( چَہ منی آزمانکانی  چاپ نہ بوتگیں کتاب ’’ سرتگیں برنج ‘‘ ءَ )
 

’’ روچ!............چی ؟ ‘‘
 

’’ ترند ءُ سوچاک کہ نامے تپد ءُ لیوار، گرماگ ءَ شھم دنت گیمر اَنت سْرپتگیں پل ، زمین چون تین ءَ تْپس اِیت ۔‘‘
 

’’ گڑا چی بیت ؟ ‘‘
 

’’ ترندیں روچ نرمیں جمبر............ ‘‘ 

’’ جمبر !..........چی ؟ ‘‘
 

’’ دوت ءُ گبار ، کوش کول پہ کول...........‘‘
 

’’کوش !.............چی ؟‘‘
 

’’سارتیں گوات ۔‘‘
 

گلزمین گل بوت کہ تْرمپےءَ گورت ، چَہ سالاں پد، چَہ کیچ ءِ ھار ءَ رند اولی تْرمپ اَت ۔ روچے کہ ھوربوت ۔۔۔۔۔۔۔ روچے کہ بہ بیت ۔ سارتیں سمین ءَ درچکی تاکانی سر سمار اِت ، مور بالو بوت اَنت ۔
 

’’ روچ ؟ ‘‘
 

’’ زند ءِ نشون ‘ سْرپ اَنت گیمرتگیں پُل، وھدے کہ روچ ءِ شھم سبک سبک ءَ نوک در اتکگیں دو تاکویں پُلاں سمار اَنت ............. ‘‘

دْرین ءَ جت ، جمبراں روچ یلہ دات پلاں بود کرت ۔ اناگتہ من بال گیپت آں ۔ اجکھی ھبرے نہ اَت اگاں منءَ چوش ابابیل یا جبرائیل ءَ دویا سد بانزل پر بوت اِنت ۔ من چَہ جمبراں گوست آں ۔ برزءَ نور شنزگ ءَ اَت ، من گوں نور اں ششت ءُ  دگہ جھانے ءَ سر بوت آں ۔ منی دیم ءَ پیر ذالے نشتگ اَت ۔ من جوڑی کرت ۔

’’من ھور آں ۔‘‘
 

’’چوش لاگر ءُ پیر ؟‘‘
 

’’منی دیم ءَ بہ چار من گلزمین آں ۔‘‘
 

’’چوش بے رنگ ‘ تئی دیم وَ ھشک اِنت ۔‘‘
 

’’منی رنگ اے نہ بوتگ ۔‘‘
 

’’من تر ادیستگ ۔‘‘
 

’’ھو !منی دلبند تئی لیب جاہ بوتگ ۔‘‘
 

’’من اُود ءَ گرانبھائیں سبز در جتگ ۔‘‘
 

’’گڑ ا مروچاں نیائے پر چہ؟‘‘
 

’’ ھو!.........(سارتیں اُفارگ ..........سارتیں اُفارگ) ساچان،نود،جمبر،گروک ءُ گرندھم شوھاز لوٹ اَنت ۔ ''

’’بلئے من ایشانی ڈس ءَ نہ زان آ ں !۔‘‘
 

’’آزانت اِش ۔‘‘
 

’’کے؟‘‘
 

’’ھورو ھوروایر دئے ‘‘