوک جھد ءِ بندر اَت ۔ بلوچ راجدپترءَ بلوچ آجوئی لشکر ءَ سائنسی وڑ ءُ پیم ءَ جوڑ کنگ ءِ تہ ءَ واجہ شیرو ءِ کرد بے ھیال کنگ نہ بیت واجہ شیر و ءَ وتی زرمبش ءِ نام ’’پراری ‘‘ایر کرتگ ۔ پراری بلوچی ءَ انچیں ٹولیءَ گش اَنت کہ یاگی بہ بیت ءُ گوں گپ ءُ ھبر منار مہ بیت ۔ گوریلاءَ ھم بلوچی ءَ پراری گْوش اَنت ۔ دنیگت ھم پہ بلوچ سر مچاراں اردوءِ تہ ءَ ’’ فراری ‘‘ ءِ گال کارمر دبیت (چوناھیا  ارود ءَ ’’ فراری ‘‘ ءِ بز انت چہ بلوچی ءِ ’’پراری ‘‘ ءِ بزانت ءَ دگر اِنت) ۔ شھید بالاچ ءَ ھم واجہ شیروءِ کش  اِتگیں کشک ءِ سر ءَ وتی گام ایر کرت اَنت ۔ بلے بی ایل اے ءِ چر اے نوکیں جھد ءَ پیسربلوچستان ءِ سر ءَ پاکستانی سر کار ءِ جبراک ءُ نوک پرھنگی کا رپداں بلوچانی تہ بلوچ سر مچارانی منوگرگیشتر کرتگ ءُ پہ آیاں جنگی جاو ر پیداک کرتگ اَت۔ پاکستانی سر کارھمے سر پد بیت کہ اگاں گوں بلوچ سر مچاراں جنگ ءِ بدلءَ گپ ءُ تران کنگ بہ بیت گڑا پہ آئی ءَ ھچ نہ مان اِیت ءُ بلوچستان چر آئی ءِ دست ءَ درکیت ۔آئی ءِ نز ءَ پہ بلوچستان ءِ ایردست کنگ ءَ بلوچانی سر ءَ بم گوار ی ‘اُرش ءُ بلوچ گلزمین ءَ چھا ؤنی جوڑ کنگ ءُ پنجابیانی آبادکاری ھژدری اِنت بلے راستی اِیش اِنت کہ سر کار ءِ ھمے بدیں کارپد بلوچ جنگ ءِ بنزہ جوڑ بوت اَنت ءُ سر کار ءَ ھمینچک گیش ھبر ءِ بدل ءَ جنگ ءُ چوپ ءِ سر ءَ زور دات بلوچ سلاہ بندیں جھد ھمینکس مسترءُ مھکم تر بوان بوت۔

وھدے کہ پاکستا ن ءَ ون یونٹ سسٹم ھلاس کنگ ءُ بلوچستان یک جتائیں یونٹےمنگ بوت بلوچ سیاسی سروک کہ آوھدءَ نیشنل عوامی پارٹی ءِ تہ ءَ جھد کنگ ءَ اِت اَنت ھمے سر پد بوت اَنت کہ نو بلوچاں مزنیں کچے ءَ وتواجھی رس اِیت بلے بلوچانی اے وشمنی اَت ۔ دومی نیمگ ءَ بلوچ سلاھبندیں جھد کارانی سروک واجہ شیرمحمد مری سر پد اَت کہ پاکستانیانی ٹوکانی سر ءَ باور کنگ ءِ آسر بلوچ بیگواھی درکئیت ۔پمیشکا واجہ شیروءَ سلاھبندیں جھد یلو نہ دات بلکیں آئی ءَ بلوچ سر وک ھژدار(انتباہ) دات اَنت کہ پاکستان آرمی یک رندے پدا بلوچانی سر ءَ اُرش کنت ءُ آیاں سوجے دات کہ آھم مدام وتی اِنان ءَ بہ بنت ۔آوھد ءَ بلوچ بابا نیپ ءِ سروک اَت کہ سیاسی ءُ استمانی وڑ ءَ پہ بلوچستان ءِ گھبود ءَ جھد کنگ ءَ اَت ۔ پاکستان ءَ نوزدہ سد ءُ ھپتاد[1970] ءِ گچینکاری ءَ نیپ ءَ چہ بلوچستان ءَ درساں گیشتر سیٹ کٹ اِت ءُ بلوچستان ءَ سر کار ( حکومت ) اِش ٹھ اِینت بلے دیر نہ گوست کہ واجہ شیرو ءِ گْوشتگیں ھبر راست بوت ۔ بلوچانی اے نیمبندگیں وتواجھی ھم لونڈواں دوست نہ بوت ءُ آیاں پہ نیپ ءِ سر کار ءِ دور دیگ ءَ پندل ساز اِت ۔ دومی نیمگ ءَ بلوچ سر مچار میرھزار خان ءِ سروکی ءَ چیر اندری کار ءَ ات اَنت وھدے کہ نیپ ءِ سر کار پْرشت ءُ بلوچانی سر ءَ اُرش کنگ بیت بلوچ سر مچاراں وتی سلاھبندیں جھد پدا بندات کرت ۔

اے رندی بلوچ سلاھبندیں جھد ءِ منوکانی تہ ءَ سر دار مینگل ‘بلوچ بابا ءُ واجہ غوث بخش بزنجو ھم گون اِت اَنت ۔ھمے جھد ءَ پاکستان آرمی ءِ کرد ءِ سبب ءَ بلوچ بابا اے آسر ءَ رست کہ ابید چہ سلاھبندیں جھد ءَ پہ بلوچاں دگہ ھچ راہ پشت نہ کپتگ داں روچ مروچی بلوچ بابا وتی ھبر ءِ سر ءَ اوشتاتگ ءُ پارلیمانی سیاست ءَ پہ بلوچ راج ءَ تاوان من اِیت ۔اے ڈاہ ءِ ھلاسی ءِ وھد ءَ میر ھزار خان ءِ گْوشگ ءِ پد ءَ بلوچ سر مچارپہ وتی جھد ءِزند گ دارگ ءَ چہ بلوچستان ءِ سیمسر اں آ دیم اوگانستانء شت اَنت ۔ اے لڈبوجار ءِ تہ ءَ بالاچ مری ھم وتی ٹک ءَ گون اَت۔  رند تر ءَ نوزدہ سد ءُ ھپتاد(1977)ءَ بھٹو ءِ ناوشیں دور گوں ضیاء ءِ سیاھیں باریگ ءِ بنداتی ءَ ھلاس بوت۔ جنرل ضیاء الحق ءَ بلوچ سیاسی سروک واجہ غوث بخش بزنجو‘سردار مینگل ءُ بلوچ بابا چہ بندیگ جاہ ءَ کشت اَنت ۔ھمے میانءَ داں کسانیں مدتی ءَ بلوچ سلاھبندیں جھد ھم مھتل دارگ بوت ۔ بلے چیراندرءَ شھید بالاچ گونگیں بلوچ سر مچارانی نوکیں پدریچ مااوگانستان ءَ پہ وتی گلزمین ءِ آجوئی ءِ جنگ ءَ یک رندے پدا بندات کنگ ءَ بے تاھیراَت ۔ ضیاء ءَ وتی من ءَ بلوچ سروکانی سر ءَ رحم وارتگ ءُ آچہ بندییگجا ہ ء َ کشتگ اِت اَنت بلے بلوچ جیڑہ ءِ گیش ءُ گیوار ءَ دلگوش گورنہ کرت ئِے چرایشی ءَ بلوچ سلاھبندیں جھد ءَ سکین رست ۔ با زمردم چوش بلوچ باجو رازق بگٹی ءَ بلوچ سلاھبندیں جھد ءِ بابت ءَ اے ردمنی ءِ تہ ءَ اَنت کہ بلوچ سر مچار سائنسی وڑ ءُ پیم ءَ جھد نہ کنگ ءَ اَنت بلکیں اے یک سروتیں جنگے ۔چوش بوت کنت کہ اے جنگ چہ سر مچارانی لوٹ ءَ کمے پیسر بندات بوتگ بلے پہ سلاھبندیں جھد ءَ بلوچ سر مچارساڑی اِت اَنت ءُ دیراِنت چیر اندر ی چن لانچ اِش کرتگ اَت ۔سلیگ ہیرسن وتی وانگی In Afghanistan's Shadow;Baloch Nationalism ءِ تہ ءَ نوشتہ کنت کہ کابل ءَ یک گند ءُ نندے ءِ تہ ءَ میر ھزار خان ءَ اے گْوشت کہ  گوں ضیا ءَ بوتگیں سِلا(صلح) ءِ ھچ بستار نیست ءُ پیشن گوئی کرت کہ’’چار پنچ سال ءَ پد اے سِلا ءِ ھچ بستار پشت نہ کپ اِیت ‘‘ ءُ بیھاردات کہ ’’گوں کْوھنیں سَلاھاں ما چی کرتگ ۔آوھد ءَ جنگ ءِ وھد ءِ گچین ما نہ کرتگ بلکیں جنگ مئے سر ءَ مُشگ بوتگ ۔ آیوکیں روچاں وھد ءُ جاگہ ءَ ما گچین کن اِیں ءُ آوھد ءَ مئے گور ءَ گھتریں سَلاہ ھم بیت ۔‘‘

انچش کہ وھد ءُ پاس گوزان ات اَنت ھمے پیم ءَ بلوچ ءِ کینگ بلوچ ءِ نوکیں پدریچ ءِ زرد ءَ رُدان ءُ پھتہ بوان اَت ۔ھشتادءِ دھِک ءَ اوگانستان ءَ گوں وتی ٹک ءَ درانڈیھ بیوکیں شھید بالاچ ، بلوچ ءِ نوکیں پدریچ ءِ جھگیری ءَ درساں دیم ءَ اَت ۔ آ وھد ءَ روس کہ دنیا ءِ مُچیں کمیونسٹ ورنایانی پگر ءِ بنزہ اَت پہ بلوچ ورنایاں سیاسی ءُ زانشی دربرجاہ ءِ بستار ءَ اَت ۔ شھید ءَ ھم ما سکو ءَ ونتگ ۔آ اُودءَ انجیئر نگ ءِ ڈگری گیپت ۔انجنیئرنگ ءَ ابید اھوالکاری (Journalism) ءَ تہ ھم شھید ءَ ماسکو یونیورسٹی ءَ ڈ گری گیپتگءُ کسانیں سند (عمر)ءَ گوں بلوچ جھد ءَ ھمگرنج بوگ ءِ سبب آئی ءَ سیاسیات (اعزازی ) ءِ ڈگری ھم دیگ بوت ۔

پہ شھیدءَ یک آسودگیں زند ءِ گوازینگ یا پہ وتا جھان ءِ تہ ءَ منارینگ ءُ نام کٹگءَ دگہ پڑ ھم باز اَت بلے آئی ءِزرد مدام بلوچ گلزمین ءَ دْرنگ اَت ۔ سن دوھرازدوءَ پاکستان ءِ گچینکاریانی تہ ءَ شھید ءَ بھر زرت بلے ھبر اے نہ اَت کہ شھید چہ بلوچ بابا ءِ لیکو ءُ ھیالاں پد گرد اِتگ اَت بلکیں اے پہ سر کارءَ ڈاھجارے اَت ۔ شھید ءَ دنیا ءَ پیژ دارگی اَت کہ پاکستان ءِ سر کار ءِ چوپیل ءَ پیژ دارگ ءِ دنتان دگر اَنت ءُ ورگ ءِ دگہ۔ آکد ی ھم بلوچانی ھک ءِ مننگ ءَ ساجو نہ اِ نت ۔ گچینکاریانی تہ ءَ شھید ءِ دیم ءَ کس نہ اوشتات ءُ آسوبین منّگ بوت ۔ سوبین بوگ ءَ پد سر کار ءَ آئی ءَ لوٹوکی دات کہ اگاں آ سرکاری پارٹی ءِ تہ ءَ بئے اِت  آئی ءَ وزیری دیگ بیت بلے شھید ءَ سرکار ءِ گپ نہ من اِت ءُ وتی لیکوءُ ھیالانی سر ءَ مھکمی ءَ اوشتات ۔ بلوچستان اسمبلی ءَ سوگند ورگ ءِ وھد ءَ گوں پاکستان ءَ ھمبستگی  ءِ سوگند ءِ بدل ءَ گوں بلوچستان ءَ ھمبستگی  ءِ سوگند ئِے وارت۔

چہ شھید ءِ اے سوگند ءَ آئی ءِ سر ءَ ملک دژمنی ءُ بازیں دگہ و تگڑیں بھتام جنگ بوت ۔ بلے پہ شھید ءَ اے بھتام ءُ پاکستانی پارلیمنٹ ءَ بستا ر نیست اَت آئی ءَ وتی ھماکار کہ پہ آئی ءَ چہ لندنءَ واتر بوتگ اَت بندا ت کرت۔ یک رندے پدا بلوچ سلاھبندیں جھد بنا کنگ بوت اے جھد ءِ سروگان ورناھیں شھید بالاچ اَت ۔ شھید ءَ وتی زانت ءُ بود ناکی ءَ سلاھبندیں جھد ءِ تہ ءَ بگٹی بلوچ ھم ھوار کرت اَنت ءُ شھید اکبر ءَ باور کنائینت کہ بلوچ راج ءِ سیت گوں بلوچ دژمن ءَ سلاہ بندیں جنگ ءَ اِنت ۔

شھید بالاچ ءِ دُریں ھیال :

شھید بالاچ ءَ پہ بلوچ جھدءَ گْوشتگ اَت کہ ’’بلوچ راج زور آؤریں سر کار ءَ گوں دیم پہ دیم اِنت ۔ لکّھاں مھلوک بے لوگی ءُ دراںڈیھیں زند گوازنینگ ءَ لاچار اِنت ۔ ھزاراں جنین آدم ‘چک ءُ کماش شد ‘لنگڑ ‘بزگی سر کا ر ءِ جبر اک ءُ زوراکیاں بیران کرتگ ۔ بلوچ چہ سر کاری راھبند ( آئین ) ءَ امیت وار بوگ ءُ گھتری ءُ راجانی بروبری ءِ واب ءِ گند گ ءَ یلہ بہ دنت ۔ پرچا کہ گْوستگیں ششت سالاں ما ھمے گندگ ءَ اِیں کہ مارا مدام راھبند ‘اُستمان ‘سرکار‘وزارت ‘اسمبلی ءُ دگہ بلا ءُ بترانی نام ءَ رد دیگ بوتگ ۔ مروچی مزنیں کچے ءَ بلوچ زندان ءُ بندیگجاھاں لٹ ءُ کٹ کنگ بوگ ءَ اَنت ۔ مئے بازیں برات ‘گھار ءُ کماش سر کار ی مردماں بیگواہ کرتگ ءُ مئے بازیں ورناہ پہ ماتیں گلزمین ءِ حق  ءَ شھید کنگ بوتگ اَنت ۔ مروچی پدا تیر ءُ بم گواری ءِ تہ ءَ ماراپارلیمنٹ ءُ گچینکاری (ووٹ ) ءِ بھنگ ریوڑیانی تہ ءَ مان کنگ ءُ دیگ بوگ ءَ اِنت ۔

پہ ما چے سیت ھست اے اے پارلیمنٹ ءِ تہ ءَ ‘ مئے کجا م درد ءِ درمان اِنت اے اُستمانی وڑ( جمہوریت ) کہ ایشی تہ ءَ بلوچ ما آرت ءِ تہ ءِ واد ءَ ھساب اِنت ‘مئے کجام کار ءَ کیت؟ اے وھد ءَ گوں سرکاری سسٹم ءَ َ َھواربوگ ءَ ابید چہ بلوچ غلامی ءِ دائمی کنگ ءُ ایشی ءِ جائزی یے شاھدی دیگ ءَ دگہ ھچ مول ءُ مراد پیلو نہ بنت ۔ وھدے کہ ما اے پگر ءَ بہ من اِیں کہ ما وت زانندگ ءُ سر پد ءُ ھرچ وڑ ءَ سرجم ءُ برجم اِیں راج اِیں گڑ اما سرکاری سانکلاں پروشگ ءُ چر آئی ءِ راھبنداں ڈن وتی راجی مولاں گیپت کن اِیں ۔ مارا پہ وتی لوٹاں ککار ءُ جگا (احتجاج ) کنگ ءَ سرکاری پلیٹ فارم نہ لوٹ ایت بلکیں بلوچ پلیٹ فارمے جوڑ کنگ لوٹ اِیت۔ اگاں ما اے ھیا ل داشتگ کہ پنجابی پاکستانی ریاست ءَ گوں ھمایانی گوازی ‘ھمایانی پڑ ءُ ھمایانی ٹھ اِینتگیں راھبند ءِ سر ءَ پروش دہ اِیں گڑا ما زنڈیں تاوانی ءَ کپ اِیں۔ پرچا کہ ھما پڑ ءَ کہ ما کمُک ‘نزور ‘بے کس ‘بے وس ءُ بندیگ بہ بئے اِیں ءُ گوازی ءِ راھبند پہ پزور ءَ ھر وھد ءَ مٹ کنگ بہ بنت ۔ گوازی کنگ ءُ کٹّگ ءِ امیتوار بوگ وشمنی ءُ وتاوت رد دئیگ ءَ ابید دگہ ھچ بوت نہ کنت ۔ اگاں مئے حقی ئیں لوٹ سر کار ءِ پروش دیگ ءُ بلوچ حقانی پچگرگ اِنت گڑا مارا اے جنگ اسلام آباد ءِ پارلیمنٹ تہ ءَ ناں بلکیں بلوچستان ءِ تلاریں کوہ ‘ تپتگیں ریک ءُ دشت ءُ ویرانگانی تہ ءَ کنگ لوٹ اِیت ۔ پرچا کہ اے دشت ءُ گیابان ءُ تلاریں کوھانی ھمک سنگ مئے ماتیں گلزمین ءِ کنٹ اِنت ۔ اے گیابانی دار ءُ ڈنگر ‘دشت ءِ دنز ءُ ھاک ءُ تلاریں کوہ چوں ماتیں گلزمین ءِ گشان ءَ مارا پھریز اَنت ءُ ھمے دشت ءُ گیابان ءُ تلاریں کوہ پہ جبراک ءَ مرگ بنت پرچا کہ ادءَ ماگیشتر اِنت ۔ ءُ ھما کس کہ سر پد اِنت کہ ما کمُکیں ھساب ءَ (اقلیت ءَ ) اسلام آباد ءِ پارلیمنٹ ءِ تہ ءَ ننداِیں ءُ زوراک ءَ وتی گپ ءَ منّارینت کن اِیں یا پہ بلوچ لوٹانی پیلو کنگ ءَ سوبین بئے اِیں؟ منی سر پرنہ بیت ۔ پہ بلوچ ءِ سکین ءُ زانشت ءَ چہ اے پارلیمنٹ ءَ ھناوار ہڑتالی ( بھوک ہڑتال ) کیمپانی کرد گیشتر اِنت کہ آاُود ءَ منی مڑاھداریں بلوچ راج ءِ مات ءُ گھار ءُ برات پہ وتی زندانیانی پدّرائی (بازیابی ) ءُ پہ سر کار ءِ کارپد ءِ ایر جنگ ءَ نشتگ اَنت ۔ پہ دروریکے ءَ یات بیت کہ پارلیمنٹ ءِ مجلسےءَ کیا چی گْوشتگ ءُ چی ئِے رستگ؟ بلے علی اصغر بنگلزئی ءِ کسانیں چکانی رِتکگیں دیم ھر چ گمواریں بلوچ ءِ زرد ءَ نکش بوتگ ۔اے زالبول ءُ زاھگاں ما چی بہ گْوش اِیں کہ پت اِش بیران بوتگ اَنت ءُ آگھار ءَ کہ آئی ءِ لوگ واجہ بیگواھی مرتگ یا کہ زندوکّانی کل کنگ بوتگ چوں ساڑین اِیں ؟ما اے پارلیمنٹ ءِ تہءَ گوں ھمایاں ھمزان نہ نشتگ اِیں کہ دست اِش چہ ھمیشانی سیاد ءُ ھمبلانی ھوناں ششتگ اَنت ؟ منی ھیال ءَ ایشانی زرد ءِ آس ءُ سْرپتگیں چم یوک پہ وتی بیر ءِ گرگ ءَ بے تاھیر اَنت ۔ ایشاں تاھیر ھماوھد ءَ رس اِیت کہ چہ ایشانی دوستانی بیگواہ کنوکاں ما بیر بہ گراِیں ۔پہ اے بیر ءِ گرگ ءَ ماراگچینکاری (الیکشن ) ‘ایوانءُ کرسی (اقتدار ) ءِ کمک نہ لوٹ اِیت بلکیں مارا وتی زند ءِ مرگ مول ءُ مراد دیمونی‘بیرگری ءُ حقگری جوڑکنگی اَنت ۔ زندگ بئے اِیں کہ مراِیں۔‘‘[روتاک آساپ ۔آدینہ {جمعہ }10اگست 2007ء ]

شھید بالاچ ءَ ھما راہ گچین کرتگ اَت آئی ءَ تاب مان نیست اَت ءُ نیکہ آئی ءِ جند ءَ وتی لیکو ءُ ھیالانی سر ءَ شک اَت چوش کہ مئے تہ ءَ اے جست ءَ ھر کس کنت کہ باریں بلوچانی جھد آپسرے ءَ رس اِیت یاکہ ناں ۔ھمے جست چہ شھید ءَ ھم کنگ بو ت ءُ پسہ ءَ شھیدءَ گْوشت کہ ’’ من گوں جھدے ءَ ھمگرنچ بہ بئے آں  ءُ آئی ءِ بابت ءَ چون گْوشت کن آں  کہ من ناامیت آں ؟ منی نزءَ ھمے جھد ءِ برورد ءَ بلوچستان ءِ باندات رژناہ اِنت۔‘‘

شھید ءَ بلوچ بابا ءِ پگر سر ءَ ستک اَت پمیشکا آئی ءَ پہ بلوچستان ءِ آجوئی ءَ سلاھبندیں جھد ھژدری زانت بلے وانگ ءُ زانگءِ ارزشت ءَ ھم شری ءَ سر پد اَت پمیشکا آئی ءَ کاھان ءَ یک اسکولے پچ کرت ءُ وتی ٹک ءِ درسیں مردمانی سر ءَ اے المی کرت کہ آ وتی چکاں بوانین اَت ۔ پہ اسکول ءَ َ شھید ءَ چہ ڈیرہ غازی خان ءَ استاد ھم لوٹائینت ۔ھرکسے ءَ کہ وتی چک اسکول ءَ دیم نہ دات اَنت آیاں روچے پنچسد کلدارَ ڈنڈ کرت ءُ ھرچ استادے ءَ کہ اسکول ءَ نئے اَتک آئی ءِ سر ءَ پنجاہ کلدار ڈنڈ بست ۔ شھید ءِ چر اے گامگیج ءَ مری بلوچانی تہ ءَ وانگ ءُ زانگ ءِ ھب ءُ واھگ پیداک بوت ۔ وانگ کہ راجدوستی ءِ بندری پگر ءِ سر پد بوگ ءَ چہ درساں مستریں سلاھے نگیگیں جاوراں ھم شھید ءَ نہ شمو شت ۔ بلے شھید اے ھبر ءِ منوک نہ  اَت کہ راج ءِ آیوکیں پدریچ چہ راجی پگر ءَ زِبھر بہ زانندگیں وانند گ بہ بیت۔ آئی ءِ نز ءَ سرپدیں جھد( شعوری جدوجہد ) ءِ نام ءَ پوتاری ءُ راجدوستی ءِ نام کاسگ چٹّانی منتواری نہ اَت ۔ بلکیں آ اے ھبر ءِ منوک اَت کہ راج جھد ءِ راستیں بزانت ءَ سر پد بہ بیت ۔ راجدوستی ءِ بنزہ جوڑ بوتگیں زرمبش ءَ بوان اِیت ءُ بزانت ۔ بلوچستان ءِ جاور پاکستان ءِ زوراکیاں شری ءَ سر پد ءُ زانگ ءِ سبب ءَ آئیءِ نزءَ سلاھبندیں جھد پہ آجوئی ءِ راہ ءِ بُرگ ءَ درساں شرتراِنت۔ شھید ءَ چہ کوھلو ءَ داتگیں گلگدارے ( انٹرویو یے ) تہ ءَ گْوشتگ :’’بلوچ راج ءِ باندات رژناہ اِنت آمدام بندیگیں زند نہ گوازین اِیت ۔اگاں حق لوٹوک غدار گشگ بنت گڑاگوں من ءَ درسیں بلوچ چر اے غداری ءَ پُشت ءَ نہ کنز اَنت ۔‘‘ بلوچ جھد ءِ بابت ءَ پاکستانَ مدام انچیں گپ جنت کہ گْوش ئے زاناں بلوچانی جھد پہ آیانی جند ءِ سیت ءَ نہ اِنت بلکیں لھتیں ٹک ءُ ٹولی پہ درملکی سیت ءُ لبّ ءَ سلاھبندیں جھد کنگ ءَ اِنت ۔ چوناھیا آجوئی ءِ جھد ءُ گیشترپہ سلاھبندیں جھد ءَ درملکی کمک المی زانگ بیت بلے بلوچاں چہ در ملک ءَ اوست کنگ ءَ گیشتر وت پہ وتی جھد ءَ باوست کرتگ ۔ چوش کہ شھید ءَ اھوالکارانی جست ءِ پسو ءَ درائینت کہ ’’اگاں گوں ما  ڈنی ءُ امریکی کمک گون بوت اِنت گڑا مروچی جاور یکسر دگہ بوتگ اِت اَنتءُ جنرل مشرف ءَ دگہ جاگہ رؤگ ءِ بدل چہ مئے گورءَ شَوْر ءُ سوج زرتگ اَت۔ امریکہ کئی پلہ مرزی کنگ ءَ اِنت ھرکس سرپد اِنت ۔ مئے جھد اِنت کہ دنیا مئے نیمگ ءَ دلگوشگور بہ کنت داں  ما آیاں گشت بہ کن اِیں کہ گوں ما ظلم ءُ ناشری بوگ ءَ اِنت ۔‘‘ شھید بلوچ جھد ءَ آجوئی ءِ سلاھبندیں جھد سر پد اَت ءُ سرکار ایشی ءَ شِرْکاری ( دہشت گردی ) گْوش اِیت ۔اے بابت ءَ شھید بالاچ ءِ اھوالکاراں دانتگیں اے پسو راجدپتری راستی ءَ گوں نزیکی کنت :’’ شِرکاری ءِ بھتام ءِ مئے سر ءَ مشگ ءِ ھبر پہ راجی جھد کاراں نوکیں ھبرے نہ اِنت ھر کجاکہ راجے پہ وتی حق ءَ مِڑایت سر کارآئی ءَ شِرکار ءِ نام ءَ دنت ۔‘‘

بلوچانی تہ ءَ لھتےَ نامے انچیں راجدوستیں گل ءُ پارٹی ھم ھست اَنت کہ وتا لس مھلوک ءِ جھگیر سرپد بنت ءُ مدام ھمے ھبر ءَ کن اَنت کہ سلاھبندیں جھد پہ بلوچاں تاوان ءُ گران ءُ پارلیمانی راہ آسان ءُ شرتراِنت ۔ سر کار اے ھم گْوش اِیت کہ بلوچ سلاھبندیں جھد ءِ تہ ءَ بلوچ لس مھلوک ءِ بائیواری نیست بلے شھید ءَ اے ھبرنہ من اِتگ ءُ گوں اھوالکارانی یک انچیں جستے ءِ پسو ءَ گوں مھکمدلی  گْوشتگ کہ:’’من اے ھبر ءَ ستک ءُ دل گْوش آں کہ سلاھبندیں جھد ءِ منوک گیشتر بوان اَنت ۔ مروچی بلوچستان ءِ گیشتریں مھلوک ھمے سر پد بیت کہ بلوچاں حق چہ سلاھبندیں جھد ءَ رس اِیت ءُ اے جست ھم مھلوک ءِ ذھن ءِ تہ ءَ چست بوگ ءَ اِنت کہ اگہ تب ءُ کرد (پاکستانیانی ) مٹ نہ بوت اَنت ءُ بلوچ بروبر زانگ نہ بوت اَنت گڑاپہ آیاں گستا بوگ شرتراِنت ۔‘‘شھید ھم دنیا ءِ گیشتریں سروکانی پیم ءَ اے ھبرءِ منوگر اَت کہ سِلا جنگجاھاں نہ بنت بلکیں دیوانانی تہ ءَ بنت بلے سلا کنگ ایشی ءَ نہ گْوش اَنت کہ بلوچ سرکار ءِ گْوشتگیں درسیں گپاں بہ من اَنت ۔ بلکیں شھید ءِ نزءَ :’’درسیں جیڑہ چہ نندگ ءُ دیوان ءَ ھلاس بنت بلے ھبر اش اِنت کہ ادءَ دیوان کئی میانءَ بیت؟آیا غلام ءُ واجہ وت ما وت دیوان کرت کن اَنت ؟ وھدیے کہ کسے اے ھیال بہ کنت کہ آدیم ءِ مردم ءَ نندارین اِیت ءُ رد دنت گڑاچرایشی ءَ جیڑہ ھلاس بنت ؟آیا داں روچ مروچی بوتگیں گپ ءُ تران ءَ ابید چہ دلبڈی ءَ دگہ چزے رستگ ؟اگہ گپ ءُ تران ءِ تہ ءَ اے ھبر گییشینگ بہ بیت کہ بلوچ راج ءَ وتی باند ات ‘بھت ءُ دیمروئی ءِ بابت ءَ پیسلہ (فیصلہ ) کنگ ءِ واک دیگ بیت گڑا ھمے گپ ءُ تران گْوشگ کرزاِیت بلے یوکا اے گْوشگ کہ جیڑہ گیش اِتگ لھتیں نوکری دیگ ءُ گیس رائلٹی ءِ کمو باز گیش کنگ ءُ میگاپروجیکٹس ءِ تہ ءَ آرت ءِ تہ ءِ واد ءِ ھساب ءَ بلوچاں کمے باز لبّ ءُ مُز دیگ بہ بیت ؟پہ جیڑ ہ ءِ گیش ءُ گیوار ءَ اے گپ ءُ تران نہ اِنت پرچا کہ لھتیں لبّ ءُ مُز بلوچ راجی حقانی مٹ ءُ بدل بو ت نہ کن اَنت ۔  ما وتی راجی حق ءُ راجی پجار ءِ بدل ءَ دگہ لوٹ پرچا بہ کن اِیں؟ ماگندگ ءَ اِیں کہ مئے بستار ءُ پجار گار ءُ بیگواہ کنگ بوگ ءَ اَنت ۔ چہ لھتیں پروجیکٹساں بلوچ راجدپتر ھم زوال کنگ بوگ ءَ اِنت ۔‘‘اے شھید ءِ جھدانی برورد اِنت کہ کول ء  شھید ’’ مروچی بی ایل اے یک راستی یے جوڑ بو تگ ءُ اے گل ءَ درسیں بلوچانی کمک گون اِ نت ۔‘‘

بالاچ مری ءِ شھادت :

بلوچ بابا آجوئی ءِ سلاھبندیں جھد ءِ نیمون ءُ شھید بالا چ اے جھدءِ راھشون اَت ‘بابا ءَ اے جھد ءَ پگری سکین داتگ ءُ شھید ءَ راہ پیش داتگ ۔21 نومبر ءَ چوش شھید اکبر ءِ شھادت ءَ شھیدبالاچ ءِ شھادت ءِ راستیں اھوال ھم دنیگت اندیم اَنت ۔ انچوش کہ شھید اکبر ءِ شھادت ءِ مننگ ءَ بلوچ بابا ساڑی نہ  اِنت ھمے پیم بابا ءَ شھید بالاچ  ءِ ھال ھم باور نہ کرت ءُ گْوشت کہ :’’ھر وھدے کہ من ءَ باوربیت گڑاھر چی کہ دوزواہ ‘برات ءُ گموارھست اَنت اتک کن اَنت ۔ من آیاں گْوش آں  کہ من یک درتگیں تگردے پچ کن آں ‘ڈکّیں نگن ھست ۔ بلے داں ھما وھد ءَ من پرس نہ دارآں کہ منی دل باور نہ کنت ۔ منی دل نہ من اِیت کہ بالاچ بیران بوتگ آزندگ اِنت ۔ایشی ءِ کماش ( شھید اکبر ءِ چک ءِ نیمگ ءَ دست ءَ ٹال کنان ءَ ) نواب اکبر ءِ باروءَ ھم ھمے گْوشگ بیت کہ جَنگ بوتگ گڑا پرچا آمردمانی دیم ءَ ایرکنگ نہ بوتگ ۔ داں وھدے منی دل اے ھبر ءَ مہ من اِیت چرایشی ءَ پیسر من پرس نہ دارآں ۔‘‘

بابامری ناں بلکیں شھیدءِ بیرانی ءِ ھال ءَ ھچ بلوچ مننگ ءَ ساڑ ی نہ اِنت پرچا کہ شھید بیران نہ بنت بلکیں نمیران اَنت ۔ پہ شھید بالاچ ءَ بلوچ  بابا ھم ھمے گْوش اِیت :’’بالاچ نہ مرتگ بلکیں ھما ماتیں گلزمین ءِ کہ آبچ اَت ھمائی ءِ کنٹ ءَ واب اِنت ۔‘‘ 

شھید اکبرءِ پشت ءَ دژمن ءَ کہ انچیں دروگ بستگ ھمے پیم پہ شھید بالاچ ءَ ھم سر کاری اھوالکار‘ کاسگ چٹ ءُ نبشتہ کارانی رمے ءَ دروگ ءِ سر ءَ دروگ بندان کرت بلے انچوش کہ دروگ ءِ بن ٹنگ بیت سر کار ءَ ھم یک دروگے نہ بست کہ مردم مان براِتین اَنت ( شش ءُ پنچ ءَ بہ بوتین اَنت ) بلکیں مدامگیں وڑ ءَ سرکار ءِ دروگ ءَ بلوچ مھلوک ءِ کینگ پہ سر کار ءَ گیشتر کرت ۔ روتاک ءُ ٹی ویانی تہ ءَ شھادت ءِ ھال سئے وڑ ءَ شنگ بوت ۔ یک ھالے اش اَت کہ بالاچ مری اوگانستان ءَ چہ گاڑی ءِ ایکسیڈنٹ ءَ بیران بوتگ ۔ دگہ ھالے اش اَت کہ ماں ھلمند ءَ جاگھے کہ نامے ’’گرم سیل ‘‘اِنت ءُ ھمود ءَ بلوچ مزنیں کساسے ءَ جاھمند اَنت ءُ اے میتگ طالبانانی دزچیری ءَ اِنت ۔ پمیشکا نیٹو آرمی ءَ اُرش کرتگ ءُ ھمے اُرش ءِ تہ ءَ بالاچ ھم جَنگ بوت ۔ ھالتاکانی تہ ءَ شنگ اتگیں ھالے ءِ تہ ءَ اے ھم گْوشگ بوتگ کہ شھید بالاچ گوں سی چل گاڑیانی مزنیں کاروانی ءَ ھوار اَت کہ نیٹو آرمیءَ پہ نزاتکاری اُرش کرتگ بلے چہ اوگانستان ءِ سرکار ءُ نیٹو ءِ نیمگ ءَ اے بابت ءَ ھچ گْوشگ نہ بوت پمیشکا اے ھبرھچ وڑ باوری نہ اِنت بلے درساں مستریں دروگ کہ بند گ بوتگ اِیش اَت کہ شھید بالاچ بلوچ سر مچار براھمد گ بگٹی ءَ جَتگ ۔ اے درگت ءَ ایف سی ءِ آئی جی ءَ یک اھوالکاری  ترْانے ءِ تہ ءَ گْوشت کہ:’’اے ھبر دروگ انت کہ بالاچ مری بلوچستان ءَجَنگ بوتگ ۔ بلوچستان ءَ ھچ جاگہ ءَ آرمی آپریشن بوگ ءَ نہ اِنت اے ھبر سیاہ دروگ بلکیں ملک دژمنی اِنت ۔‘‘

آئی جی ءَ اے ھم دروگ بست کہ :’’بالاچ مری ءِ اوگانستان ءَ بیران بوگ ءِ ھال 20نومبر ءَ رس اِتگ ۔اے درگت ءَ بازیں گپ دیم ءَ آیگ ءَ اَنت چیا کہ میر بالاچ مری ءُ براھمدگ بگٹی چہ گوستگیں سال ءَ اوگانستان ءَ بوتگ اَنت ۔اے ھبر ھم راست اِنت کہ ھردوئیناں ماں  بلوچستان ءَ شِر کاری کنگ  ءَ چہ ڈن ءَ کمک رستگ ۔ بلے اے دوئینانی میان ءَ لھتیں نہ سِیلیں ھبر ھم بوتگ ۔‘‘

ایف سی ءِ آئی جی ءَ چہ باز مھلوک ءِ نرانتکاری ءَ نپ چست کنگ  ءَ اے ھم گْوشت کہ :’’اے ھبر ھم راست اِنت چہ ھپتاد ءِ دھک ءَ مریانی سر ءَ بیوکیں آپریشن ( چوناھیا اے آپریشن تیوک ءَ مریانیءَ سر ءَ نہ بوتگ بلکیں درسیں بلوچانی سر ءَ بوتگ ءُ بگٹیءَ ناں بلکیں سر کار ءَ کرتگ ۔اے ھبرھم راست اِنت کہ بگٹی ءُ مریانی میان ءَ لھتیں نسیلی بوتگ اَنت ۔اے بابت ءَ روتاک آزادی ءِ شونکار واجہ صدیق بلوچ ءَ وتی روتاک ءَ چاپ بوتگیں رپورٹ ئے تہءَ نوشتہ کرتگ کہ چہ ھپتاد ءِ ڈاہ ءَ پد حیدرآباد ءِ بندیگجاہ ءَ یلو بوگ ءَ رند خیربخش ءَ درساں پیسر اے وت ماوتی اڑءِ ھلاسی ءِ جھد کرتگ ءُ اے درگت ءَ ’’سارتاپ ‘‘ءَ مری ءُ بگٹیانی مزنیں جرگھے ھم لوٹائینگ بوت اے جرگہ ءَ مری ٹک ءِ مستری واجہ شیر محمد مری ءَ کرتگ ۔اے جرگہ داں باز روچاں برجم  بوت ءُ ایشی ءِ تہ ءَ ھزاراں مردماں بھر زرت ءُ شاھد اَنت کہ ھمے جرگہ ءِ تہ ءَ مری ءُ بگٹیانی اڑھلاس کنگ بوتگ اَنت۔) ءَ بگٹی ءُ مری ٹک ءِ میان ءَ دژمنی بوت کہ آوھد ءَ نواب اکبر بگٹی گورنر اَت ءُ اے ھبر ھم دیم ءَ اتکگ کہ سن دوھزار پنچ ءَ اکبر بگٹیءُ سیکورٹی ءِ مردمانی میان ءَ یک ڈا ھے ءِ تہ ءَ بالاچ مری ءَ اکبربگٹی یوک ءَ یلہ داتگ اَت چرایشی ءَ ھم دوئیں وت ماوتا ناوش ات اَنت۔‘‘اے دروگ ءِ تہ ءَ مستریں پندل اش اَت کہ:’’بالاچ مری نہ لوٹگ ءَ اَت کہ آئی ءِ نامے (نام نہاد ) جھد بگٹی ٹک ءِ دزچیر ی ءَ بہ بیت ھمیشکا آئی ءَ انچیں جاور پیداک کرت کہ اکبر بگٹی جَنگ بوت بلے بالاچ مر ی پشت کپت ( اے پاکستان ءِ چونیں توپگ ءُ تیر بوتگ اَنت کہ بالاچ ءَ گوندوداتگ اَنت ؟۔ تراتانی ڈاہ ءِ بابت ءَ شھید بالاچ ءِ گلگدارے زیت توار ءِ تاکاں چاپ بوگی اِنت کہ آئی ءِ تہ ءَ شھید ءَ ترْاتانی ڈاہ ءِ بابت ءَ ھم گپ جَتگ ءُ پاکستان ءِ سیاھیں دروگ پدّرکرتگ اَنت۔ )

اے یک انچیں کارے اَت کہ براھمدگ بے ھیالے کرت نہ کنت چوناھیا اوگانستان ءَ ھر دویکجاہ بوتگ اَنت ( ایشی ءَ گْوش اَنت دروگ ءِ بن ٹنگ اِنت ) بلے وت ماوتی نا وشی نسیلی ھم بوتگ اَنت چر ایشی ءَ ابید لھتیں لوگی جیڑہ ھم بوتگ اَنت کہ آیاں بالاچ مری ءِ لوگ ءِ مردم جْوانی ءَ سرپد اَنت ۔‘‘

بلے اے سرکاری دروگ ءَ ھچ کار نہ کرت ءُ بابا ءَ گْوشت کہ :’’من اے ھبر ءَ گشینگ لوٹ آں کہ من ءَ ھچ رنگ ءَ براھمد گ ءِ سر ءَ شک نہ کنت ۔ من ءَ اے ھبر باور نہ بیت ، براھمد گ وت چوں وتی چماں کش اِیت ؟!.........من سر پد نہ بئے آں کہ آ بھا بوت کنت ‘نہ جاھلے ءُ نہ کہ  بے اگل ءُ پھلوالے۔‘‘

سر کار ءِ شنگ کرتگیں ھال ءِ گیشتریں بھر دروگ اَ ت بلے ھوکہ اے ھبر جگر بریں راستے اَت کہ بلوچ سر مچار بالاچ  شھید بوتگ ۔ بالاچ ءِ شھادت ءِ راستریں ھال کہ گیشتر دل ئِے باور کنگ ءَ اِنت آاش اِنت کہ شھید بالاچ ھپدہ نومبر [17 نومبر] ءَ ماں نوشکے ءِ نزیک گور ءَ اوگانستان ءُ بلوچستان ءِ سیمری ھند سرلٹ ءَ گوں پاکستان آرمی ءَ بوتگیں ڈاھے ءَ ٹپّی بوت ءُ پہ علاج ءَ اوگانستان ءَ برگ بو ت ءُ ھمود ءَ شھید بوت ۔گْوشگ بیت کہ شھید گوں وتی سی ءُ چل سر مچاراں پاکستان آرمی ءِ سی ھزار مردم ءَ گوں دوپہ دو جنگ ءِ تہ ءَ ٹپّی بوتگ ۔ (شھید ءِ کرتگیں ترْاتانی ڈاہ ءِ اھوال اے ھبر ءِ راستی ءِ شاھدیءَ دئے اَنت کہ آاُود ءَ ھم پہ شھید اکبر ءِ شھید کنگ ءَ پاکستانی آرمی چو مدّگ ءَ پرّتکگ ءُ بلوچ مزار گوں وتی سر مچاریں ھمراھاں شھید کرتگ ۔ اے میان ءَ نوشکے ءَ آرمی اُرش ءُ جبراک ءِ ھا ل ھالتاکاں شنگ ھم بوتگ اَنت ءُ اے ھم روتاکاں چاپ بوتگ کہ نوشکے ءَ پاکستان آرمی بالاچ ءِ شوھازءَ آپریشن کنگ ءَ اِنت ءُ مردماں‘گرءُ دارءُ جست ءُ پرس کنگ ءَ اِنت ۔ بلے نو ں پہ مھلوک ءِ رد دیگءَ گْوشگ بوگ ءَ اِنت کہ میر بالاچ سالے ءَ گیش اوگانستان ءَ جاھمند بوتگ ءُ چہ ھمود ءَ بلوچستان ءِ مھلوک ءَ شِرْکاری ءِ سکین ئِے داتگ ۔ اگاں اے ھبر راست اَت گڑا نوشکے ‘کوھلو ءُ کاھان ءَ پاکستان آرمی ءَ پرچا بالاچ ءِ شوھاز ءَ بلوچانی گدان یک یک کرتگ اَنت؟؟

بالاچ مری ءِ شھادت ءِ ھال چہ باوریں مردماں درساں پیسر شھید بالاچ ءِ دبئی ءَ جاھمند یں برات گزین مری ءَ من اِتگ گزین ءِ ھبر گیشتر گوں برزءَ نبشتگیں ھال ء نزیکی کن اَنت بلے آئی ءَ شھادت ءِ جاگہ ءِ نام نہ گْوشتگ ۔گزین ءِ گْوشگ ءِ پد ءَ :’’ پاکستان آرمی ءَ بلوچستان ءِ یک جاگھے ءَ سرمچارانی کیمپ ءَ اُرش کرتگ ءُ شھید بالاچ گوں پاکستان آرمی ءِ کمانڈواں دیم پہ دیمی جنگ ءَ سک ٹپّی بوت ۔ سر مچاراں میر پہ علاج ءَ اوگانستان ءَ ھلمند ءِ بنجاہ ( دارلخلافہ ) لشکر گاہ ءَ نیٹوآرمی ءِ ھسپتال ءَ برت ءُ ھمود ءَ میربالاچ شھید بوت ۔ ‘‘

شھادت ءِ روچ گْوش اَنت کہ بیستءُ بیست ءُ یک نومبردوھزار ھپت (20/21نومبر2007) ءِ میانجی ءِ شپ بوتگ ءُ شھید ءِ ھمراھاں دومی روچ ءَ دوازدہ بج ءَ شھید ءِ جند ءِ سیٹلاھٹ موبائل ءِ سر ءَ اے ناوشیں ھال گزین ءَ دات ءُ پدا کوئٹہ پریس کلب ھال دیگ بوت داں بلوچ مھلوک ءَ ھم وتی سر مچار ءِ شھادت ءِ ھال بہ رس اِیت ۔ گزین ءَ اے ھم گْوشتگ کہ شھید ءِ میت امانتی اوگانستان ءَ کل کنگ بوتگ ۔

شھید بالاچ مری جوانسالی ءَ پہ بلوچ گلزمین ءَ شھید بوت بلے آئی ءِ پگر تا ں جما ربلوچ ءِ آیوکیں پدریچ ءَ آجوئی ءِ سکین دنت :’’ پہ بلوچانی جھیڑہ ءِ گشینگ ءَ بلوچانی پگرمٹائینگی اِنت ۔بلوچانی تہ ءَ اے مھارشت ودی کنگی اِنت کہ آاے سر زمین ءِ مولد نئے انت واجہ اَنت ۔ نیکہ ریاست بلوچ ءَ آسودگی دنت ءُ نیکہ بلوچ لس وتی درسیں مال ءُ مڈیاں سرکار ءَ دنت ۔اے پگر کم کم ءَ بلوچ مھلوک ءِ تہ ءَ رودم زورگ ءَ اِنت ۔(شھید بالاچ مری )‘‘