اُردو میں پڑھنے کے لیے یہاں کلک کریں

Also read in English Click here

شھید لالا حمید 8 فروری 1985 ءَ حاجی حیاتان ءِ لوگ ، گزروان وارڈ گوادر ءَ ودی بوتگ ۔ شہید ءَ بنداتی وانگ چَہ گورنمنٹ ماڈل ھائی اسکول گوادر ءَ دربرتگ ۔ شہید گوں یک سیاسی کھولے ءَ ھمبستگ اَت ۔ شھید چَہ اسکول ءِ زمانگ ءَ گوں نودربر سیاست ءَ ھمبستگ اَت ۔ آئی ءَ سیاست ءِ بندات چَہ بی این پی مینگل ءِ نودربر گل بلوچ اسٹوڈنسٹس آرگنائزیشن [ امان ] ءَ کرتگ ۔ کالج ءَ وانگ ءِ باریگ ءَ آ نودربرانی گچینکاری ءِ تہ ءَ اُوشتات ءُ نودربرجھگیر ءِ اُگدہ ءَ سوبمند بوت ۔ آ مشرف ءِ نوبت ءَ جوڑ بیوکیں پبلک سیفٹی کمیشن ءِ باسک ھم  نامینگ بوت ۔ شھید لالا حمید ءَ چَہ گوادر ءَ شنگ بیوک اولی ھالتاک روتاک گراب ایکپریس ءَ  تاکاری بنا کرت ۔ گراب ءِ بند بوگ ءَ پد آ گوں روتاک توار ءَ ھمبستگ بوت ۔ شھید یک زْرنگ ءُ گشاد کاریں تاکارے اَت آئی ءَ گوں فوٹوجرنلزم ءَ ھدوناکی گیشتر اَت ۔ آئی ءَ  رسانکدر ءِ تہ ءَ گونودلاب ءِ پْرشت ءُ پْروش ءُ تاوانانی دیم ءَ آرگ ءَ مزنیں کردے پیلو کرت ۔ سارتیں موسم ءُ رگبار ریچوکیں ھور ءِ میان ءَ آ چَہ گوادر ءَ لھتیں کلو میٹردور سربندن ءَ پہ ھما مردمانی ھال ءِ گرگ شتگ کہ آ ھانی لوگ تیاب ءِ دیم ءَ آیگ ءِ سبب ءَ پْروشگ ءَ اِت اَنت ، نگیگیں موسم ءِ تہ ءَ وھدے مردماں آ اُود ءَ دیست سک اَجکہ بوت اَنت ، تاکاری ءِ پڑ ءَ آئی ءِ اُستاد اسماعیل بلوچ اِنت ۔

شھید لالا حمید گوں مردماں زوت ھورتو بیوک ءُ وش تبیں مردمے اَت ۔ آئی ءِ گوں مردماں ابید چَہ سند ءُ چاگردی کچ ءُ کساس کندگ ءُ سنگتی اَت ۔ آئی ءِ ھمے روش آئی ءِ پجار اَت ھم کہ آئی ءِ سنگتاں مدام گیر کاینت اَنت ءُ چم اِش اَرسین بنت ۔ آئی ءِ سنگتانی تہ ءَ نود سال ءِ کماش ھوار اَت ءُ چارسالی چک  ھم ۔ آئی ءَ سنگینیں دیوانانی تہ ءَ ھم انچیں کندگی ھبر شوھاز کرتگ کہ مردم چَہ کندگ ءَ سیر بوتگ اِت اَنت ۔ شھید یک جوانیں گوازی کنوکے اَت ھم ۔ آئی  فٹبال ءَ گول کیپری  ءُ کرکٹ لیب ھم کرتگ اَت ۔ آئی ءَ سیاسی روانکانی سروکی گوں نترسی ءَ کرتگ اَت ۔ آئی ءِ کرد ءِ تہ ءَ دلپاکی ، سنگتی ، وش تبی ءُ بھادری انچیں لھتیں شری اِت اَنت کہ باز کم مردمانی تہ ءَ یکجا گندگ بنت ۔

شھید لالا حمید بی ایس او ءِ یکجا بوگ ءَ پد 26 اگست  2007ءَ گوں بی ایس او ءَ لھتیں ھبرانی سر ءَ تپاک نہ کنگ ءِ سبب ءَ چَہ سیاست ءَ گستا بوت بلے آئی ءَ گوں وتی سنگتاں ھمبستگی نہ سست اَنت ۔ 2008 ءَ آئی ءَ پہ شھید اکبر ءِ شھادت روچ دارگ ءَ بلوچ نوجوان اتحاد ءِ نام ءَ گوں دگہ راجدوستیں گلاں پچیں مراگش ءُ شٹر ڈاون ہڑتال ءِ جار جت ، اے شھید اکبر بگٹی ءِ شھادت روچ ءِ درگت ءَ چَہ سرجمیں بلوچستان ءَ اولی جار اَت چَہ ایشی ءَ پد دگہ نامی ئیں راجدوستیں گلاں ھم ایشی ءِ پلہ مرزی ءِ جار جت ۔2007 ءِ گڈی ءَ آ بلوچ نیشنل موومنٹ ءِ تہ ءَ ھوار بوت گوادر ءَ آ بی این ایم ءِ بنکی مردماں یکے اَت ۔ آ بی این ایم ءِ کمکی ادارہ بلوچ کمکار ءِ تْرامکاری ءِ تہ ءَ ھم سھرائیں رنگے ءَ گون بوتگ ۔

شھید لالا حمید زگریں راجدوستی ءَ ابید ھم سیاسی پڑ ءَ جنگ کنوکیں یک بے سلاھیں سپاھیگے اَت ۔ بلوچستان ءِ لکھاں دانشور ءُ نوشتہ کارانی پیم ءَ آ ھم بلوچ سرمچارانی دیناداسی پلہ مرزی ءَ ابید گشتانک ءُ نوشتہ کاری ءِ پڑ ءَ بور تاچ اَت ۔ بازیں مزن کارکپتاں [ سانحات ] گوں مردماں تْران کنگ ءِ سبب ءَ آئی ءِ سر ءَ بم تْراک ءُ مردم شوردیگ ءِ دروگیں بھتام ءَ کیس ھم جنگ بوتگ ۔ یک ءُ دو کیسانی تہ ءَ آَ آمیدگس ءَ بے میار ھم من اِتگ ۔ داں پُریں یک سالے ءَ آئی ءَ ماں آمیدگس ءَ یک انچیں کیسے ءِ ھم دیمپانی کرتگ کہ آئی ءِ تہ ءَ آئی ءِ میار ایوک پولیس ءِ سپاھیگانی اَکس کشگ گْوشگ بوتگ اَت ۔ بلوچستان ءَ چَہ آمیدگسانی دیم ءَ سیاسی ءُ چاگردی کارکنانی  ریاستی فورسزانی نیمگ ءَ آوار جنگ ءِ کارپداں پد آئی ءِ عدالتانی دیم ءَ پیش بوگ ءِ راہ نیست اَت پدا ھم آ چَہ وتی سر ءَ جتگیں دروگیں کیساں تچگ ءِ بدل ءَ آھانی دیمپانی کنگ ءِ راہ شوھازگ ءَ اَت ۔

شھید لالا حمید اکتوبر ءَ چَہ دشت بیری ءَ ھما وھدی پاکستانی ایجنسیاں آوارجنگ ءَ پد داں 18 نومبر 2010 ءَ بیگواہ کرتگ ۔18 نومبر ءَ آئی ءِ میت چَہ تربت ءَ 55 کلومیٹر دور ھیرونک ءِ نزیک ءَ سامی کور ءَ دگہ یک آوارجتگیں ورنا شھید حامد اسماعیل ءَ گوں دست کپتگ ، دوئیانی میت مردماں پجا آورتگ اَنت ۔ آ تربت ءَ برگ بوت ھمود ءَ کفن کنگ ءَ پد تابوت ءِ تہ ءَ کنگ بوت ، چَہ آئی ءِ کیسگ ءَ یک کاگدے دست کپتگ کہ آئی ءِ تہ ءَ نوشتہ اَت ، پہ بلوچ راج ءَ عید ءِ ٹیکی ۔ ھمے بیگاہ ءَ آئی ءِ میت آئی ءِ شھر گوادر ءَ سر کنگ بوت ۔آ گوادر ءِ دپتری کبرستان ءَ یک بے نامیں دپتری مردمے ءِ کبر [ گند ] ءِ دیم ءَ ماں گلزمین ءِ ھاکانی میار کنگ بوت ۔  شھید لالا حمید ءِ جنازہ ءِ نماز ءَ ھزارھاں مردماں بھر زرت ۔ شھید لالا حمید تیابدپی بلوچستان ءِ اولی شھید اِنت پمیشکا آئی ءَ چَہ گوادر ءِ مردمانی نیمگ ءَ سر شھید ءِ داد نام دیگ بوت ۔